Fas Presidensi Mesej, Septemba 2017
Ol Profet blong Gaedem Yumi
Sam yia i pas, mi bin stap sidaon long wan rum long Sol Lek Tempol we Fas Presidensi mo Kworom blong Olgeta Twelef Aposol oli stap mit long hem wan taem long wan wik. Mi lukluk i go antap long wol we i fesem Fas Presidensi, mo longwe mi luk ol foto blong wanwan long ol Presiden blong Jos.
Taem mi stap luk ol foto ia, olgeta we oli kam bifo long mi—stat long Profet Josef Smit (1805–44) kasem Presiden Gordon B. Hinckley (1910–2008)—mi stap tingting se, “Mi glad tumas se wanwan long olgeta i save stap olsem wan gaed.”
Olgeta ia oli ol gudfala man we oli neva gat tu tingting, neva foldaon, mo neva mestem rod. Olgeta ia oli ol man blong God. Taem mi tingbaot ol profet blong tedei we mi bin save mo lavem olgeta, mi tingbaot ol laef blong olgeta, fasin blong olgeta, mo ol tijing blong olgeta we oli kam tru long insperesen.
Presiden Heber J. Grant (1856–1945) i bin stap olsem Presiden blong Jos taem we mi bin bon. Taem mi tingtingbak long laef mo ol tijing blong hem, mi biliv se wan fasin we Presiden Grant i soemaot oltaem hem i fasin blong traehad—traehad from ol samting we i gud mo stret.
Presiden George Albert Smith (1870–1951) hem i bin Presiden blong Jos long taem we mi bin stap olsem bisop blong wod blong mi long Sol Lek Siti. Hem i poenemaot se i gat wan bigfala faet i stap gohed bitwin Lod mo enemi. “Sapos yu stap insaed long laen blong Lod,” hem i bin tijim, “bae yu folem tingting blong Lod mo bae yu no wantem mekem rong samting.”1
Mi bin kasem koling blong kam olsem wan memba blong Kworom blong Olgeta Twelef Aposol long 1963.Presiden David O. McKay (1873–1970) nao i bin singaotem mi. Hem i tijim fasin blong tingbaot ol narafala man tru long fasin blong laef blong hem. “Tru fasin blong laef olsem wan Kristin man,” hem i bin talem, “hem i blong putum lav long aksen.”2
Presiden Joseph Fielding Smith (1876–1972), wan long ol top man blong raet blong Jos, i gat wan prinsipol we i stap gaedem laef blong hem long saed blong stadi long gospel. Hem i no stop blong ridim ol skripja mo hem i save gud ol tijing mo ol doktrin we oli stap long ol pej blong skripja bitim eni man we mi save.
Presiden Harold B. Lee (1899–1973) hem i bin stek presiden blong mi taem mi mi wan boe. Wan toktok we hem i laekem tumas hem i “Stanap long ol tabu ples, mo no muv.”3 Hem i leftemap tingting blong ol Sent blong stap wan wetem, mo ansa long ol toktok blong Tabu Spirit.
Mi biliv se wan prinsipol we i stap olsem wan gaed long laef blong Presiden Spencer W. Kimball (1895–1985) hem i dedikesen. I klia se hem i dediketem hem fulwan i go long Lod. Hem i dediketem hem tu blong laef folem gospel.
Taem Presiden Ezra Taft Benson (1899–1994) i kam Presiden blong Jos, hem i singaotem mi blong kam olsem Seken Kaonsela long Fas Presidensi. Lav hem i prinsipol blong hem we i stap olsem wan gaed, we i stap insaed long toktok we hem i lavem tumas, we Sevya i bin talem: “?Yufala i mas kam ol wanem kaen man? I tru mi talem long yufala, i olsem mi stap.”
Presiden Howard W. Hunter (1907–95) hem i wan man we oltaem hem i lukluk long ol gud saed blong ol narafala man. Oltaem hem i kaen, oltaem hem i gat tingting we i stap daon. Hem i wan ona blong mi blong save stap olsem Seken Kaonsela blong hem.
Presiden Gordon B. Hinckley i bin tijim yumi blong traehad. Hem i bin serem ol strong testemoni abaot Sevya mo misin blong Hem. Hem i bin tijim yumi wetem lav. Blong stap olsem Fas Kaonsela blong hem, hem i wan ona mo wan blesing blong mi.
Sevya i sendem ol profet from se Hem i lavem yumi. Long jeneral konfrens long Oktoba ia, bae ol Jeneral Atoriti blong Jos bae oli gat janis blong serem toktok blong Hem bakegen. Mifala i mekem wok ia wetem wan klia tingting mo tingting we i stap daon.
Yumi kasem blesing from Jos blong Jisas Kraes i bin kambak long wol ia mo Jos i stap antap long bigfala ston ia blong revelesen. Blong gohed blong kasem revelesen hem i olsem blad we i mekem gospel blong Jisas Kraes i laef.
Bae wanwan long yumi i stap rere blong kasem revelesen we i stap kam plante long taem blong jeneral konfrens. Bae hat blong yumi i fulap wetem strong tingting taem yumi leftemap han blong yumi blong sastenem ol profet we oli stap laef mo ol aposol. Bae yumi kasem laet, tingting i kam antap, kasem kamfot, mo kam strong bakegen taem yumi lisin long ol mesej blong olgeta. Mo bae yumi rere blong komitim yumi bakegen i go long Lod Jisas Kraes—gospel blong Hem mo wok blong Hem—mo blong laef wetem niu tingting blong holemtaet ol komanmen blong Hem mo blong mekem wanem we Hem i wantem.
© 2017 i kam long Intellectual Reserve, Inc. Oli holem evri raet. Oli printim long YSA. Oli letem long Inglis lanwis: 6/17 Oli letem translesen: 6/17 Translesen blong First Presidency Message, September 2017. Bislama. 97929 852