Iren Mahsen en Padahk en Pas, Nopempe 2015
Ngehn Sarawi wia Kempoakepahmw
Kitail kak, ma kitail pahn warohng, kolokol kapai en ngehn sarawi o en mihmi rehtail, kaidente met ahpw ansou koaros.
Riei souleng ko, I inenen pereniki ai kak patehng kumwail rahn Sarawi wet nan kapokon lap en sapwelimen Kauno Mwomwodiso. I kenehr, pil duwehte kumwail, duwen Ngehno, Ngehn Sarawio ah kadehdeiong kitail duwen mehlel en mahsen akan me kitail karongehier oh koulkier.
Kahrepen ai sawas en rahn wet pwe ien kalaudehla amwail ineng oh men nantiong en iang alehdi kisakis en inou me kohiong emen emen kitail ansou me kitail pepdaislahu. Nan atail kin kasarawiong en wiahla towe mehlel en mwomwodiso wet kitail kin rong kosoi pwukat: “Alehda Ngehn Sarawi.”1 Sang ansou o kohdo, atail mour wekila kohkohlahte.
Kitail kak, ma kitail pahn warohng, kitail kak kolokol kapai en Ngehn Sarawi o rehtail, kaidehnte met ahpw ansou koaros. Ke esehier sang ni mahsen akan en kapakap en kamadipw sarawio ni mwomwen inou o ah pahn pweida: “Maing Koht, Sahm Soutuk, se patoan peki rehmwi ni mwaren sapwelimomwi Iehros, Sises Krais, en ketin kapaiada oh kasarawiala pilawa wet ong war koaros me pahn patohan tungoale, pwe en wia mehn katamanpen war en sapwelimomwi Ieroso, oh kadehdeiong komwi, Maing Koht, Sahm Soutuk, me pein irail men patoan ale mwaren sapwelimomwi Ieroso, oh patoan tamatamaniki ih ansou koaros oh kapwaiada sapwelime kosonned akan me e ketikiong irailehr.”
Oh e pil iangahkido inou ehu: “Pwe Sapwelime Ngehn en ketiket rehrail ansou koaros.” (D&C 20:77; mehkot kesempwal patehng).
Kitail anahne Ngehno en mihmi rehtail ansou koaros pwe en kak kiong kitail kaweid oh sawas en Ngehn Sarawio nan atail momour en rahn koaros. Kitail kak, me duwehte, Ngehno kak keperkin kitail en kalowehdi kasongosong kan en tepel.
Iei ihte kahrepe wet, me kin kahreiong atail kak kilang dahme karehda sapwelimen Kauno ladu kan kin song en kalaudehla arail ineng en kaudok iong Koht nan atail kamadipw sarawi kan. Ma kitail pahn kin ale kamadipw sarawi ni pwoson, Ngehn Sarawi o pahn kak dorei kitail oh irail kan me kitail kin poakohng sang nan kasongosong kan me kin laud oh kalap wiawi nan ansou kan koaros.
Ni atail kin ehuieng Ngehn Sarawi e kin wiahda mehkot mwahu ah nohn kaselel oh kasongosong kan kin malaulaula. Ihte met me kak en itar en sewese kitail en nantiong warohng Ngehno en kin mihmi rehtail nan ansou kan koaros.
Met ni Ngehn Sarawi ah kin kakehlailih kitail sang tepilo, E pil kin kiong kitail manaman en diarada me pwung sang dahme sapwung. Me mehlelo iei me kin keieu kesemwpwal en kin kamehlel sang kaudiahl sang rehn Koht. Peihn atail kahrepe kan oh peihn atail iren pepehm kan sohte kak en itar. Kitail koukouson nan ansou ehu me irail me lolokong kan pahn pil inenen apwaliki diarada me mehlel o sang ni arail pein lolokong.
Kauno padahkiong Sapwelime Wahnparon Dohmwas, me anahne mehn kadehde pen paliwar sang ni ah pahn dohke Sapwelime ohla kan, kaudiahl o wia mehn kadehde mwahu: “Sises ahpw mahsaniong, “Ia duwe, ke kamelele pwehki omw kilang ie? Meid pai irail kan me sohte kin kilang ahpw kamelele.” (Sohn 20:29).
Mehlel kan me pahn kahluwaikitail wohng rehn Koht kin sansalada sang rehn Ngehn Sarawi o. Kitail sohte kak kohla nan tuhke ko oh kilang Sahmo oh Nah ara kosokosoiong pwutak pwulopwul Joseph Smith. Sohte mehn kadehde ehu de songen mehn akamai ehu pahn kak kosoiahda me Elijah kohdo nin duwen nan inouo oh kiong kitail kih kan me rahnwet mihmi pohn atail Soukohp Thomas S. Monson me ieias nan mour wet.
