Fas Presidensi Mesej, Jun 2016
Papa blong Yumi, Kaonsela blong Yumi
I Kam long Presiden Dita F. Ukdof
Seken Kaonsela long Fas Presidensi
?Yu bin openem wan bokis blong ol pat finis wantaem mo pulumaot inskrasen we i talem olsem wanem blong putum tugeta, mo afta tingting:, “Hemia i no klia nating?
Samtaem, nomata we yumi traehad gud mo gat strong tingting long yumiwan, yumi pulumaot wan pat mo askem: “?Be hemia i blong wanem?” “?Bae hem i stret blong go long weaples?”
Wari blong yumi i gro taem yumi stap lukluk bokis ia mo luk wan toktok we i talem se: “I nidim blong putum ol pat ia tugeta blong olgeta we oli gat 8 yia i go antap.” From we yumi no luk wan saen yet long olsem wanem blong mekem, i mekem se yumi no gat strong tingting long yumi wan o biliv long yumiwan se yumi save mekem.
Samtaem yumi gat semfala eksperiens olsem wetem gospel. Taem yumi lukluk long sam pat blong hem, yumi bae sikrasem hed blong yumi mo tingting se pat ia i blong wanem. O taem yumi stap lukluk gud wan nara pat, bae yumi luksave se nomata afta we yumi traehad blong andastanem fulwan, yumi no save faenemaot from wanem i gat wan pat olsem.
Papa blong Yumi long Heven I Kaonsela blong Yumi.
Laki we, Papa blong yumi long Heven i givim long yumi ol naesfala instraksen blong bildimap laef blong yumi mo putum tugeta ol gudfala saed blong yumiwan. Ol inskrasen ia oli wok wetem evri man nomata yia o situesen blong hem. Lod i givim yumi gospel ia mo Jos blong Jisas Kraes. Hem i givim long yumi plan blong fasin blong pemaot man, plan blong fasin blong sevem man, mo tu, plan blong fasin blong stap glad. Hem i no lego yumi stap yumiwan nomo blong gat tu tingting o fesem ol jalenj blong laef, mo talem, “Yu go. Gud lak. Faenemaot yuwan.”
Sapos yumi gat wan tingting blong wet longtaem mo lukluk wetem wan hat we i stap daon mo wan tingting we i stret, yumi bae faenem se God i bin givim long yumi plante tul blong andastanem fulwan ol inskrasen blong mekem yumi glad long laef ia:
-
Hem i givim long yumi presen ia we i no gat praes we i Tabu Spirit, we i save stap olsem wan tija blong heven long yumiwan taem yumi stadi long toktok blong God mo traem blong tekem ol tingting mo ol aksen blong yumi blong stap stret wetem toktok blong Hem.
-
Twantefo aoa, seven dei long wik, Hem i bin givim long yumi wan wei blong go long Hem tru long ol prea blong fet mo ol samting we yumi askem wetem tru tingting.
-
Hem i givim long yumi long taem blong yumi tedei ol aposol mo ol profet, we oli stap talemaot toktok blong God long dei blong yumi mo gat atoriti blong joenem mo silim man long wol ia mo long heven.
-
Hem i putumbak Jos blong Hem—wan oganaesesen blong olgeta we oli biliv, we oli wok tugeta blong helhelpem olgeta taem oli stap wok from plan blong sevem olgeta wetem ona long Hem, fraet, mo bigfala glad.1
-
Hem i givim long yumi ol tabu skripja—Ol toktok blong Hem long yumi, we oli raetem i stap.
-
Hem i givim yumi plante plante tul blong ol teknoloji blong tedei blong helpem yumi long ol wokbaot blong yumi olsem wan disaepol blong Hem. Plante long ol naesfala tul ia oli stap long LDS.org.
?From wanem nao Papa long Heven i givim plante samting blong helpem yumi? From Hem i lavem yumi. Mo from, olsem we Hem i talem abaot Hemwan: “Hemia i wok mo glori blong mi—blong mekem man i nomo save ded mo mekem man i kasem laef we i no save finis.”2
Long nara toktok, Papa long Heven i God blong yumi, mo God i wan kaonsela blong yumi.
