Founga ke Fakaafeʻi ai e Laumālie Māʻoniʻoní

Fai ʻe Palesiteni Henry B. Eyring

Tokoni ʻUluaki ʻi he Kau Palesitenisī ʻUluakí

ʻĪmisi

Palesiteni Henry B. Eyring

Mei ha fakataha lotu ʻi he ʻUnivēsiti Pilikihami ʻIongi–ʻAitahoó ʻi he ʻaho 25 ʻo Sānuali 2005.

ʻĪmisi

young man looking at computer screen

Ko e taha ʻo e ngaahi founga ʻoku ou ʻiloʻi ai ʻoku ou ongoʻi e ivi tākiekina ʻo e Laumālie Māʻoniʻoní ko ʻeku ongoʻi ha maama pea ʻoku ou fiefia. ʻI he taimi ʻoku hā ngali mamaʻo ai meiate au ʻa e Laumālie Māʻoniʻoní, ʻoku ou ongoʻi ai ha fakapoʻuli pea ʻoku ʻikai ke u fiefia. Kuó u ongoʻi ʻa e feliliuaki ko ia ʻa e māmá mo e fiefiá ʻi heʻeku moʻuí pea pehē pē foki mo kimoutolu.

ʻOku ou saiʻia ke ongoʻi ʻa e maama ko iá pea ʻoku ou saiʻia ke u fiefia. ʻOku ʻikai ke u fie tatali ki he ngaahi faingataʻá mo e ngaahi ʻahiʻahí ke ne fakalotoa au ke u fie maʻu e tokoni ʻa e Laumālie Māʻoniʻoní. Te u lava ʻo fili ke manatuʻi ʻa e ongo ʻoku ou maʻu ʻi he takaua ko iá, pea ʻi he taimi ʻoku ou fai ai iá, ʻoku ou toe fie maʻu ʻa e tāpuaki ko iá ʻaki hoku lotó kotoa.

ʻI he taimi ʻoku tau fie maʻu ai ʻa e Laumālie Māʻoniʻoní pea mo e ʻatamai nonga mo e fiefia ʻoku haʻu fakataha mo iá, ʻoku tau ʻilo e meʻa ke faí. ʻOku tau kolea ia ki he ʻOtuá ʻi he tui. ʻOku fie maʻu ʻa e lotu ʻo e tuí ke ʻomi e takaua ʻo e Laumālie Māʻoniʻoní. Ko e tui ko iá ʻa e tui ko e ʻOtuá ʻa e Tamaí, ko e Tupuʻanga ʻo e meʻa kotoa pē, pea ʻokú Ne finangalo ke tau maʻu ʻa e Laumālie Māʻoniʻoní mo fie foaki mai kiate kitautolu ʻa e Fakafiemālié. ʻOku fie maʻu ki ai e tui ko e Kalaisí ʻa Sīsū pea naʻá Ne fakalelei maʻa ʻetau ngaahi angahalá mo maumauʻi e ngaahi haʻi ʻo e maté. ʻOku tau fakataufolofola ki heʻetau Tamaí ʻaki ʻa e tui ko iá ʻi he loto ʻapasia mo ha loto falala te Ne tali mai. ʻOku tau fakaʻosi ʻetau lotú ʻaki e tui ko iá ʻi he huafa ʻo Sīsū Kalaisí ko ʻEne kau ākonga moʻoni, ʻo falala kuo fakamaʻa kitautolu heʻetau fakatomala moʻoní, ʻi hotau papitaiso ʻe Heʻene kau tamaioʻeikí, pea mo ʻetau ngāue faivelenga ʻi Heʻene ngāué pea kuo tau maʻa mo taau ke maʻu ʻa e tāpuaki ʻoku tau fekumí, ʻa e takaua ʻo e Laumālie Māʻoniʻoní.