Me Pwulopwul Kan
Ehu Poahsoan ong Ahi Kadehde
Me ntingihdao kin mihmi Utah, USA.
Ansou me Ih sounpar 16, kempokepahi men kohdo nimwato iangahki misineri ko. Nan sounpwong me se tepin kosoipeneo, ahi peidek koaros kin pasapengla ni sansal. I kehn Ngehn Sarawio eh kadehde duwen mehlel en iren mahsen kan me pid Kapwurpwurdohu. E weksang soahng koaros me I kehnehr, oh I ese me soahng koaros mehlel.
Ahpw, I lelohngehr posoikla oh uhong tohto me weksang mehn mahs oko. I kehn ahi kelekelehpw, pwangadahr, oh pingidahr. Ma iei dahme I wiewiao pwung, ia kahrepen ei kin loieng kahpwal tohto? I sohte kak wehwehki ia mwomwen ahi kahpwal akan eh wia mehkot mwahuongie. Misineri ko padahkiongie I en kin kaisihsol oh kapakap, pil duwehte nan lukepen rahn en skuhl. Ni ansou me soahng kan kin apwalla I kin wekidehi mongiongi oh ansouohte kehnda kameleilei en Ngehno.
Wihk en ahi pepdaiso inenen direkihla kasongosong. Ahi kauno song keseiehla ma I sohte kasauala ahi pepdaiso pwe en uhd kihlong emen tohrohr, ngehi eri kapidekihlong nan imwenwini pwehki soumwahu en mwidihlik, oh, ahi nohno oh pahpao eri peki I en kohkohlahsang ni imwato. Pwehki soahng tohto solahr mehkot I kak wiahieng, ihte me I kak wia iei sohpeilahngte Kauno.
Ehu ehu kasongosong ko uhd wiahla mehkot mwahuongie. Re sewesehkinie I en kak esehla duwen kaweid mwahu kan en rongamwahuo, me kihongie ehu poahsoan ong ahi kadehde.