Na Veivakalagilagi mai na Veibulu vei Elder Robert D. Hales
6 ni Okotova, 2017, Valecavu e Salt Lake
Elder M. Russell Ballard ena Kuoramu ni iApositolo Le Tinikarua
“Au na calata noqu itokani lomani o Robert D. Hales. Keirau a veiqaravi vata ka sivia e 40 na yabaki ena vei itavi kei na vei komiti duidui vaka Vaitutu Raraba ni Lotu. Ena vica na yabaki sa oti, keirau a dabe veitikivi≈ena Kuoramu ni Le Tinikarua. Na totolo ni vakasama matua kei na vosa lasa vagauna nei Elder Hales ena calati. Na nona ivakasala vuku kei na nona raititobu … ena calati talega vakalevu mai vei keda kece sara. …
“Ena Okosita 1991, e a yacovi Bob na imatai ni nona mate ni uto …
“Mai na gauna oya ka lako mai, sa yaco veitarataravi mai na veidredre ni ituvaki ni bula. Ena neirau dabe vata ena veiyabaki sa oti, au sa raica kina na yalodei cecere kei na yalodina taucoko nei Robert D. Hales. Vakavuqa au dau vuki yani, terega ka taura na ligana ka, vakalailai beka, rawa ni vakila na mosi kei na dredre e sotava tiko okoya. …
“Na noqu itokani lomani a sa dau noqu tamata qaqa tu ga, ka’u kila ni sa yalovakacegu qo o koya ka tiko vakacegu kei rau nona itubutubu lomani, … lewe ni matavuvale tale eso, ka vakabibi ena nona lesu me tiko kei rau nona iTubutubu Vakalomalagi kei nona iVakabula daulomani, na Turaga o Jisu Karisito, o koya ka a sa solia kece kina nona dina me vaka edua na Nona iApositolo digitaki.”
Peresitedi Russell M. Nelson, Peresitedi ni Kuoramu ni iApositolo Le Tinikarua
“O Elder Hales e a lewe taleitaki ni Kuoramu ni iApositolo Le Tinikarua ka sivia e 23 na yabaki. Na nona cau e vuqa ki na Lotu raraba kei na lewe ni Kuoramu yadudua e sega ni vakamelei rawa. E a sega ni vakacauoca o koya ena nona veiqaravi vakalotu. Ena nona 42 veimama na yabaki vaka Vakaitutu Raraba, e a vakaitavi ena voleka ni veimatabose kei na komiti kece ena valenivolavola liu ni Lotu. Na nona vuku, raititobu, kei na veivakayarayarataki e vakilai vakalevu sara ena kena tosoi yani na matanitu ni Kalou e vuravura raraba. …
“… E a nona gagadre titobu e veigauna me dau vakamareqeti ka maroroi Mary, me qarava nona matavuvale taleitaki kei na lewe ni Lotu, ka me dua na tisaipeli yaloqaqa ni Turaga, okoya ka rokova vakalevu sara.
“Na gugumatua nei Bob ena dela ni bolebole ni ituvaki ni bula e itukuni. E a toso tikoga o koya ena loma ni revurevu kei na bolebole veivakamalumalumutaki levu sega ni loloma ki na nona ituvaki ni bula. O keimami na a vakaraici koya a vakataroga, e rawa vakacava ni cakava o koya oqori? …
“… Ena yaloqaqa ni pailate vakaivalu, the yalodei ni dauqito jabeni, na yalomalua kei na yalodina ni tisaipeli ni Turaga, o Elder Hales e sa mai vakacavara nona itavi ni bula ena dua na sala ni ivakaraitaki cecere. E sa pasitaka o koya na veivakatovolei e vuravura ka sa lesu ki vale ena dokai cecere.”
Peresitedi Henry B. Eyring, iMatai ni Daunivakasala ena Mataveiliutaki Taumada
“Au a sa dau vakadikevi Elder Hales, cakacaka vata kei koya, ka vuli mai vua. Keirau a dau veiwaseitaka na veika sotavi ka dredre ka veivakaukauwataki ka so e vakatovolei keirau. Au a vuli mai vua ena veigauna kece ka raica nona tubu ena kaukauwa vakayalo.
“Edua na isolisoli vakayalo ka vaka me a nona tu mai ena balavu ni gauna au kilai koya kina. Oya na isolisoli me itokani yalodina sara. Ko na rairai vakalewa beka me kaukauwa lailai walega oqori. Ia na Turaga Vakataki Koya e a vakalagilagi iratou na Nona iApositolo ena veivosa ni veitokani. …
“… Na Turaga e vakamatatataka na kaukauwa cava ena lako vata kei na itokani vakaoqori, ka vakanadakui vuravura me veiqaravi ena vuku ni Turaga:
“’Ia ko koya sa ciqomi kemudou, au sa tiko talega kina koi au, ni’u na liu e matamudou. Au na tiko e yasamudou imatau ka tiko talega e yasamudou imawi, ia na Yaloqu ena tiko e lomamudou, era na vakavolivoliti kemudou na noqu agilosi me ra laveti kemudou cake’ (V&V 84:88). …
“Ia oqo, a noqu inuinui ni o ira na kawa i Elder Hales, kei ira kece era lomani koya, era wilika na veivosa oqori ni Turaga me vakaga e vakamacalataki Robert D. Hales, a itokani yalodina sara ka tisaipeli. …
“… Au a ivakadinadina ni nona pasitaka na vakatovolei ni nona yalodina ki na ka e kila o koya ni vinakata na nona itokani na Kalou.”