Parau Poro’i a te Peresidenira’a Mātāmua, Tiunu 2016

Tō tātou Metua, tō tātou a’o

Nā te peresideni Dieter F. Uchtdorf

Tauturu piti i roto i te Peresidenira’a Mātāmua

Hōho’a

Peresideni Dieter F. Uchtdorf

’Ua ’iriti a’enei ’outou i te hō’ē ’āfata ufatū (tuha’a ri’i na’ina’i), tātara mai i te ha’amāramarama nō te tū’ati’atira’a, ’a mana’o ai ē, « ’Aita roa’tu e aura’a » ?

I te tahi taime, noa atu ā tō tātou nei hina’aro mau ’e tō tātou ti’aturira’a i tō tātou ’aravihi, e tātara tātou i te tahi ufatū ma te ani, « Nō te aha rā ïa teie nei mea ? » ’aore rā « Nāhea rā ïa te reira e tano ai ? »

E ’ū’ana atu ā tō tātou ’ōminora’a ’ia ’ite atu tātou i ni’a i te ’āfata i te hō’ē parau ta’a ’ē ’o te nā ’ō mai ē, « Tītaura’a nō te tū’ati’ati—8 matahiti ’e ni’a atu ». ’E nō te mea ’aita tātou i ta’a noa a’e i teie ’ohipa, ’aita ato’a ïa te reira e ha’amara’a noa a’e i tō tātou ti’aturira’a ’aore rā tō tātou iho hoturoto (hi’o-fa’ahiahia-ra’a ia tatou iho).

I te tahi taime, e tupu te reira ’ohipa ’e te evanelia. ’Ia hi’o ana’e tātou i te tahi tuha’a, e ra’ura’u tātou i tō tātou upo’o nō te feruri i hea te reira e tano ai. ’Aore rā ’ia hi’opo’a ana’e tātou i te tahi atu tuha’a, e ’ite mai paha tātou ē, noa atu tō tātou tāmatara’a pūai ’ia hāro’aro’a, ’aita tātou e ta’a ra nō te aha ’ua tu’uhia mai te reira tuha’a.

’O tō tātou Metua i te Ao ra tō tātou a’o

’Aua’a rā, ’ua hōro’a mai tō tātou Metua i te Ao ra i te mau arata’ira’a fa’ahiahia nō te patu i tō tātou orara’a ’e nō te fa’atū’ati’ati i te maita’i roa a’e e vai ra i roto ia tātou. E manuia te reira mau arata’ira’a noa atu to tātou faito matahiti ’e te huru orara’a. ’Ua hōro’a mai ’Oia ia tātou i te evanelia ’e te ekalesia a Iesu Mesia. ’Ua hōro’a mai ’Oia ia tātou i te fa’anahora’a nō te ora, te fa’anahora’a nō te fa’aorara’a, ’oia ho’i te fa’anahora’a nō te ’oa’oa. ’Aita ’Oia i vaiiho ’ōtare noa ia tātou ’e te tā’āto’ara’a o te mau ’ārehurehu ’aore rā te mau ha’atāfifira’a o te orara’a, ma te parau ē, « Tera. ’A fa’aitoito. ’A feruri atu i te rave’a ».

Mai te mea e fa’aoroma’i ri’i noa tātou ma te ’ā’au haeha’a ’e te mana’o tae, e ’ite tātou ē, ’ua hōro’a mai te Atua ia tātou e rave rahi mau mauha’a nō te ’ite pāpū i te tā’āto’ara’a o Tāna mau arata’ira’a nō tō tātou ’oa’oa i roto i teie orara’a :