Papa blong yumi long Heven i save ol nid blong ol pikinini blong Hem bitim eni nara man. Hem i wok mo glori blong Hem blong helpem yumi long evri janis mo givim long yumi ol naesfala risos long wol ia mo long spirit, blong helpem yumi long rod blong yumi gobak long Hem.
Evri Papa I wan Kaonsela.
Long sam pat blong wol, ol famli mo sosaeti oli ona long ol papa long manis Jun. Hem i gud oltaem blong ona mo respektem ol papa mo mama blong yumi. Ol papa oli mekem plante gudgudfala samting blong ol famli blong olgeta mo gat plante gudfala fasin we plante man i laekem. Tu long ol impoten wok we ol papa oli gat long laef blong ol pikinini blong olgeta i blong stap olsem wan gudfala eksampol mo wan kaonsela. Ol papa oli mekem moa, bitim blong talem long ol pikinini blong olgeta wanem we i raet o rong; oli mekem moa bitim blong sakem wan hanbuk long olgeta mo wet se ol pikinini blong hem oli fanemaot abaot laef ia olgetawan nomo.
Ol papa oli givim kaonsel long ol naesfala pikinini blong olgeta mo soem long olgeta tru long ol gudfala eksampol blong olgeta wei blong wan ones fasin blong laef folem. Ol papa oli no livim ol pikinini blong olgeta blong stap olgetawan nomo be, oli hariap blong helpem olgeta blong stanap long leg blong olgeta taem olgeta i foldaon. Mo samtaem folem waes tingting, ol papa ol lego ol pikinini oli traehad, oli luksave se bae hem i wan bes wei blong ol pikinini oli lanem samting.
Yumi Evriwan I Ol Kaonsela.
Taem ol papa blong wol ia oli stap mekem olsem long ol pikinini blong olgeta, spirit blong givim kaonsel i samting we yumi nidim blong givim long evri pikinini blong God, nomata long yia, ples we oli stap, o situesen blong olgeta. Tingbaot, ol pikinini blong God oli ol brata mo ol sista blong yumi; yumi evriwan i blong semfala famli we i no save finis.
Wetem tingting ia, bae evriwan long yumi i kam ol kaonsela—we yumi wantem tumas blong go aot mo helpem yumi wanwan blong kam ol gudgudfala man From se yumi ol pikininin blong God, yumi gat paoa blong kam olsem Hem. Taem yumi stap lavem God mo ol narafala man, stap obei ol komanmen blong God, mo stap folem eksampol blong Kraes, hemia oli ol stret, smol rod, mo rod blong glad we i tekem yumi gobak long ples we papa mo mama blong yumi long heaven oli stap long hem.
Sapos God blong wol ia i kea tumas long yumi we Hemi kam kaonsela blong yumi, bae yumi tu, yumi save helpem ol narafala man, nomata long kala blong olgeta, wanem kaen grup, o mane situesen, lanwis, o relijin blong olgeta. Bae yumi kam olsem ol tru kaonsela mo blesem laef blong ol narawan—i no ol pikinini blong yumi nomo, be tu, evri pikinini blong God raon long wol.
© 2016 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/15. Oli letem translesen: 6/15. Translesen blong First Presidency Message, June 2016. Bislama. 12866 852
Yusum Mesej Ia blong Tij
Blong stat yu save askem olgeta we yu stap tijim blong oli tingting smol taem wetaem nao Papa long Heven i bin kaonselem olgeta. Yu save askem olgeta blong tingting long wanem i semmak bitwin taem ia we Papa long Heven i givim kaonsel mo taem ia we papa blong olgeta long wol i bin givim kaonsel. Invaetem olgeta blong raetemdaon olsem wanem ol kaonsel blong olgeta i semsemmak. Yu save jalenjem olgeta blong traem mekem folem wanem we oli bin raetem blong traem kam wan eksampol we i moa gud long ol nara man.