iTabagone
Masulaka na Vakacegu
E vakaitikotiko na dauvolaivola mai Arizona, Amerika.
Dau wasoma ni rau dau bose na noqu itubutubu ni suka na lotu, kau dau vakatawani iratou na ganequ gone le tolu ka vukei iratou ena caka ivakasigalevu—dina ga ni dau totolo nodratou cudru kei na viakana. E vakavuqa kevaka eratou sa tekivu veivala, dau rawa ni totolo noqu walia na leqa lalai e yaco. Ia ena so na gauna dau dredre na veisaututaki ni sa tekivu na veivala baleta niu sa na tekivu cudru mai.
Ena dua na yakavi, a dredre sara toka nodratou veimaliwai na ganequ. Au raica ni sa qai ca vakalevu cake ena noqu tovolea meu veisaututaki baleta niu sa cudru tiko. Au sa mani cakava ga na kequ ivakasigalevu ka sega ni vosa. Oti, au qai kaya, “Au sa na masu. E rawa ni tou vagagalu mada ena dua na miniti?” Ni ratou dabe ga, au sa vakalougatataka sara na kakana. Ni bera niu tinia na masu, au vakuria ka kaya, Yalovinaka ni vukei keitou me keitou dau veisaututaki.”
Taumada, e vaka me ratou sega ni rogoca ka tekivu veivala tale. Au a cudru ia au kila ni dodonu meu loloma ka yalovinaka baleta niu se qai masuta ga me yaco na tikosautu. Ni oti ga e dua na miniti, sa ruru sara na yaloqu. Au kana ga ka sega ni tukuna e dua na ka, sa qai oti mai nodratou veivala na tagane. Au vakila ni vakacegu au vakila e isau ni dua na masu rawarawa. Au a masuta meu dauveisaututaki, ka vukei au na Tamaqu Vakalomalagi me ruru tu na yaloqu ena gauna au temaki kina meu kaila. Au kila ni rawa ni solia vei keda o Koya na sautu.