Iren Mahsen en Presidensi Keieu, Oaktohpe 2016
Kapai kan en Peik
Sang President Thomas S. Monson
”Kaweid keieu kesempwal me kitail kak wehwehkihla nan mour wet,” President Thomas S. Monson padahngki, “iei me ni ansou me Koht kin ketin mahsen oh kitail peikieng, kitail pahn kin pwung ansou koaros.”1
Kitail pil pahn kapaida. Nin duwen me President Monson mahsanih nan ehu tiepene lap me ahpwten wiawi: “Ni atail kin kolokol kosonned akan, atail mour kan pahn inenen peren, kepweipweila mehlel, oh sohte nohn apwal. Atail kasongosong kan oh kahpwal akan pahn mengein epwella, oh kitail pahn alehdi [Sapwellimen Koht] kapai kan me mie inoupe.”2
Nan kisin ire kan me mie pah me sang sapwellimen President Monson padahk kan ni eh wia President en Mwomwohdiso, e kin kataman ong kitail me kosonned kan iei kaweid keieu mehlel ong popohl oh meleilei.
Iren kaweid kan ong Seiloako
”Sapwellimen Koht kosonned akan sohte kodohng kitail pwehn wia kaluwetpatail de en wia mehn kerempwa kei ong atail peren. Me weksango iei me mehlel. Ih me ketin kapikitaildahro oh me inenen poakohng kitailo mwahngi douluhl duwen atail anahne momourki atail mour kan pwe kitail en alehdi peren keieu laud me mie. E ketikidohng kitailehr kaweid kan me, ma kitail idawehn, e pahn kahlua kitail mwahu nan seiloak keper en nan mour wet. Kitail tamataman koasoai kan en melkahka kitail wehwehkio: Kolokol Kosonned kan! Nan met mie perehre; nan met mie popohl [kilang “Keep the Commandments,” Hymns, nempe. 303].”3
Kehlail oh Marain
”Peik iei kasalepen soukohp akan; e kamangaiadahr kehl oh marain ong irail nan dihen aramas ngeder. E kesempwal ong kitail en wehwehki me kitail, pil iang, ahniki pwuhng ong kaweid en kehl oh marain wet. E kaunopadahr ong emen emen kitail rahn wet ni atail pahn peikiong Sapwellimen Koht kosonned akan. …
Marain me kitail kin raparapahkio, pasapeng kan me kitail kin kasikasiko, oh kehl me kitail inangih rahn wet pwehn powehdi kahpwal akan en sampah me apwal oh wekiwekidek kak wiahla atail ni ansou me kitail inengieng peikiong Sapwellimen Kauno kosonned akan.4
Pilada ken Peikieng
“Weweid en atail ansou kan iei saledek. Makasihn kan oh kilel kan nan television kin kasalehda aramas en nan kasdo kan, soun mwadong wad akan—irail kan me kidelepen aramas pwulopwul kin men alasang—pohnsesehla kosonned akan en Koht oh kasakasale wiewia dipan akan, mwomwen me e sohte pahn ohkihla. Kumwail sohte kamehlele! Mie ehu ansoun kapat—oh pil kainenpen pwuhk en rekohto. Emen emen Cinderella mie ah lukepenpwong—ma kaidehn nan mour wet, a nan mour mwurin met. Rahn en Kopwung pahn lelodohng koaruhsie. … I peki kumwail en kin pilada peik.”5
Popohl oh Meleilei
“E kak sansal ong kumwail nan ansou kan me irail kan me wie wangawangseli nan sampah aiahniki peren laud sang kumwail. Ekei kumwail kak pehm me kumwail irairdi sang ni kosondien wiewia me kitail nan Mwomwohdiso wet kin mouriki. Riei ohl akan oh lih akan, I kalohkihong kumwail, me sohte mwahn mehkot me kak wahdo peren kouahlap nan atail mour kan de meleilei laud ong ngenitail kan laudsang Ngehno me kak pwarodo rehtail ni atail kin idawehn Sounkomouro oh kapwaiada kosonned akan.6
Alu Inenda
”I kadehdehieng kumwail me atail kapai kan me inouparail mieher inenen kouahlap mehlel. Tehn depwek kan en kotou kak kohpene, tehn kotou kan kak mweredieng pohtail, atail marainiki rongamwahuo oh atail poakohng Samatailo Nanleng oh atail Sounkomouro pahn kansenamwahuih oh kolokol kitail oh ketikidohng mohngiongitail kan popohl ni atail kin alu inenda oh kolokol kosonned akan. Sohte mehkot pahn mie nan sampah me kak kaleweikitaildi.”7
Idawehn Sounkomouro
Ihs Ohl menet me mwahngih duwen nsensuwed kan oh pahtou? Ihs me wia Nahnmwarki en lingan, Kaun en karis akan? Ih iei atail Mwohnsapw. Ih iei atail Sounkomour. Ih iei Sapwellimen Koht. Ih me wia Sounkepikipik en atail Komour. E ketin poahngokih,‘Idawehniehdo’. E kin ketin kaweidki, ‘Kohwei, oh kumwail wia duwehte.’ E kin ketin peki, ‘Peikieng ahi kosonned akan.’
Kitail idawehn Ih. Kitail alasang Sapwellime karasaras. Kitail peikiong Sapwellime mahsen. Ni atail pahn wia met, kitail pahn patohwanohng Ih kisakis sarawi en kaping kalahngan.8
© 2016 by Intellectual Reserve, Inc. All rights reserved. Ntingdahr nan USA. Kamanaman ong lokaiahn wai: 6/16. Kamanaman ong kawehwe: 6/16. Kawehwehpen First Presidency Message, October 2016. Pohnpeian. 12870 885
Padahk sang ni Mahsen Wet
President Monson kin kasukuhliekin kitail duwen kidalap en kapai kan me kitail kak alehdi sang ni peik, iangahki kehlail, marain, peren, oh meleilei. Taman oh idek rehn irail kan me ke kin padahkih duwen arail kapaida sang arail kin kolokol kosonned akan. Ke anahne kangonge irail ren pepeusehlahte arail tamataman kapai kan oh ntingiedi arail madamadu kan oh soahng kan me re esehier nan ehu pwuhk. Ke pil kak kangongeirail en kasalehda arail kaping ong Koht pwehki arail kapai kan me sang arail kin pepeusehlahte arail peik.