’Ua hōro’a mai ’Oia ia tātou i te hōro’a faufa’a rahi o te Vārua Maita’i, i reira te mana nō te riro mai ’ei a’o ta’a ’ē ’e te hanahana no te ta’ata hō’ē ’a tuatāpapa ai tatou i te parau a te Atua ’e ’a ’imi ai tātou ’ia fa’atuea i tō tātou mau mana’o ’e mau ’ohipa i ni’a i Tāna parau.
’Ua hōro’a mai ’Oia ia tātou i te uputa 24/7 (24 hora nō te 7 mahana) Iāna ra nā roto i te mau pure fa’aro’o ’e te mau fa’ateni mana’o pāpū.
’Ua hōro’a mai ’Oia ia tātou i te mau ’āpōsetolo nō teie mau tau ’āpī ’e tae noa atu i te mau peropheta, ’o te heheu mai i te parau a te Atua i teie mahana ’e ’o tei mau i te mana nō te ha’amau ’aore rā nō te tā’ati i ni’a i te fenua ’e i te ra’i.
’Ua fa’ati’a ’Oia i Tāna Ekalesia—hō’ē fa’anahora’a feiā fa’aro’o ’o te rave ’āmui i te ’ohipa nō te tauturu te tahi i te tahi ’a rohi ai nō tō rātou fa’aorara’a ma te mata’u, te rūrūta’ina ’e te ’oa’oa faito ’ore.¹
’Ua hōro’a mai ’Oia ia tātou i te mau pāpa’ira’a mo’a—’Oia Tāna mau parau pāpa’i ia tātou.
’Ua hōro’a mai ’Oia e rave rahi mau mauha’a uira ’āpī nō te tauturu ia tātou i roto i tō tātou tere ’ei pipi. E ’itehia e rave rahi o teie mau mauha’a fa’ahiahia i ni’a ia LDS.org.

Nō te aha tō tātou Metua i te Ao ra i hōro’a mai ai i teie mau tauturu e rave rahi ? Nō te mea ’ua here ’Oia ia tātou. ’E nō te mea, mai Tāna ihoa i parau Nōna iho ē, « ’O teie ho’i tā’u ’ohipa ’e tō’u hanahana ho’i, ’ia fa’atupu i te tāhuti ’ore ’e te ora mure ’ore o te ta’ata nei ».²

E nehenehe e parau ē, ’o te Metua i te Ao ra tō tātou Atua, ’e e a’o te Atua nō tātou.

’Ua ’ite tō tātou Metua i te Ao ra i te hina’aro o Tāna mau tamari’i hau atu i te tahi noa atu ta’ata ’ē. ’O Tāna ’ohipa ’e Tōna hanahana ’e tauturu ia tātou i te mau taime ato’a, ma te hōro’a ia tātou i te mau rāve’a fa’ahiahia i te pae tinō ’e i te pae vārua, nō te tauturu ia tātou i ni’a i te ’e’a nō te ho’i atu Ia’na ra.

E a’o te metua tāne tāta’itahi

I te tahi mau pae fenua, e fa’ahanahanahia te mau metua tāne i roto i te mau utuafare e te mau huira’atira i te ava’e nō tiunu. E mea au roa ’ia fa’ahanahana ’e ’ia fa’atura i tō tātou nau metua. E rave ho’i te mau metua tāne e rave rahi ’ohipa maitata’i nō tō rātou ’utuāfare ’e e rave rahi ho’i tō rātou huru fa’ahiahia. E piti ti’ara’a faufa’a roa a’e o te mau metua tāne i roto i te orara’a o tā rātou mau tamari’i, ’oia ho’i, te rirora’a ei hi’ora’a maita’i ’e ’ei a’o. ’Ua hau atu tā te mau metua tāne e rave i te parau-noa-ra’a i tā rātou mau tamari’i i te mea tano ’e te mea hape ; ’ua hau atu i te taora-noa-ra’a atu i te tahi buka arata’i ’a tia’i noa atu ai e feruri mai rātou i tō rātou orara’a.

