Iren Mahsen en Presidensi Keieu, Oaktohpe 2017
Wiahla Tohnpadahk Mehlel Kei
Sang Presiden Henry B. Eyring
Sounsawas Keieu nan Presidensi Keieu
Ansou en kamadipw sarawi koaros, kitail kin wiahda atail inou ong Sahm Nanleng me kitail pahn tamataman Sounkomouro ansou koaros oh kapwaiada Sapwellime kosonned akan pwe Sapwellime Ngehno en ketket rehtail (tehk Moroni 4:3; 5:2; D&C 20:77, 79). Kitail pahn tamataman Ih ansou koaros ni atail pahn kin aledahng kitail Mware. Kitail kin wia ni soangen ahl tohto ahpw mehlel ansou me kitail kin papah mehtei kan ni Mware, wadek Sapwellime mahsen sarawih kan, oh kapakapki dahme E kupwurki kitail en wia.
E wiawihongie ansou me I pepdaisihala kisin pwutak pwulopwul men. I ese me I malipilip ong doadoahk en misineri wet sang rehn Sapwellimen Sounkomouro sounpapah keidih kan pwe ien padahngki Sapwellime rongamwahuo oh kadehdehki Ih oh Sapwellime Mwomwohdiso mehlelo. Ngehi oh iengei misinerio inoukihong kisin pwutako me e pahn mwakelekelda sang ni manaman en Tomwpen Sises Krais ni ah pahn koluhla ni pwoson Sounkomouro oh pepdaisla sang emen Sapwellime laduh kan me kolokol manaman oh mweimwei.
Ni ansou me I kihdahsang kisin pwutako nan pihlo wasahn pepdaiso, e mwengininginieng nan salengeie, “I mwakelekeladahr, I mwakelekeladahr.” Ni ansouo, I tamanda Sounkomouro Ah pepdaisla rehn Sohn Sounpepdais nan pilap en Sordan o. Ni mehlel, I pil tamanda me I wihwia Sapwellimen Sounkomour— iasadahr oh ieiaso doadoahk en komourla me Ngehn Sarawio iang towehda, duwehte dahme Sohn wiaho.
Ong ngehi oh pil emen emen kitail, tamataman Sounkomouro kak laudsang medemedewehte atail marainki oh ese duwen Ih. Kitail kak wiahda atail pilipil kan nan ehu ehu rahn pwe kitail en karanih Ih ansou wet.
Pilipil me keieu mengei iei en wadek pwuhk sarawi kan. Sang ni atail pahn wia met, kitail kak alehdi pepehm en karanih Ih. Ong ngehi, pali laud en ahi pepehm en karanih Ih kin sang ni ahi wadek Pwuhk en Mormon. Nan minit kan me I kin wadek iralaud kan en 2 Nephi, I kin rongorong nan ahi madmadau ngilen Nephi oh Lehi ara kin kosokosoia Sounkomouro duwehte ira udahn ese ihs Ih. I kin ahnekihda pepehm en karanihala.
Ong kowe, ekei wasa nan pwuhk sarawi kak sewesei iuk en karanihala Ih. Ahpw iawasa de ansou da me ke pahn wadekie mahsen en Koht, ni aktikitik oh ineng mehlel en tamataman Sounkomouro, ke pahn kalaudehla ahmw inengen aledahng uhk Mwareo nan ahmw momour ehu ehu rahn.
Soangen inengo pahn wekidala mwomwen ahmw papah nan Sapwellimen Kauno Mwomwohdiso. Ke pahn kapakap ong Sahm Nanleng en sewese kalaudehla malipilip kan me kin kohieng uhk mehndahte ma e tikitik. Sawas me ke pahn peki iei ken kak manokehla pein kowe oh loalopwoat ohngete dahme Sounkomouro ketin kupwurki ong irail kan me ke malipilip ong en papah.
I kin kehn Limeh kan oh Ah kin ketin karanih ie ni ahi kin papah nait serih kan ansou me I kin kapakap pwe ien kak ese ia mwomwen ahi pahn sewese irail diarada meleilei me rongamwahuet te kak kiong irail. Ni soangen ansou pwukoa, I sohla kin nohn nsenohki rapahki dahme se pahn wiahki pahpa de nohno keirda mwahu, ahpw I kesempwalki mehlel duwen pweida oh nsenamwahu en nait serihko.
Ineng en kiong me kitail wie papah kan dahme Sounkomouro pahn ketkihong irail kin elehda kapakap ni ngidingid ong Samatail Nanleng, mehlel ni mwaren Sises Krais. Ansou me kitail wia soangen kapakapo—ni mwaren Sounkmouro, ni pwoson Ih—Sahmo kin ketin sapeng. E kin kaderedo Ngehn Sarawio en kaweid, kansenamwahuih, oh kakehlailih kitail. Pwehki Ngehno kin kadedeh Sounkomouro ansou koaros (tehk 3 Nephi 11:32, 36; 28:11; Ether 12:41), atail men poakohng Kauno ki mohngiongitail unsek, madamadau, oh kehl pahn lalaudla (tehk Mark 12:30; Luhk 10:27; D&C 59:5).
Kapai kan en tamataman nan ehu ehu rahn oh nan ansou wet pahn kohdo ekis ekis sang ni atail pahn papah Ih, wadwadek Sapwellime mahsen, oh kapakap ni pwoson Mware. Oh soangen wiepen mehn ketemen wet pahn kak wekid kitaila en wiahla tohnpadahk mehlel en Kaun Sises Krais nan Sapwellime wehi pohn sampah—oh mwuri kousoanla rehn Semeho nan Sapwellime wehi me pahn kohdo.
© 2017 sang Intellectual Reserve, Inc. Kolokol pwuhng koaros. Ntingdahr nan USA. Kamanaman ong lokaiahn wai: 6/17. Kamanaman ong kawehwe: 6/17. Kawehwehpen First Presidency Message, October 2017. Pohnpeian. 97930 885