Mesazhi i Vizitave Mësimore, Janar 2017
Qëllimi i Shoqatës së Ndihmës
Studiojeni këtë material me lutje dhe kërkoni frymëzim për të ditur se çfarë të thoni.
Besim, Familje, Ndihmë
Qëllimi i Shoqatës së Ndihmës është t’i “përgatitë gratë për bekimet e jetës së përjetshme”, thotë Linda K. Barton, Presidente e Përgjithshme e Shoqatës së Ndihmës.1 Pikërisht nëpërmjet besimit, familjes dhe ndihmës ne përfshihemi në “pjesën [tonë] jetësore në vepër”2.
Shoqata e Ndihmës “është një punë tokësore dhe shpirtërore”, thotë Karol M. Stivens, Këshilltare e Parë në Presidencën e Përgjithshme të Shoqatës së Ndihmës. “Kjo punë është ajo që gratë bënë në kohën e Shpëtimtarit, dhe është ajo që ne vazhdojmë të bëjmë.”3
Teksa e hedhim vështrimin te gruaja samaritane te pusi, e cila e la kovën e saj dhe vrapoi t’u thoshte të tjerëve se Jezusi ishte profet (shih Gjoni 4:6–42), ose te Feba, e cila u shërbeu me gëzim të tjerëve gjatë gjithë jetës së saj (shih Romakëve 16:1–2), ne shohim shembuj të grave në kohën e Shpëtimtarit, të cilat morën pjesë aktive në ardhjen te Krishti. Është Ai që e hap udhën tonë drejt jetës së përjetshme (shih Gjoni 3:16).
Teksa e hedhim vështrimin te motrat tona pioniere në Nauvu në Ilinois, të cilat u mblodhën në shtëpinë e Sara Kimballit në vitin 1842 për të formuar vetë organizatën e tyre, ne shohim planin e Perëndisë për ta krijuar Shoqatën e Ndihmës dhe për ta vënë në përputhje me parimet e priftërisë. Pasi Eliza R. Snou shkroi një kushtetutë, Profeti Jozef Smith e shqyrtoi atë. Ai e kuptoi se Kisha nuk ishte e organizuar plotësisht derisa gratë të ishin organizuar. Ai tha se Zoti e pranoi ofertën e tyre, por se kishte diçka më të mirë. “Unë do t’i organizoj gratë nën priftërinë, sipas modelit të priftërisë”, tha ai.4
“Shoqata e Ndihmës nuk ishte thjesht një tjetër grup grash që po përpiqeshin të bënin mirë në botë. Ishte e ndryshme. Ishte ‘diçka më [e] mirë’ sepse u organizua nën autoritetin e priftërisë. Organizimi i saj ishte një hap i domosdoshëm në shpalosjen e veprës së Perëndisë në tokë.”5
Shkrime të Shenjta dhe Informacion i Mëtejshëm
Doktrina e Besëlidhje 25:2–3, 10; 88:73; reliefsociety.lds.org
© 2017 nga Intellectual Reserve, Inc. I rezervohen të gjitha të drejtat. Shtypur në Gjermani. Miratuar për anglisht: 6/16. Miratuar për përkthim: 6/16. Përkthim i Visiting Teaching Message, January 2017. Albanian. 97921 101
Merreni Parasysh Këtë
Në ç’mënyrë Shoqata e Ndihmës i ndihmon gratë ta përmbushin rolin hyjnor të Atit Qiellor për to dhe i udhëheq drejt jetës së përjetshme?