Etop eke First Presidency, Ofiong Inang ke isua 2017
Edinen-owo Edida Mbuotidem Odu Uwem
Andikpeb ye Andinam Otong
Odu akani nke-mbuk eke mme Jew kabanga anam otong emi mikenimke Abasi ke akpaniko. Usen kiet nte enye akasangade ye andikpeb kiet, enye odoho ete, “Odu nkpo kiet eke ami mikemeke ndifiok. Nnyin ima inyene edu-ukpono ke mme tosin isua. Edi ke kpukpru ebiet eke afo esede, idiok, nnwo, unana-akpaniko, ufik, ubiak, biong, ye afai ke odudu. Ebiet ete ke edu-ukpono inwamke ererimbot ndifon ndomokiet. Ntem ami mbup fi nte, nso ufon ke emi edi?”
Andikpeb oro ikoboroke ke esisit ini edi ke akaka-iso ndisanga ye anam otong emi. Ke akpatre mmo esanga edikpere itie-mbre emi ndito-nwong, eyohode ye ntong, ke ebre-mbre ke mbat.
Andikpeb oro odoho ete, “Odu nkpo kiet eke ami mifiokke,” “Se ndito-nwong emi. Nnyin ima inyene otong ke mme tosin isua, edi ndito-nwong oro ke ededehe. Nso ufon ke otong anam?
Anam otong oboro ete, “Andikpeb, ifonke ndibiom otong ikpe oto ke mbat ndito-nwong emi.” Ana nte eda otong enam-nkpo mbemiso enye ekeme ndinam utom esie ofon.”
Andikpeb atuak inua-imam onyung odoho ete, “Edi ntre.”
Didie ke Nnyin Ididu Uwem?
Apostle Paul, ke nditing ke iko prophet eke Akani Testament kiet, ke ibio-ibio iko owut se oworo ndidi andinim-ke-akpaniko kini enye ewetde ete, “Edinen owo edida mbuotidem odu uwem” (Nwed Mbon Rome 1:17).
Ndusuk ke ekpri udim iko emi nnyin imefiok ukpuhore ke edu-ukpono emi mifonke onyung anana-odudu ye edu-ukpono emi enyenede odudu ke ndikpuho uwem eke mme owo.
Edi ke ndifok se oworo ndida mbuotidem ndu uwem, ana nnyin ifiok se mbuotidem edi.
Mbuotidem okpon-akan ndinim-ke-akpaniko. Edi oyoho idorenyin ke Abasi emi asangade ye utom.
Okpon-akan ndidua-duak.
Okpon-akan ndisusuk ntie kpot, ntop-ibuot, nnyung ndoho ete nnyin imenyime. Ini eke nnyin idohode ete, “edinen owo edida mbuotidem odu uwem“ nnyin iwut ete ke nnyin imebo ukpeme ye ndausung oto ke mbuotidem nnyin. Nnyin inam-nkpo ke usung emi ekemde ye mbuotidem nnyin—idige ke ifiok unana-ekikere nkop-item edi oto ke osongo ye akwa ima nno Abasi nnyin ye ke nsongurua ifiok emi Enye akayarare ono ndito Esie.
Mbuotidem enyene ndisanga ye utom; midige-ntre enye inyeneke uwem (kese Nwed James 2:17). Idige mbuotidem ke oro edi. Inyeneke odudu ndikpuho ndomo-owo kiet, mme ndikpuho ofuri ererimbot.
Irenowo ye iban mbuotidem enim Ete mmo ke Enyong emi oyohode ye mbom ke akpaniko—kpang ke mme ini unana-idorenyin, ke ini eyihe ye ukut emi mmo mitimke ikut ofon mme nditim mfiok ofon.
Irenowo ye iban mbuotidem esanga mfon-mfon ke usung owo-mbet enyung edomo nditiene uwutnkpo eke edima Andinyanga mmo, Jesus Christ. Mbuotidem ke editim-nting, onono nnyin eti-udong, ye, eti-ekikere ndiwongore esit nnyin nse heaven nnyung ntim nsin-unwam, mmenere, nnyung ndiong mbonowo nnyin efen.
Edu-ukpono eke minyeneke utom ebiet otong emi esinede ke efok. Ekeme ndinyene odudu, edi ke akpaniko, otong oro enyene ekpri odudu ndinam ukpuhore-nkpo tutu enye edinam-utom emi ekenimde enye ono okure. Mfiak-nda-ndi ikpo Abasi Jesus Christ edi iko Abasi eke utom. Ufok Abasi Jesus Christ ekpeb eti edu-ukpono nte etop eke idorenyin, mbuotidem, ye ata-ima, ke esit edide ndinwam mbon-efen ke ikpokidem ye ke ukpong.
Esisit mme ofiong emi ekebede, ami ye nnwan-ndo mi, Harriet ikeke-isang nte ufokemana ye ubak ndito nnyin ke ebiet Mediterranea. Nnyin ima ikese usuk ebiet emi mbon esenidut edude inyung isobo ye ufokemana emi etode mme idut emi ekong anwanade. Mme owo emi ikedige mbon ido-ukpono nnyin, edi mmo ekedi ndito-eka irenowo ye iban ndien mmo enengere eyom unwam. Esit nnyin ama obungore kini nnyin ikutde nte utom mbuotidem eke mbon ufok Abasi adade unwam, uboho, ye idorenyin osok mbon-owo nnyin efen emi edude ke unana, idaha-ise edu-ukpono, idut, mme ndaha-uwem mmo.
Mbuotidem emi asangade ye nti utom oyoho esit ye mfonido, oyoho ekikere ye eti-ibuot ye ifiok, onyung oyoho ukpong ye emem ye ima.
Mbuotidem nnyin ekeme ndidiong onyung ono nnyin ye mbonowo emi ekanare nnyin ekuk nti-odudu.
Mbuotidem nnyin ekeme ndida nti-nkpo ye emem nsin ke ererimbot.
Mbuotidem nnyin ekeme ndikabare usua nsin ke ima ye owo-usau nsin ke ufan.
Edinen owo, ndien, odu uwem oto ke ndinam utom ke mbuotidem; mmo edu uwem ke ndinim Abasi ke akpanio nnyung nsanga ke usung Esie.
Ndien oro edi oruk mbuotidem emi ekemede ndikpuhore mme owo, ufokemana, idut, ye ererimbot.
© 2017 eketode Intellectual Reserve Inc. Ekpan kpukpru unen ndiming nwed emi. Ekeming ke USA. Enyime edikabare ke Iko Mbakara: 6/16. Enyimme Ndikabare: 6/16. Edikabare Etop eke First Presidency Message, April 2017. Efik. 97924 553