Tokoni e Kau Palōfitá mo e Kau ʻAposetoló
Hokohoko atu pē tokoni e kau palōfitá mo e kau ʻaposetoló he funga ʻo e māmaní (vakai, T&F 107:23). Ko ha kiʻi fakamatala nounou ʻeni ki ha niʻihi ʻo ʻenau ngaahi ngāue ne fakahoko talu mei he konifelenisi lahi fakamuimuitahá:
Ne fai ʻe Palesiteni Dieter F. Uchtdorf, Tokoni Ua ʻi he Kau Palesitenisī ʻUluakí, ha ʻaʻah ʻi Mē 2016, ke fai ha fakalotolahi ki he kāingalotu ʻi he ngaahi kolo ne toki hoko ai hono ʻohofi fakatautoitoi ʻi ʻIngilani, Falanisē, pea mo Pelisiumé. Naʻá ne ʻaʻahi foki ki he kau kumihūfangá, ʻaʻahi ki he tuʻuʻanga ʻo e Temipale Pālesi Falaniseé (kuo mei ʻosi hono langá), peá ne kau atu ki hono fokotuʻu ʻo e fuofua siteiki ʻi he Lepupelika Sekí. Naʻá ne folau ʻi Siulai ki ʻĪtali, ʻo foaki ha sieke $3 miliona mei he Siasí ke tokoni ki he kau kumi-hūfangá mo ʻaʻahi ki he fanga kiʻi ʻapitanga kumi-hūfanga ʻi Kalisí. Naʻá ne ʻaʻahi ʻi Sepitema ki he kāingalotu ʻo Lomēniá, Molotova, Silovākiá, Noaué, pea mo Siamané, ʻo ne fakatapui ai ʻa e Temipale Falaepeki Siamané. Naʻá ne pehē ʻoku ʻomi ʻe he ongoongoleleí ha ʻamanaki lelei ki he kakai he feituʻu kotoa pē ʻoku nau ʻi aí, pea ʻoku ʻi ai e “ongoʻi fakatokoua moʻoni ʻi he Siasí” ʻi he feohi ʻa e kāingalotú.
Naʻe tokangaʻi foki ʻe ʻEletā M. Russell Ballard ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e konifelenisi ʻa e Siteiki Mosikou Lūsiá naʻe fai ʻi Suné, kae fakataha mai e ngaahi siteiki kehé ki Salatova mo Seni Pitasipeeki, Lūsia. Naʻá ne fakataha foki mo e kāingalotu ʻi Lativia, ʻEsitōniá, pea mo ʻIukuleiní.
ʻI ʻIngilani ʻi Sune, naʻe lea ai ʻa ʻEletā Dallin H. Oaks ʻo e Kōlomu ʻo e Kau ʻAposetolo ʻe Toko Hongofulu Mā Uá ki he kau mēmipa ʻo e Falealea Pilitāniá ʻoku hanga ʻe he tauʻatāina fakalotú ʻo fakaʻatā e ngaahi siasí ke nau fai lelei he funga ʻo e māmaní. Naʻá ne pehē, “ʻOku mau fakaʻamu ke maʻu e ngaahi tāpuaki ʻo e tauʻatāina fakalotú ʻe he kakai kotoa ʻo e palanite ko ʻení, ka ʻoku mau kei tōnounou hono fai ia he taimí ni.”
ʻI ha konifelenisi fekauʻaki mo e fakatangaʻi ʻo e tui fakalotú pea mo hono tuli fakamālohiʻi ʻo e kakaí ke nau hikifonuá, naʻe fai ʻi he Kāsolo Uinisoá, ʻi ʻIngilani ʻi Sepitema, naʻe pehē ai ʻe ʻEletā Jeffrey R. Holland ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻoku lahi ha meʻa ke ako mei he aʻusia ʻa e kau fuofua paionia ʻo e Siasí ʻe lava ʻo tokoni ki he kau kumi-hūfanga ʻi onopōní ke nau matuʻuaki honau ngaahi tūkungá. Naʻá ne pehē, “Kapau ʻe malava, ʻoku totonu ke tau tokoni mo paotoloaki e ngaahi tupuʻanga ʻo e kau kumi-hūfangá pea fakaʻilongaʻi e ngaahi talanoa mei honau kuohilí.”
Naʻe hanga ʻe ʻEletā David A. Bednar, ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo fakaafeʻi e kāingalotu, kau faifekau mo e kau taki ʻi Sipeini, kau ai mo e ʻOtu Motu Kanalí, pea mo Potukali, ke nau fakalotolahiʻi e niʻihi ʻoku māmālohí ke nau foki mai ʻo mālohi kakato ʻi he Siasí.
