iTukutuku ni Mataveiliutaki Taumada, June 2017
Kacivi ki na Cakacaka
Ena gauna a kacivi Elder Heber C. Kimball (1801–68) kina na Parofita o Josefa Simici me laki kaulotu ki Igiladi me “dolava kina na katuba ni cakacaka ni veivakabulai” a yalo lailai vakalevu sara kina o Elder Kimball.
“Isa, Turaga,” a vola, “Oi au e dua au tebenigusu kaka, kau malumalumu sara ena mataqali cakacaka vakaoqo.”
Ia a mani ciqoma ga o Elder Kimball na veikacivi o ya, ka kuria kina: “A sega ni tarovi au na veika au a vakasamataka o ya mai na ilakolako ni ilesilesi; ni gauna au sa kila vinaka kina na lewa nei Tamaqu Vakalomalagi, au a vakila e lomaqu dina sara meu valuta yani na veika dredre kece, niu sa vakadinata ni na vukei au ena Nona kaukauwa cecere duadua, me vakatikori au ena kila ka kece au na gadreva kina.”1
Kemuni na taciqu kei na ganequ itabagone o ni sa kacivi ki na veiqaravi ni daukaulotu tudei, o ni sa mai kacivi oqo baleta, me vakataki Elder Kimball, sa “dou gadreva mo dou qarava na Kalou” (V&V 4:3) e baleta ga ni ko ni sa vakarau tu ka bula kilikili.
Oi kemuni na veiwatini qase daukaulotu, ko ni sa kacivi ki na cakacaka oqo ena kena inaki vata talega. Ia, e sega walega, ni tiko vei kemuni na gagadre mo ni veiqaravi, ia na vuku talega e rawati mai na veigauna ni solibula, loloma, kei na veika o sotava ena nomu bula sa na rawa vei Tamada mai Lomalagi me na vakayagataka me tara kina na yalodra na Luvena tagane kei na yalewa era sa vakasaqara tiko na dina. E sega ni vakabekataki o ni sa mai vulica oqo ni da sega ni rawa me da lomana dina na Turaga me yacova sara ni da sa na qaravi Koya ena noda qaravi ira na tamata.
Ni ko ni sa gadreva oqo mo ni veiqaravi vaka-daukaulotu, e dodonu mo ni kuria kina na vakabauta ka vakaqaqacotaki, yaloqaqa kei na yalonuidei, veivakameautaki kei na veivakacokotaki, gugumatua kei na yalodina. Sa rawa vei ira na daukaulotu yalodina me ra na cakamana ena vanua ni kaulotu.
E cokotavata vakaoqo o Peresitedi John Taylor (1808–87) na nodra yavunibula bibi na daukaulotu: “Na mataqali tagane [kei na yalewa kei ira na veiwatini] eda gadreva me ra kauta voli na itukutuku ni kosipeli sai ira era sa vakabauta tu na Kalou; sai ira era vakabauta na nodra lotu; sai ira era doka na nodra matabete; sai ira … sa nuideitaki ira tiko na Kalou. … Eda sa gadrevi ira era sa vakasinaiti tu ena Yalo Tabu kei na kaukauwa ni Kalou[,]… sa tu vei ira na veidokai, kilikili, dodonu kei na savasava.”2
Sa mai vakaraitaka kina na Turaga:
“Ia raica sa matua tu na were ka sa vakarau na tatamusuki; ia, ko koya sa curumaka na nona isele takelo ena nona igu, sa kumuna vata ko koya me kakua kina ni rusa, ia sa kauta mai na veivakabulai ki na yalona.
“Kei na vakabauta, na inuinui, na loloma uasivi kei na loloma, ena mata sa vakatabakidua ki na lagilagi ni Kalou, sa rawa kina vua me qarava na cakacaka” (V&V 4:4–5).
O sa mai kacivi ena veivakauqeti vakayalo. Au sa vakadinadinataka ni vei koya sa kaciva na Kalou, sa vakadonui koya na Kalou. Ko na ciqoma na veivukei vakalomalagi ni ko cakacaka ena masumasu ena tabaniwere ni Turaga.
Na yalayala totoka sa solia tiko na Turaga vei ira na daukaulotu ena itekivu ni itabagauna oqo, ka sa toqai tiko ena Vunau kei na Veiyalayalati, sa nomuni talega: “Niu na liu e matamudou. Au na tiko e yasamudou imatau ka tiko talega e yasamudou imawi, ia na Yaloqu ena tiko e lomamudou; era na vakavolivoliti kemudou na noqu agilosi me ra laveti kemudou cake” (V&V 84:88).
Ni ko sa veiqaravi, ko ni sa na tara cake na veivakanananu tawamudu kei na kena veitokani. Au sega ni kila e dua tale na vanua mena vuataka mai na tatamusuki levu ni bula marau me vakataka na vanua ni kaulotu.
Ia, meu vosa mada vei ira na cauravou, goneyalewa, kei na veiwatini era kaulotu tiko, ena inaki cava ga, era na rairai sega ni vakacavara vakaoti na nodra gauna sa lesi vei ira ena vanua ni kaulotu: E lomani kemuni tikoga na Turaga. E vakavinavinataka o Koya na nomuni solibula. Sa kila vinaka tu o Koya na nomuni gauna ni druka. Mo ni kila tiko ni sa dau tu ga Vua na cakacaka mo ni vakayacora. Kakua ni rogoca na ka e tukuna o Setani. Kakua ni malumalumu; kakua ni yalolailai, ka kakua ni lomaleqa.
Me vaka au a raica ni oti ga vakalailai na koniferedi raraba au a kacivi kina meu liutaka na Lotu: “Kakua ni rere. Dou marau tiko. Na veisiga ni mataka sa rarama me vaka na nomu vakabauta.”3 Na yalayala o ya e tiko dina me baleti kemuni. Me sai qai kakua ni yali nomu vakabauta, baleta ni sega ni yali Nona vakabauti iko tiko na Turaga. Maroroya na nomu veiyalayalati ka toso tikoga ki liu.
Na vuravura oqo e gadreva na kosipeli i Jisu Karisito. Me na vakalougatataki ira taucoko na Nona Yalododonu na Turaga—ena vanua cava ga eda veiqaravi tiko kina—ena yalo ni daukaulotu.
© 2017 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi 6/16. Vakadonui me vakadewa: 6/16. Vakadewa ni First Presidency Message, June 2017. Fijian. 97926 858