Me Pwulopwul Kan

Kolokol Kosoned akan oh Poakohng Mehteikan

Ni ansou me kitail kin medewe limpoak, soahng kan me kin tepin kohdo nan moangetail iei kasdohn limpoak kan, sokolehd, oh wahnrohs kan. Ahpw limpoak—limpoak mehlel me inenen loal oh kin men sewese mehteikan sang soahng pwukat. Sises Krais ketdo oh pwoukinkitailla pwehki Sapwellime limpoak ong kitail. Ni mehlel, kosonned riau me keieu laud iei poakohng Koht oh poakohng mehteikan (tehk Madiu 22:36–40). Ahpw ia duwen atail kak kasalehiong mehteikan me kitail poakohng irail?

President Uchtdorf ehukiong kitail Sapwellimen Sises Krais karasaras me pid pwutak riemen, me emen doadoahk ong ah pahpao a emen soh. Sounkomouro ketin kasalehiong kitail me pwutak me peikiong ah pahpao me poakpoake ni mehlel. Duwehte, ni ansou me kitail kin peikiong Sapwellimen Koht kosonned akan, kitail kin kasalehda me kitail poakohng Ih oh men pwurala Reh.

Ahpw ia duwen atail kin kasalehda atail poakohng mehteikan? Presiden Uchtdorf pil kawewehda me: “Ma kitail poakohng mehlel mehteikan, kitail kin kaunopada pein kitail pwe kitail en sewese ‘me semwehmwe oh me mie arail anahn kan, me soumwahu oh me ahniki kahpwal en palinwar.’ Pwe irail kan me kin nsenohki oh wia mwekid kan en limpoak oh sawas pwukat, irail duwehte Sapwellimen Sises Krais tohnpadahk kan.”

Kahrehda ma ke pwurehng tuhong ahmw nohno oh pahpa, riemw, de kempoakepahmw, medewe duwen omw pahn seweseirail pwe ken kasalehiong irail ahmw poakohng irail. Kaidehnte e pahn kaperenihrailda de kowe, ahpw e pahn karehda Samatail Nanleng eh pil pahn ketin iang perenda.