iSaunitaro Mai vei Ira na iLiuliu ni Lotu
Na Sala mo Kunea Kina na Vakacegu Dina
E dua na vosa mai na koniferedi raraba ni Epereli 2013.
Sa dau rai vakalomalagi ni tamata vinaka kecega ena veivanua kece sara, o ya me tiko na vakacegu e vuravura. Meda kakua ni soro ena kena rawati na lalawa oqo. Ia, a vakavulica o Peresitedi Joseph F. Smith (1838–1918), “Ena sega ni lako mai ki vuravura na yalo ni veivinakati kei na veilomani … me yacova ni ra sa ciqoma na tamata kece sara na dina ni Kalou kei na itukutuku mai vua na Kalou … , ka vakadinadinataka na nona kaukauwa kei na nona lagilagi.”
Eda nuitaka ka na masulaka vakagumatua tiko na veivinakati e vuravura, ia sa ka ni tamata yadua, na matavuvale meda rawata na vakacegu o ya ka yalataki tu ni na kauta mai na bula dodonu. Na veivinakati oqo e isolisoli mai vua na iVakabula ena Nona veivakalotutaki kei na veisorovaki.
Na vakacegu e sega walega ni veimaroroi se ni sega na ivalu, veivavala, veicati, veiqati se veisisivotaki. Na vakacegu e lako mai ni da kila ni sa kilai keda tiko na iVakabula ka kila ni da sa vakabauti Koya tiko, ka lomani Koya, ka maroroya tiko na Nona ivakaro, ena gauna sara mada ga ni veivakatovolei rarawa kei na leqa lelevu (raica na V&V 121:7–8).
“Meu gole tu kivei meu kunea na vakacegu? Evei na noqu itikotiko ni marau ni sa sega na ivurevure eso me vakataucokotaki au?” (“Meu Gole tu Kivei?” Sere ni Lotu, naba 71). Na isaunitaro na iVakabula, ni sai Koya na ivurevure ka itekitekivu ni vakacegu. O Koya na “Tui ni Sautu.” (Aisea 9:6).
Ni da yalomalumalumu e mata ni Kalou, ka masu ena veigauna, veivutunitaka noda ivalavala ca, ka sudra yani ki na wai ni papitaiso ena yalo raramusumusu kei na yalo bibivoro, ka yaco meda tisaipeli dina i Jisu Karisito sa ivakaraitaki bibi cecere ni ivalavala dodonu ka sa na saumi mai ena yalo vakacegu.
Na Lotu e vanua ni vakaruru ka ra na lako kina na vakamuri Karisito mera laki vakacegui. Eso na itabagone era kaya ni ra sa bula tiko vakayalo ka sega ni bula vakalotu. Ni sa tiko na bula vakayalo sa imatai ni ikalawa vinaka o ya. Ia, ena loma ga ni Lotu eda sa na vakaitokanitaki kina, vakavulici, ka susugi cake ena vinaka ni vosa ni Kalou. Ka kena bibi duadua, o ya ni lewa ni matabete ena loma ni Lotu sa na vakarautaka na cakacaka tabu vakalotu kei na veiyalayalati ena vauca vata na matavuvale ka soli na dodonu vei keda yadua meda lesu rawa vua na Kalou kei Jisu Karisito ki na matanitu silesitieli. Na cakacaka vakalotu oqo ena kauta mai na vakacegu baleta ni ra veiyalayalati era vakayacori vata kei na Turaga.
E levu vei ira na cakacaka vakalotu oqo e caka tiko ena valetabu ka ra sa itakataka ni vakacegu mai vei vuravura. O ira era gole ki na itikotiko ni valetabu se tiko ena siga ni kena dolavi raraba na valetabu era na vakila talega na vakacegu oqo.
Na iVakabula sa ivurevure ni vakacegu dina. Ena dredre mada ga ni veivakatovolei ni bula oqo, ena rawati ga na noda dui vakacegu ni da bula dodonu tiko, ena vuku ni Veisorovaki ni iVakabula kei na Nona loloma soliwale (raica na Joni 14:26–27; 16:33).