Pweng sin Prestuhnsi Se Met, Jun 2016

Pahpah Tuhmasr, Mwet in Kahsruh Lasr

Sel Prestuhn Dieter F. Uchtdorf

Mwet in Kahsruh Ahkluo ke Prestuhnsi Se Met

Petsac

Prestuhn Dieter F. Uchtdorf

Kuh kom nuh wi ikacslah pohk in kuhfwen sroasr se uh, faeslah pwepuh in ahkuhtweyac ahkohnkohn kac an, ac nuhnkuh angwe, “Ma se inge tiac kahlwem na pwacye”?

Kuhtuh pacl uh, kuht ne srihke in wo ac nuhnkuh ma wo kac, kuht e eslah sie ip kac ac siyuck, “Mwe meac ma se ingacn? kuh “Ac ahknoeyucki fuhkah?”

Fohsack lasr uh ac yohkwelihk ke kuht liye pohk sac ac akihlenwack pwepuh se ma fahk lah, “Ahkohnkohn kac uh enenuh—matwac yac 8 ac nuh lucng.” Ke srihpen kuht srack tiac kahlwem kac, ma inge tiacna ahkkweye nuhnak lasr kuh etwacack lasr uh.

Kuhtuh pacl uh kuht puhla oacpacna ke wosasuc uh. Ke kuht liye kuhtuh ip kac uh, kuht e sahp fohsack kac ac suk lah ma nuh yac kac ip inge. Kuh ke kuht lohacng ke ip sahyac uh, kuht e kuh in akihlen lah finne tukun kuht arlac srihke in kahlwem kac uh, kuht koflah na in akihlen lah efuh ip sacn tuh wi.

Pahpah Tuhmasr Pa Mwet in Kahsruh Lasr

Wo ohiyac, Pahpah tuhmasr Inkuhsrao El acse nuh sesr mwe ahkuhtweyac na wowo in muhsaheack moul lasr ac in falseni nuh sie luhman sie mwet wowo. Mwe ahkuhtweyac ingacn orekma tiac suk ke matwacsr kuh ohiyac. El acse nuh sesr wosasuc uh ac Alu luhn Jisus Kraist. El acse plwacn in iwaclah, plwacn in molwelah, finne plwacn in engan. El tiac fihlikuhtlac in muhkwelac ke kwewana ma kuht tahfuhluo kac kuh upac luhn moul, fahk angwe, “Pa inge som. Wo ohiyac. Motkoelah.”

Fin kuht mongfihsrwacsr ac ngwet ke inse puhsisacl ac ikacslah insiyacsr, kuht fah konwacack lah God El use nuh sesr kohkoh pucspucs in sang kahsruh akihlen mwe ahkuhtweyac na kahlwem Lal nuh ke moul in engan in moul lasr uh:

El acse nuh sesr mwe sang sacohk ke Nguhn Muhtahl, suc ma kuh na in pa mwe ahkwoye, ma tuhkuh lucng me ke kuht lutlut ke kahs luhn God ac srihke in kohllah nuhnak ac mukwikwi lasr in fal nuh ke kahs Lal uh.
El use nuh sesr penga na lwen in kuhpahsr nuh Sel ke pruhe ke luhlahlfongi ac ke inse pwacye.
El use nuh sesr mwet sap ac mwet pahluh in pacl inge, suc ahkkahlwemye kahs luhn God in lwen lasr uh ac wal kihn kuh se ma in kapsrwacni kuh siliyac ma fin facluh ac inkuhsrao uh.
El fohlohkohnwack Alu Lal—sie akwuck luhn mwet luhlahlfongi suc toeni orekma in kahsruh sie sin sie ke elos oruh orekma in molwelah lalos ke sahngweng, rarrar, ac engan koflah na in srihkasrak uh.¹
El use nuh sesr ma suhmuhslah muhtahl uh—kahs sihmlac Lal nuh sesr.
El use nuh sesr kuhfwen sroasr na pucspucs in kahsrwe kuht ke fuhfahsryucsr ke moul in srihke lasr uh. Puhs na sin kuhfa inge kuh in sukokyak ke LDS.org.

Efuh kuh Pahpah tuhmasr Inkuhsrao El use nuh sesr kahsruh na yohk? Mweyen El luhngse kuht. Ac ke srihpen, El fahk lah orekma lal ac wolacna lal pa—in ahkfahsryelah moul kawihl ac moul ma pahtpaht luhn mwet uh.²

Ke kahs sahyac an, Pahpah tuhmasr Inkuhsrao pa God lasr, ac God El sie mwet in kahsruh nuh sesr.

