Fas Presidensi Mesej, Maj 2016
Lanem Abaot Mi
I Kam long Presiden Tomas S. Monson
Insaed long Jos blong Jisas Kraes blong Ol Lata-dei Sent, yumi evriwan i ol tija mo yumi evriwan i stap lanem samting. Lod i stap givim invitesen ia long evriwan: “Yufala i mas lan long mi mo bambae yufala i save faenem pis long laef blong yufala.”1
Mi stap invaetem evri Lata-dei Sent blong tingting blong tij mo lanem samting mo blong lukluk long Sevya olsem Gaed blong yumi taem yumi stap mekem ol samting ia. Yumi save se “tija ia i kam long God”2 Hem i no jes wan tija nomo. Hem we i bin tijitm yumi blong lavem Lod God blong yumi wetem evri hat blong yumi, evri sol blong yumi, evri paoa blong yumi, mo evri maen blong yumi, mo blong lavem neiba blong yumi olsem we yumi lavem yumiwan, Masta Tija mo Man we i Eksampol blong laef we i stret evriwan.
Hem we i bin talemaot: “Kam, folem mi.”3 “Mi soemaot wan eksampol blong yu.”4
Yu Mas Jenisim Laef
Jisas i bin tijim wan simpol be impoten trutok olsem we Matiu i bin rekodem. Afta we Hem mo ol disaepol blong Hem oli bin kam daon long Hil we Jisas I Jenis I Kam Narafala, oli bin stop smol taem long Galili, afta, oli go long Kapenam. Longwe, ol disaepol oli bin askem long Jisas:
“?Long ol man we God i King blong olgeta, hu man we i moa hae long olgeta?
“Nao Jisas i singaot wan pikinini i kam long hem, mo i putum hem i stanap long medel blong olgeta,
“Mo i talem se, tru Mi talem long yufala, Sipos yufala i no jenisim fasin blong yufala, blong kam olsem pikinini, bambae yufala i no save kam samtaem we God i King blong yufala.”5
Insaed long Jos, stamba tingting blong tijim gospel i no blong fulumap infomesen long ol maen blong ol pikinini blong God, long haos, insaed long klasrum, o ling misen. Hem i no blong soemaot hamas nao wan papa o mama, tija, o wan misinari i save. O blong leftemap save abaot Sevya mo Jos blong Hem.
Stamba tingting blong tij hem i blong givhan long ol pikinini gel mo ol pikinini boe blong Papa long Heven blong kambak long Hem mo gat laef we i no save finis wetem Hem. Blong mekem hemia, fasin blong tijim gospel i mas leftemap tingting blong olgeta blong folem rod blong stap olsem wan disaepol evri dei mo kipim ol tabu kavenan. Stamba tingting hem i blong leftemap tingting blong wanwan man blong stap tingabaot, filim save, mo afta mekem wan samting blong stap laef folem ol gospel prinsipol. Stamba tingting hem i blong developem fet long Lod Jisas Kraes mo blong jenisim laef i kam long gospel blong Hem.
Tijing we i blesem mo i jenisim laef mo i sevem man hem i tijing we i folem eksampol blong Sevya. Ol tija we oli folem eksampol blong Sevya, oli lavem mo sevem olgeta we oli stap tijim. Oli leftemap tingting blong olgeta we oli lisen long olgeta wetem ol lesen blong ol tabu trutok we i no save finis. Oli stap laef long wan laef we i klin inaf blong yumi folem.
Lavem mo Givim Seves
Ful seves blong Sevya hem i soemaot lav blong neiba. I tru, lav mo seves blong Hem, oltaem hem i lesen blong Hem. Long semmak fasin, ol tija we mi tingbaot gud oli ol tija we oli save, oli lavem, mo oli kea long ol studen blong olgeta. Oli lukaotem sipsip ia we i lus. Oli tijim ol lesen blong laef we bae mi stap tingbaot oltaem.
Wan long ol tija ia hem i Lusi Getj. Hem i save wanwan long ol studen blong hem. Hem i no mestem blong visitim olgeta we oli mestem wan Sandei o olgeta we oli no stap kam. Mifala i save se hem i stap kea long mifala. Nogat wan long mifala i save fogetem hem o ol lesen we hem i bin stap tijim.
Plante yia i bin pas, taem Lusi i stap go kolosap long en blong laef blong hem, mi bin visitim hem. Mitufala i bin tokbaot ol dei blong bifo taem we hem i bin stap olsem tija blong mifala. Mitufala i tokbaot wanwan memba blong klas blong mifala mo tokbaot wanem nao wanwan long olgeta i stap mekem naoia. Lav mo kea blong hem i kavremap wan longfala laeftaem.
Mi lavem oda blong Lod we i stap insaed long Doktrin mo ol Kavenan.