E a’o te mau metua tāne i tā rātou mau tamari’i poihere ’e e fa’a’ite atu rātou nā roto i tō rātou hi’ora’a maitai i te ’e’a e ora ai i te hō’ē orara’a parau ti’a. E’ita te mau metua tāne e vaiiho ’ōtare noa i tā rātou mau tamari’i, e horo rā rātou nō te tauturu atu, ma te fa’ati’a mai ia rātou i te mau taime ato’a e marua rātou. I te tahi ato’a taime, ’ia ti’a i te pa’ari, e vaiiho te mau metua tāne i tā rātou mau tamari’i ia tāfifi ri’i, e riro ē, ’o te reira te rāve’a maita’i roa a’e nō rātou ’ia ha’api’i.

E a’o ana’e tātou pā’āto’a

’A nā reira noa ai te mau metua tāne tāhuti nō tā rātou iho mau tamari’i, e riro teie vārua a’o ta’ata ’ei mea e ti’a ’ia hōro’a i te tā’āto’ara’a o te mau tamari’i a te Atua, noa atu tō rātou matahiti, te vāhi fa’aeara’a ’aore rā te huru orara’a. ’A ha’amana’o ē, te mau tamari’i a te Atua, e mau taea’e ’e e mau tuahine ana’e nō tātou ; hō’ē ā tō tātou utuafare mure ’ore.

’E nō reira, ia riro ana’e tātou pā’āto’a ’ei a’o—ma te ’ana’anatae i te toro atu i te rima ia vētahi ’ē, nō te tauturu te tahi i te tahi ’ia ha’amatara i te maita’i roa a’e e vai ra i roto ia tātou. Nō te mea e hua’ai tātou nā te Atua, ’ua mau ia tātou te faito pūai nō te riro mai Ia’na ra te huru. Te herera’a i te Atua ’e i tō tātou ta’ata tupu, te ha’apa’oraa i tā te Atua mau fa’auera’a ’e te pe’eraa i te hi’ora’a o te Mesia, ’o te ’e’a ’āfaro ïa ’e te apiapi ’e te oaoa nō te ho’i i mua i te aro o tō tātou nau metua i te ra’i ra.

Mai te mea pa’i ē, te ha’ape’ape’a rahi nei te Atua nō tātou, ’e ’ua fa’ariro roa mai Iāna ’ei a’o nō tātou, peneia’e paha ïa e nehenehe ato’a tā tātou e toro atu i te rima i tō tātou ta’ata tupu, noa atu te huru o tō rātou ’iri, te toto, te orara’a sotiare ’e te pae faufa’a, te reo ’e ’aore rā te fa’aro’o. E riro ana’e ’ei mau a’o fa’auru ’e e ha’amaita’i ana’e i te orara’a o vetahi ê—’eiaha noa tā tātou mau tamari’i, te tā’āto’ara’a rā o te mau tamari’i a te Atua i ni’a i te fenua nei.

© 2016 na Intellectual Reserve, Inc. Fatura’a pāruruhia. Nene’ihia i te Mau Hau Amui nō Marite. Parau fa’ati’a nō te reo peretane : 6/15. Parau fa’ati’a nō te iritira’a : 6/15. Iritira’a nō First Presidency Message, June 2016. Tahitian. 12866 895

Ha’api’ira’a nō roto mai i teie parau poro’i

Peneia’e e nehenehe tā ’outou e ha’amata nā roto i te anira’a i te feiā tā ’outou e ha’api’i ra ’ia feruri i te hō’ē taime ’ua riro te Atua ’ei a’o nō rātou. ’Ei reira e ani atu ai ia rātou ’ia feruri i te mau tueara’a i roto i te reira taime ’e i te tahi atu taime ’ua ’ite rātou i tō rātou metua tāne i te tāhuti nei i te rirora’a ’ei a’o nō rātou. ’A ani manihini atu ia rātou ’ia pāpa’i i te reira mau tueara’a nō ni’a i te huru rātou i a’ohia ai. E nehenehe tā ’outou ’ia tu’u i te ’ōpuara’a ’ia tāmata ia rave i te ’ohipa tā rātou i pāpa’i ’ei tauto’ora’a ’ia riro mai ’ei hi’ora’a maita’i a’e nō vetahi ’ē.