Te Rongorongo n Reirei ni Kakawari, Ritembwa 2015
Anuan Iesu Kristo: Te Nanoanga ao te Akoi
Tataromwaaka ni kamatebwaia te bwai n reirei aei ao n ukoria bwa ko aonga n ataia bwa tera ae ko na tibwaia. E na kanga atakin katein te Tia Kamaiu mairoun te Atua ni kakorakora am onimaki Irouna ao ni kakabwaiaia naake ko tararuaia rinanon te kakawari n reirei? Ibukin rongorongona riki tabeua, nakon reliefsociety.lds.org.
Onimaki, Utu, Buoka
“Ni booki aika tabu, karekean te nanoanga e kaota te korakai n raonakin temanna. E nanonaki naba bwa kaotan te iraorao n te namakin, te atataiaomata, ao te nanoanga ibukin temanna.”1
“Iesu e katauraoi katooto aika bati n te tabeaianga n nanoanga,” e taku Beretitenti Thomas S. Monson. “Te mwaane ae mwauku n te nei ae Beteteta; te aine ae kuneaki ngke e wene ni bure; te aine n ana mwaniba Iakoba; natin Iairo te aine; Rataro, mwaanen Maria ao Mareta—ni kabane a tei ibukin ana nanoanga Kristo are e taekinaki n ana kaikonaki ibukin te Itamaria ae Raoiroi. Ni kabane a kainnanoa buokaia.
“Nakon te mwauku i Beteteta, e taku Iesu, ‘Tei rake, tabeka kiem, ao nakonako.’ Nakon te aine are e bure e reireina, ‘Ko na nako, tai manga bure.’ Ni buoka neiene e roko bwa e na itiran, E katauraoa te manibwa n ran ‘ae koburake nako nanon te maiu are aki toki.’ Nakon natin Iairo te aine are e mate e roko e anganaki te kaetieti, ‘Te teinaine, I taku nako im, Uti.’ Nakon Rataro are e mena n te nne ni mate, ‘Oti mai.’
“Te Tia Kamaiu e aki toki ni kaotia bwa akea tokin te nanoanga. … Au kantaninga bwa ti na tatauraoi nakon Ana reirei ao Ana katooto bwa ti aonga n riki n ai arona-te katooto ae maiu n te nanoanga ae koaua.”2
Rakan riki Booki aika Tabu
Taian Areru 145:8; Tekaria 7:9; 1 Betero 3:8; Motiaea 15:1, 9; 3 Nibwaai 17:5–7
Man Koroboki aika Tabu
“Ngai ma kainabau ti katorobubua irarikin natira te aine ae 17 ana ririki ni maiu ao ni korakai ni bubuti ibukin maiuna,” e taku Titita Linda S. Reeves, te kauoman ni kauntira n te beretitentii ni kabuta n te Bootaki n Aine. “Te kaeka bon tiaki, ma . … ti ataia … bwa … [te Tia Kamaiu] iai namakinan te nanoanga ibukin rawawatara.”3
“Teuana te karaki ae mamate nanou iai ni maiun te Tia Kamaiu bon karakinan Rataro. Ti tuangaki ni booki aika tabu bwa ‘Iesu e tangira Mareta, … tarina [Maria], ao [mwaaneia] Rataro.’”4 Ngke e a rangin aoraki Rataro, e roko te rongorongo iroun Iesu, ma ngke E a roko ao e a kaman mate Rataro imwaaina. E biri Maria nakon Iesu, e bwaka iaon Waena, ao e tang. Ngke e noora Maria Iesu n tang, “e ngirangira i nanona, ao … e tang” (Ioane 11:33, 35).
“Anne tabera. Ti riai n namakinna ao noori i bon iroura ao ngkanne ni buokiia ni kabane natin te Tama are i Karawa n namakinna ao n nooria ao n ataia bwa ara Tia Kamaiu e katokaa iaona tiaki tii ara bure ni kabane ma marakira naba ao rawawatara ao korakaira bwa E aonga n ataia bwa tera ara namakin ao e na kanga ni karaui nanora.”5
© 2015 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki n te Ingiriti: 6/15. Kariaiakaki rairana: 6/15. Rairan te Visiting Teaching Message, December 2015. Kiribati.12592 859
Iangoa Aio
Antai ae kona ni kakabwaiaki man am nanoanga?