Fakamālō Atu ʻi hono Fakafeʻiloaki Au ki he Ongoongoleleí
Scott Edgar, ʻIutā, USA
Tā fakatātaaʻi ʻe Stan Fellows
ʻI he konga kimuʻa ʻo e taʻu 1980 tupú, naʻe nofo hoku fāmilí ʻi Siamane Hihifo, pea naʻa mau mēmipa ʻi he Siteiki Ngāue Fakakautau Kaisasilauteni Siamané. ʻI he taimi ko iá, naʻe fakamamafaʻi ʻe he kau takí ʻa e ngāue fakafaifekaú. Naʻe talamai kiate kimautolu kuo tuku ʻe he ʻEikí ha niʻihi ʻo ʻEne fānau fakalaumālie kuo filí ʻa ia naʻa nau fekumi ki he ongoongolelei ʻo Sīsū Kalaisí ke hoko ko hamau kaungāmeʻa.
Naʻá ku tui mo hoku uaifi ko Sení ʻoku moʻoni ia. Naʻe poupouʻi kimautolu ʻe he kau takí ke mau takitaha feinga ke ʻiloʻi e niʻihi homau kaungāmeʻa naʻe ʻikai ke kau ki he Siasí ʻa ia naʻa mau pehē ʻe fie fanongo ki he ongoongoleleí. Naʻe pau ke mau lisi ha kakai ʻe toko 10 pea lotua mo ʻaukai leva ʻemau lisi homau kaungāmeʻá pea fakakaukauʻi pe ko hai te mau ʻuluaki fakaafeʻí. Naʻá ma fakakaukau ke fetuʻutaki ki ha ongo tangata naʻa mau ngāue fakataha ʻi hoku ʻōfisí. Naʻá ku tomuʻa fakalea ki ha talavou taautaha kei talavou ko Kulisi, ka naʻe ʻikai te ne tokanga mai he taimi ko iá. Naʻá ma fakakaukau leva te u fakalea kia Pulusi Hami, ko ha tangata lelei mo angaʻofa ʻoku ʻi ai hono fāmili ne kei iiki.
Ka naʻe ʻosi ha ngaahi ʻaho mei ai naʻá ku tailiili ke fakalea ki ai ʻo kau ki he ongoongoleleí. Naʻe faifai pea telefoni mai ʻa Seni ki he ngāué peá ne fehuʻi mai, “Kuó ke fakalea kia Pulusi?” Ne u pehē ange, “ʻIkai, ka ʻe vavé ni pē haʻaku fai ia.” Naʻá ne ʻeke mai leva pe ʻoku ʻi ʻōfisi ʻa Pulusi he ʻaho ko iá, peá u talaange ʻio. Naʻá ne pehē mai leva ʻi he taimi ko iá, “Sikoti, tuku e telefoní ki lalo. Te u talitali atu pē ka ke ʻalu ʻo talanoa ki ai!”
Ne u tuku e telefoní ki lalo peá u lue tailiili atu ʻo fehuʻi ange, “Pulusi, naʻá ke ʻilo koā ʻoku ou kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní?” Naʻá ne talamai ʻio; peá u pehē ange, “Te ke fie ʻilo lahi ange ki he Siasí?” Naʻá ne tali mai, “ʻIo, te u saiʻia ai.”
ʻI he ngaahi uike hono hokó, naʻe haʻu ʻa Pulusi, mo hono uaifi ko ʻElá mo ʻena tama fefine ko Tāniá ki homa ʻapí ke mau maʻumeʻatokoni efiafi mo feʻiloaki mo e ongo faifekaú. Naʻe akoʻi e lēsoní kiate kinautolu, naʻa nau maʻulotu mo kimaua, tali e ongoongoleleí, pea naʻe papitaiso kinautolu. Ko ha ʻaho nāunauʻia mo fakaʻofoʻofa pea fakafiefia ia. Naʻe houngaʻia ʻa Pulusi ʻi heʻema fakafeʻiloaki hono fāmilí ki he ongoongoleleí. Naʻe haʻu foki mo Kulisi, ʻa e talavou mei he ngāué, ki he papitaisó, pea naʻe ongo ia kiate ia. Naʻe fakafeʻiloaki ʻe Pulusi mo ʻEla ʻa e ongoongoleleí kia Kulisi kimui ange. ʻI heʻena fakafeohí, naʻe akoʻi ʻe he ongo faifekaú ʻa Kulisi pea naʻá ne kau mo ia ki he Siasí.