Mensahe sa Visiting Teaching, Mayo 2017
Ang Gahum sang Libro ni Mormon
Ginaalungay ko sa tagsa sa aton nga tun-an sing mainampuon kag binag-binagon ang Libro ni Mormon tagsa ka adlaw.
Pinalangga nga kauturan, mainit ko gid kamo nga ginaabi-abi nga nagkilit-anay kita liwat sa isa ka dako nga pangkabilugan nga komperensya sang Ang Simbahan ni Jesucristo sang mga Santos sa Ulihing mga Adlaw. Antes ko sugdan ang akon pormal nga mensahe karon nga adlaw, luyag ko ianunsyo ang apat ka bag-o nga mga templo nga igapasad sa masunod nga mga lokasyon: Brasília, Brazil; Mas Nadakuan nga Manila, Philippines, area; Nairobi, Kenya; Pocatello, Idaho, USA; kag Saratoga Springs, Utah, EUA.
Sini nga aga magahambal ako parte sa gahum sang Libro ni Mormon kag sang dako nga kakinahanglan naton bilang mga miyembro sang sini nga Simbahan sa pagtuon, pagbinag-binag kag pagdapat sang mga pinanudlo sini sa aton mga kabuhi. Ang importansya sang pag-angkon sang mabakod kag sigurado nga panaksihon parte sa Libro ni Mormon indi makabig nga sobra na katama.
Nagakabuhi kita sa panahon sang dako nga kinagamo kag kalautan. Ano ang magaproteksyon sa aton batok sa sala kag kalautan nga nagakatabo sa kalibutan karon nga panahon? Ginapanindugan ko nga ang mabakod nga panahsihon parte sa aton Manluluwas, nga si Jesucristo, kag sang Iya ebanghelyo magadala sa aton sa kaluwasan. Kon wala pa kamo nagabasa sang Libro ni Mormon kada adlaw, palihog himoa na ninyo. Kon basahon ninyo ini sing mainampuon kag upod ang matuod-tuod nga handum nga hibaluon ang kamatuoran, ang Balaan nga Espiritu ang magapakita sang kamatuoran sini sa inyo. Kon matuod ini—kag sinsero ako nga nagasaksi nga ini amo—dayon si Joseph Smith isa sadto ka propeta nga nakakita sang Dios nga Amay kag sang iya anak, nga si Jesucristo.
Tungod matuod ang Libro ni Mormon, ang Ang Simbahan ni Jesucristo sang mga Santos sa Ulihing mga Adlaw amo ang Simbahan sang Ginuo sa kalibutan, kag ang balaan nga priesthood sang Dios ginpanumbalik para sa kaayuhan kag bugay sang Iya mga anak.
Kon kamo wala pa sing matuod sing panaksihon sang sining mga butang, himua inang ginakinahanglan agud makaagom kamo sang isa. Importante para sa inyo nga mag-angkon sang inyo kaugalingon nga panaksihon sa tunga sining mabudlay nga panahon, kay ano lang man ang malab-utan ninyo paagi sa mga panaksihon sang iban. Ugaling, kon mabaton na ninyo, ang panaksihon kinahanglanon nga tipigan nga mabaskog kag buhi paagi sa padayon nga pagtuman sang mga kasuguan sang Dios kag paagi sa pagpangamuyo kag pagtuon sang balaan nga kasulatan kada adlaw.
Pinalangga ko nga mga kaupdanan sa buluhaton sang Ginuo, ginaalungay ko sa tagsa sa aton nga tun-an sing mainampuon ang binag-binagon ang Libro ni Mormon tagsa ka adlaw. Kon himuon naton ini, mangin yara kita sa posisyon agud mabatian ang tingug sang Espiritu, sa pagbato sa pagduda kag kahadlok, kag sa pagbaton sang bulig sang langit sa aton mga kabuhi. Bug-os tagipusuon gid ako nga nagasaksi sa ngalan ni Jesucristo, amen.
© 2017 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/16 Petsa sang pagtugot sa paglubad: 6/16. Paglubad sang Visiting Teaching Message, May 2017. Hiligaynon. 97925 861