Pahpah tuhmasr Inkuhsrao El etuh enenuh luhn tuhlihk Nahtuhl uh yohk liki na mwet sahyac uh. Pa orekma ac wolacna Lal pa in kahsrwe kuht ke yen nuh kwewa kuht for nuh we, use nuh sesr kahsruh luhn mahno ac nguhn in kahsrwe kuht ke innek lasr in fohlohk nuh Yohrohl.

Pahpah Nuh Kwewa El sie Mwet Kahsruh

Ke kuhtuh acn fin facluh uh, pahpah uh ahkfuhlwactyeyuck sin sucu ac mura ke mahlwem Jun. Ma wowo se in ahkfuhlwactye ac suhnakihn pahpah ninac kiyacsr uh. Pahpah uh oruh ma wowo pucspucs nuh sin sucu lalos ac oasr na suhnuhn ma wo selos. Luo sin kunohkohn ma arlac yohk srihpac luhn pahpah in moul luhn tuhlihk nahtuhlos uh pa in sie mwet srihkasrak wowo ac in sie mwet kahsruh. Pahpah uh tiac luti ma wo kuh koluk muhkwena nuh sin tuhlihk nahtuhlos uh; elos oruh yohk liki na in sang sie mwe ahkuhtweyac nuh selos ac nuhnkuh elos in motkoelah moul nuh selos sifacna.

Pahpah uh kahsruh tuhlihk sacohk nahtuhlos ac ahkkahlwemye ke srihkasrak wowo lalos ke innek suwohswohs ma moulkihnyuck uh. Pahpah uh tiac lwelah tuhlihk nahtuhlos uh in sifacna tuhsruhk silahklahk in kahsrwelos, kahsrwelos ke inkacnek lalos ke elos ikori uh. Ac kuhtuh pacl uh ke pacl lahlmwetmwet fwackyuck uh, pahpah uh lwelah tuhlihk nahtuhlos uh in srihke kuhiyaclos, in etuh lah ma inge sahp pa wo emet elos in lutlut kac uh.

Kuht Nuh Kwewa Mwet Kahsruh

Ke pacl se pahpah fin facluh se oruh ma inge nuh sin tuhlihk nahtuhlos sifacna uh, nguhn in kahsruh uh sie ma kuht enenuh in sang kahsruh tuhlihk nuh kwewa nuhtin God, tiac sriyucklac matwac, yen, kuh ohiyac. Esam, tuhlihk nuhtin God uh pa tamuhlwel ac tahmtahel wiyacsr; kuht nuh kwewa ma ke sucu ma pahtpaht se.

Ke ohiyac se inge, lwelah kuht nuh kwewa in mwet kahsruh—kuhsrahsrahlac in ahsroelah paho ac kahsruh sie sin sie kuht in kuh in eklac wo. Ke srihpen kuht ma nuhtin God, oasr kuh sesr in eklac oacna El. Luhngse God ac mwet wiyacsr, liyacacng masap luhn God, ac ukwe srihkasrak luhn Kraist uh pa innek suwohs, ohsrihksrihk, ac innek engan ma e us kuht fohlohk nuh ye muhtuhn ninac pahpah tuhmasr inkuhsrao.

Fin God luhn kuhsrao ngalkihn kuht pa sis El mwet kahsruh nuh sesr uh, sahp kuht kuh pac in soklah mwet wiyacsr, tiac srisri ke tuhnalos, yen elos tuhkuh we, kasrpaclos, kahs, kuh alu lalos an. Lwelah kuht in mwet kahsruh ac ahkinsewowoye moul luhn mwet sahyac-tiac tuhlihk nuhtum muhkwena tuhsruhk tuhlihk nuhtin God nuh kwewa facluh nohfohn.

© 2016 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/15. Ahkkweyeyucklac ke lweng: 6/15. Lwenglah luhn First Presidency Message, June 2016. Kosraean. 12866 868

Luti ke Pweng Se Inge

Kom ac sahp ahkwot in siyuck selos suc kom luti an in nuhnkuh wihn ke sie pacl ma Pahpah Lucng El tuh kahsrwelos. Kom kuh in siyuck selos in nuhnkuh ke ma oacna sie an in pacl sacn ac nuh ke sie puhlan pacl pac sahyac ke elos puhlakihn kahsruh sin pahpah tuhmwaclos facluh uh. Suli elos in suhmuhslah ma oacna sie kac ke ohiyac elos kahsrweyuck. Kom e kuh in srihkaclos in srihke in etahi ma elos suhmuhslah an in tuh mwe srihkasrak wo nuh sin mwet sahyac an.