Stap Tingting long Jisas
Hem we i raetem hemia i stap long Kalifonia, YSA.
Mia i glad tumas. !Hem i fas taem blong hem long jos! Ol misinari oli tokbaot jos ia long famli blong hem. Oli disaed blong oli kam.
Mia i lukluk raon. Hem i luk wan waet klos antap long wan tebol. I gat wan samting andanit long hem.
“?I gat wanem andanit long klos ia?” Mia i askem long wan long ol misinari.
Sista Hanson i smael. “Hem i sakramen.”
Sakramen. Hemia wan bigfala toktok. Mia i bin harem ol misinari oli talem Mama mo Papa long saed blong samting ia. Be hem i no save stret se hem i wanem.
Evriwan i singsing long wan singsing. Tufala man i leftemap waet klos ia. !Ol trei blong bred oli stap andanit long hem! Mia i lukluk olgeta; oli brebrekem bred smolsmol.
Afta long singsing, wan man i talem wan prea. Ol narafala man oli pasem bred long evriwan.
“Bred ia i helpem yumi blong tingbaot bodi blong Jisas,” Sista Garcia i talem slo.
Mia i tekem wan pis bred. Hem i luk long maen blong hem we Jisas i stanap long fored blong hem.
Afta, i gat wan nara prea. Ol man ia oli pasem ol trei we oli gat ol smolsmol kap wota insaed long olgeta.
“Wota ia i helpem yumi blong tingbaot blad blong Jisas,” Sista Garcia i talem slo. “Hem i ded from yumi, from Hem i lavem yumi.”
Mia i tekem wan kap wota. Hem i tingting long hamas Jisas i lavem hem. Hem i filim se Jisas i stap givim hem wan bigfala hag.
Afta long hemia, Sista Hanson i givim wan smol pikja blong Jisas long Mia. “Yumi kakae bred mo wota blong tingbaot Jisas mo promes we yumi mekem blong folem Hem.” Hem i smael. “?Wanem tingting blong yu long saed blong sakramen?”
Mia i lukluk i go long pikja blong Jisas. Hem i tingbaot gudfala filing we hem i bin gat. Hem i smael. “!Hem i gud tumas! Mi lavem Jisas.”