Lod i givim wan komanmen se yumi mas tijim wanwan long yumi bakegen abaot doktrin blong kingdom.
Yumi mas tij wetem strong tingting oltaem mo bae pis blong Hem i stap wetem yu.6
Lusi Getj i bin tij wetem strong tingting oltaem from se hem i no taet blong soemaot lav.
Givim Hop mo Trutok
Aposol Pita i tijim: “Mo sipos ol man oli askem long yufala from wanem yufala i putum tingting blong yufala i stap long Kraes, oltaem yufala i mas rere blong givim ansa long olgeta.”7
Maet bigfala hop we wan tija i save givim hem i hop we yumi save faenem insaed long ol trutok blong gospel blong Jisas Kraes.
“?Mo wanem nao bae yufala i gat hop from?” Momon i bin askem. “Luk mi talem long yufala se bae yufala i gat hop tru long atonmen blong Kraes mo paoa blong laef bakegen long ded blong hem, blong girap long laef we i no save finis, mo hemia i from fet blong yufala long hem.”8
Ol tija, leftemap voes blong yufala mo testifae abaot tru fasin blong Godhed. Talemaot witnes blong yufala long saed blong Buk Blong Momon. Talemaot ol gudfala trutok blong glori we oli stap insaed long plan blong fasin blong sevem man. Yusum ol tul we Jos i letem, speseli ol skripja, blong tijim ol trutok blong gospel blong Jisas Kraes we i bin kambak long stret fasin olsem we i stap long ol tul ia. Tingbaot oda blong Sevya blong; “luklukgud long ol tok blong Baebol, mo yufala i bilif se long ol tok blong hem, yufala i gat laef we i no save finis. Be yufala i luk! Ol tok blong Baebol ya oli stap tokbaot mi.”9
Givhan long ol pikinini blong God blong andastanem wanem i tru mo impoten long laef ia. Helpem olgeta blong developem paoa blong jusum ol rod we bae i kipim olgeta oli stap sef long wokbaot blong olgeta blong kasem laef we i no save finis.
Tijim trutok mo bae Tabu Spirit i givhan long ol traehad blong yu.
Lanem Abaot Mi
From se Jisas Kraes i bin gat gud mo stret fasin blong stap obei mo stap mekem wanem we Papa blong Hem i wantem, “nao Jisas i stap groap moa long bodi blong Hem mo long waes blong Hem tu. Mo oltaem God i glad tumas long Hem.”10 ?Yumi gat strong tingting blong mekem semmak olsem? Semmak olsem we Jisas i bin kasem glathat from ol strong tingting mo gladhat blong hemwan,11 yumi mas gat fasin blong save wet longtaem mo gohed blong lukaotem laet mo save blong God long ol traehad blong yumi blong lanem gospel.
Stap lisin, hem i wan impoten pat blong lanem samting. Taem yumi stap rere blong kasem tijing, yumi mas prea blong kasem insperesen mo konfemesen blong Tabu Spirit. Yumi tingting hevi, yumi prea, yumi mekem folem ol lesen blong gospel, mo yumi faenemaot wanem nao Papa i wantem yumi blong mekem.12
Jisas “i stap tijim olgeta long plante samting long parabol,”13 we i nidim ol sorae blong harem, ol ae blong luk, mo ol hat blong haremsave. Taem yumi stap laef folem ol klin fasin, bae yumi save harem kwaet voes blong Tabu Spirit moa gud, we i save “tijim [yumi] olgeta samting. Bambae hem i save mekem [yumi] tingbaot olgeta samting ia bakegen.”14
Taem yumi akseptem naesfala invitesen blong Hem “Kam lan long mi,” yumi stap tekempat long tabu paoa blong Hem. Nao, bae yumi go fored wetem spirit blong stap obei, stap folem Man we i Eksampol blong yumi, taem bae yumi stap tij olsem we Hem i wantem yumi blong tij mo stap lanem samting olsem we Hem i wantem yumi blong lanem samting.
© 2016 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/15. Oli letem translesen: 15. Translesen blong First Presidency Message, December 2016. Bislama 12863 852
Yusum Mesej Ia blong Tij
Presiden Monson i stap invaetem yumi blong “tingitng hevi long ol traehad [blong yumi] blong tij mo blong lanem samting mo blong lukluk long Sevya olsem Gaed blong yumi.” Maet bae yu wantem lukluk long skripja, wetem olgeta we yu visitim olgeta, blong faenemaot ol fasin we Jisas Kraes i bin stap tij wetem mo stap lanem samting wetem. Yu save stat wetem sam long ol skripja we Presiden Monson i yusum, olsem Matiu 11:29, Jon 5:30, mo Mak 4:2. Yumi save tokbaot olsem wanem nao, wanem we yu bin lanem abaot Kraes i save helpem yu blong “tekem pat long tabu paoa blong Hem.”