ʻI hono fakangofua kakato ko ia ʻe Vietinemi e Siasí pea tali fakaʻofisiale ʻi Suné, naʻe fakataha ai ʻa ʻEletā Quentin L. Cook pea mo ʻEletā Gary E. Stevenson, mei he Kōlomu ʻo e Kau ʻAposetolo ʻe Toko Hongofulu Mā Uá, mo ha kau fakafofonga mei he puleʻangá ke aleaʻi e hisitōlia mo e fakalakalaka ʻa e Siasí. Ne nau aleaʻi foki mo e founga ʻe lava ke tokoni ai e Siasí he ngaahi ngāue fakasosiale mo tokoni ʻofá pea tokoniʻi ʻa e masivá mo kinautolu ʻoku faingataʻaʻiá. Ne na toe tokangaʻi foki ai mo ha ngaahi fakataha ʻi Kuamu, Maikolonīsia, pea mo Siapani.
ʻI Suné foki ne faitāpuekina ai e kakai ʻi Pilisipeini, ʻAositelēliá, pea mo e ʻOtu Motu Kukí ʻi ha ʻaʻahi meia ʻEletā Neil L. Andersen ʻo e Kōlomu ʻo e Kau ʻAposetolo ʻe Toko Hongofulu Mā Uá. Naʻe ʻaʻahi foki ʻa ʻEletā ʻEnitasoni ki he motu ko Lalotongá pea ko ia e fuofua ʻAposetolo ke ʻaʻahi ki he Motu ko Mangaiá.
Naʻe hanga ʻe ʻEletā Ronald A. Rasband ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi Kolomupia, Pelū, pea mo ʻEkuatoa ʻi Sune, ʻo liliu e taimitēpile ʻo ʻene ʻaʻahí ke ne siʻi aʻu ki he niʻihi ʻoku siʻi kei fakaakeake mei he mofuike lahi ne toó. Naʻá ne vahevahe ha pōpoaki ʻofa meia Palesiteni Tōmasi S. Monisoni peá ne fakapapauʻi ange ki he kāingalotu ne tofanga he mofuiké, ʻoku ʻikai siʻi ngalo kinautolu.
ʻI ʻAokosi, naʻe hanga ai ʻe ʻEletā Quentin L. Cook ʻi Kuatemala ʻo fakaʻilongaʻi e tupulaki lelei ʻa e fekumi ki he hisitōlia fakafāmilí pea mo e ngāue fakatemipalé peá ne pehē ko hano fakahaaʻi ia e tui ʻa e kāingalotú.
ʻI hono talitali lelei ʻa ʻEna ʻAfifió ko e tuʻi mo e kuini ʻo Tongá ki he Senitā ʻa e Siasí ki he Tala Fakafonua ʻo Polinisiá ʻi Hauaiʻi, USA, ʻi he māhina ko Suné, naʻe fai ai ʻe ʻEletā Dale G. Renlund ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e lea fakafeʻiloakí ʻo fekauʻaki mo e mahuʻinga ʻo e fehokotaki fakafāmilí.
ʻI Luisiana, USA, naʻe ʻaʻahi ai ʻa Palesiteni Russell M. Nelson, ko e Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá pea mo ʻEletā M. Russell Ballard, ki he niʻihi ne maʻutangī ʻe he tāfeá, lolotonga e tokoni ʻa e Ngaahi Nima Fietokoni ʻo e Māmongá, ke fakamaʻa e ngaahi ʻapi ne maumaú ʻi ʻAokosi mo Sepitema. Naʻe fakatokangaʻi foki ʻe ʻEletā Pālati naʻe feʻunga mo ha kau ngāue tokoni ʻe 11,000 tupu mei ha ngaahi siteiki ʻe 13.
Pea ʻi Sepitemá, lolotonga e fakataha lotu fakaemāmani lahi maʻá e kakai lalahi kei talavoú naʻe fai ʻi Uāsingatoni, D.C., USA, naʻe pehē ai ʻe ʻEletā Kuki, “ʻOku ʻikai totonu ke tau ilifia, neongo ʻoku tau ʻi ha māmani fakatuʻutāmaki mo puputuʻu.” Naʻá ne naʻinaʻi ki he kakai lalahi kei talavoú ke nau fokotuʻu ha ngaahi taumuʻa māʻoniʻoni pea palani ke lavaʻi kinautolu, pea ʻoua te nau taʻetokaʻi honau ngaahi talēnití, kae pehē ki he ngaahi meʻa te nau lavá. Naʻá ne fakalotolahiʻi foki kinautolu ke nau toe vakavakaiʻi ʻenau fakaʻaongaʻi ʻa e mītia fakasōsialé. Naʻá ne pehē, “ʻOku tau fanongoa ha meʻa lahi fekauʻaki mo e fie maʻu ke tau anga totonu ʻi he mītia fakasōsialé, kae mahuʻinga angé, ke tau anga faka-Kalaisi moʻoni.”
ʻE lava ke maʻu e fakamatala fakamuimuitaha ki he ngaahi ngāue fakalotu ʻa e kau taki ko ʻeni ʻo e Siasí mei heʻenau ngaahi peesi Facebook pea mo e prophets.lds.org.