Hangtud sa Sunod Natong Panagkita
Pagtinguha sa Espirituhanong mga Gasa
Ni Presidente George Q. Cannon (1827–1901)
Unang Magtatambag sa Unang Kapangulohan
Gikan sa The Latter-day Saints Millennial Star, Abr. 23, 1894, 258–61; gi-standardized ang pagkapital ug punctuation.
Pipila kaninyo ang nagtinguha niining gasa nga gisaad sa Dios nga ihatag?
Gilitratohan sa © iStock/Thinkstock
Matag lalaki ug babaye sa Simbahan ni Kristo makabaton sa mga gasa sa Espiritu sa Dios gibahin ngadto kanila sumala sa ilang hugot nga pagtuo ug sigun sa kabubut-on sa Dios. …
Pipila kaninyo … ang nagtinguha niining gasa nga gisaad sa Dios nga ihatag? Pipila kaninyo, kon kamo moyukbo sa atubangan sa inyong Langitnong Amahan diha sa sirkulo sa inyong pamilya o sa inyong tinago nga mga dapit, nakigbisug alang niining mga gasa nga gihatag diha kaninyo? Pipila kaninyo nangayo sa Amahan, sa ngalan ni Jesus, aron ipakita ang Iyang Kaugalingon nganha kaninyo pinaagi niining mga gahum ug gasa? O nagpadayon ba kamo sa inadlaw-adlaw, sama sa usa ka pultahan nga miabli sa bisagra niini, nga dili mobati sa gihisgutan, nga dili mogamit sa patuo og bisan unsa, nga kontento lang nga nabunyagan, ug nahimong miyembro sa Simbahan ug mopahulay diha, maghunahuna nga ang inyong kaluwasan sigurado na tungod kay nakahimo na kamo niini? …
… Ako nasayud nga ang Dios andam sa pag-ayo sa masakiton, nga Siya andam sa paghatag sa gasa sa pag-ila sa espiritu, ang gasa sa kaalam, kahibalo ug sa pagpanagna, ug sa uban pang mga gasa nga mahimong gikinahanglan. Kon si bisan kinsa kanato dili hingpit, kini atong katungdanan ang pag-ampo alang sa gasa nga makahimo kanatong hingpit. Anaa ba nako ang pagkadili hingpit? Puno ako niini. Unsa man ang akong katungdanan? Sa pag-ampo ngadto sa Dios nga hatagan ko sa mga gasa sa pagkorihir niining pagkadili hingpit. Kon usa ako ka masuk-anon nga tawo, katungdanan nako ang pag-ampo alang sa gugmang putli, nga mainantuson, ug mabination. Masinahon ba ko nga pagkatawo? Akong katungdanan ang pagtinguha sa gugmang putli, diin dili masina. Ingon man ang tanan nga mga gasa sa ebanghelyo. Gituyo kini alang niini nga katuyoan. Walay tawo nga angay nga moingon, “Ah, dili ko makatabang niini; mao kini ang akong kinaiya.” Dili siya kahatagan og kaangayan niini, tungod sa rason nga ang Dios nagsaad sa pagkorihir niining mga butanga, ug aron sa paghatag sa mga gasa nga mowagtang kanila. Kon ang usa ka tawo kulang sa kaalam, katungdanan niya ang pagpangayo sa Dios alang sa kaalam. Sama sa tanang butang. Mao kana ang plano sa Dios mahitungod sa Iyang Simbahan. Gusto Niya nga ang Iyang mga Santos mahingpit diha sa kamatuoran. Tungod niini nga katuyoan Siya naghatag niini nga mga gasa ug naghatag niini niadto kinsa naninguha sa pagpangita niini, nga sila mahimo nga usa ka hingpit nga katawhan diha sa ibabaw sa yuta, bisan pa sa ilang daghan nga mga kahuyang, tungod kay ang Dios misaad nga ihatag ang mga gasa nga gikinahanglan alang sa ilang kahingpitan.