Visiting Tijing Mesej, Mei 2017
Paoa blong Buk blong Momon
Mi askem strong long wanwan long yumi blong prea mo stadi mo tingting hevi long Buk blong Momon evri dei.
Ol dia brata mo sista blong mi. Mi talem alo we i kam long hat taem yumi mit bakegen long wan jeneral konfrens olsem blong Jos blong Jisas Kraes blong Ol Lata-dei Sent. Ol brata mo sista. Bifo mi statem mesej blong mi tedei, mi wantem anaonsem fofala niu tempol, we, bae oli bildim long ol ples ia: Brasilia, Brasil; hae Manila, Filipin; Naerobi, Kenia; Pokajelo, Aedaho, YSA; mo Saratoga Springs, Yuta, YSA.
Long moning ia, mi tokbaot paoa blong Buk blong Momon mo impoten nid ia we yumi gat olsem ol memba blong Jos ia blong stadi, tingting hevi, mo aplae ol tijing blong hem insaed yumi. Yumi no save talemaot strong inaf se i impoten blong gat wan strong mo sua testemoni blong Buk blong Momon.
Yumi laef long wan taem we i gat plante trabol mo rabis fasin. ?Wanem nao bae i protektem yumi long sin mo devel we i kavremap wol tedei? Mi talemaot se wan strong testemoni blong Sevya, Jisas Kraes, mo blong gospel blong Hem bae i help blong lidim yumi go sef. Sapos yu no stap ridim Buk blong Momon evri dei, plis mekem. Sapos bae yu ridim wetem prea mo wetem wan tru tingting blong wantem save trutok, Tabu Spirit bae i talemaot trutok long yu. Sapos i tru—mo mi testifae se i tru—nao Josef Smit i bin wan profet we i bin luk God mo Pikinini blong Hem, Jisas Kraes.
From se Buk blong Momon i tru, Jos blong Jisas Kraes blong Ol Lata-dei Sent hem i Jos blong Lod long wol ia, mo tabu prishud blong God we i bin kambak from ol gud samting mo blesing blong ol pikinini blong Hem.
Sapos yu no gat wan strong testemoni blong ol samting ia, mekem wanem we i nidim blong kasem wan. I impoten blong yu blong gat wan testemoni blong yuwan long ol taem ia we i had, from ol testemoni blong ol nara man bae i no tekem yu longwe. Be, taem yu gat wan, wan testemoni i nid blong kipim i stap strong mo i laef taem yu gohed blong obei long ol komanmen blong God mo tru evri dei prea mo skripja stadi.
Ol dia fren blong mi long wok blong Lod, mi askem yumi evriwan blong stadi wetem prea mo tingting hevi long Buk blong Momon evri dei. Taem yumi mekem olsem, bae yumi stap long wan ples we yumi save harem voes blong Spirit, blong kamaot long temtesen, blong winim tu tingting mo fraet, mo blong kasem help long Heven long ol laef blong yumi. Mi testifae olsem wetem evri hat blong mi, long nem blong Jisas Kraes, amen.
© 2017 i kam Intellectual Reserve, Inc. Oli holem evri raet. Oli printim long YSA. Oli letem long Inglis: 6/16 Oli letem translesen: 6/16 Translesen blong Visiting Teaching Message, May 2017. Bislama. 97925 852