Katengetengdi en mehlel o kohdo ong mwanakapw oh peinakapw men me inengiong en iang alehda Ngehn Sarawi. Mendahte ire sapwung kan oh kosoi likamw akan ah pahn kin lelohng kitail nan ansou kan, kitail anahne Ngehn en Mehlel o ansou koaros pwehn sewesei kitail nan ansou kan me kitail kin ahneki peikasal.
Ni ansou ehu emen pwihn en Wahnparon ehk riemen o, George Q. Cannon koangoangehkin kitail en wiahda mehkot ehu me pahn kak kahluwado Ngehno rehtail. E inoukiong kitail, oh I pil iang inoukiong kumwail, ma kitail pahn idawen ahl wet, kitail “pahn ahneki marain en padahk mehlel” oh “sohte pahn ahneki peikasal de mih nan rohtorot” oh atail pwoson pahn kehlail oh atail peren pahn …unsekla.”2
Kitail pil anahne sawas sang rehn Ngehn Sarawi ong pil ehu kahrepe. Melahn aramas men me kitail kin pokohng kak kohdo ni atail sohte kasik. Sang ni kadehde mehlel en Ngehn Sarawi me kohsang rehn Samatail Nanleng oh Sounkomour o me iasadahr me kihong kitail koapwoaroapwoar oh insenamwahu ong kitail ni ansou me aramas me kitail kin pokohng kin mehla. Kadehde o anahne kin kapw ansou me mehla kin pwarada.
Eri, songen kahrepe tohto me kitail anahneki pwe Ngehn Sarawi en ketiket rehtail oh wia kompokepatail. Kitail kin inangih, ahpw kitail ese sang pein kitail me e sohte mengei en idawen ansou koaros. Kitail koros kin ahneki madamadau, kosoi, oh wiewia nan atail mour me kin sohte mwahu ong pali Ngehno. Kauno padakiong kitail me ngehn sarawi pahn ketiket rehtail oh wia kempoakepatail ansou koaros ma atail mongiong kan diren limpok oh ahneki madamadau mwakelekel ansou koaros (tehk D&C 121:45).
Ong kumwail me kin apwaliki momourki koasondi ile me pahn kiheng uhk kisakis en ianganiki Ngehno, I kaweidkin kumwail met. Miehier ansou me kumwail kehnehr pepehm en Ngehn Sarawi. E kak wiawi ieng uhk rahn wet.
Kumwail kak wiahki ansou pwukat ansou en kamarain duwehte weren tuhkehn pwoson me Alma kawehwehda (tehk Alma 32:28). Padokedi ehu ehu irail. Kumwail kak wia met ni amwail pahn mwekidiki pepehmo. Me keieu kesemwpwal iei pepehm me ke pahn ese dahme Koht pahn kupwurki ken wia. Ma iei ken pwain meirong en eisek kis ehu de ken pwarek mehn impomw me ahniki pahtou, ah ken wia. Sohte lipilipil dahkot mwo, wia. Ahnsou me kumwail pahn kasalehda amwail ineng en peikiong, a Ngehno pahn kadaredohng kumwail pil ekei pepehm en dahme Koht men kumwail en wia.
Ni amwail pahn peikiong pepehm kan, Ngehno pahn kin kalap lelehng uhk, ah ke pahn kerkerenlahng wiahla kempoakepah ansou koaros. Amwail kehl en pilada me pwung pahn lalaudla.
Kumwail pahn kak ese ansou me pepehm en peik pahn kohsang Ngehno sang ni pein amwail pepehm. Ansou me pepehm kan pahn kin pahrekiong dahme Soundoro oh Sapwellime soukohp ieias akan oh wahnpoaron akan kin mahsanih, kumwail kak pilada peik ni sohpeikasal. Kauno ahpw pahn kadaredo Sapwellime Ngehno en sewese kumwail.
Karasepe, ma kumwail alehdi pepehm en kesempwaliki Rahn Sarawi, ahpw mehlel ansou me e mwomwen apwal, Koht pahn kadaredo Sapwellime Ngehno en sawas.
Songen sawaso pil wiawiong ahi pahpa sounpar kei samwalahro ansou me e kohla doadoahk Australia. E kelekelehpw rahn Sarawi ehu, oh e men ale kamadipw sarawi. E sohte kak diar wasa me Souleng en Imwin Rahn akan kin tuhpene ie. Ih eri tepda alu. E kin kapakap ni alosop kan koaros pwe en ese iawasa me e pahn keidla ie. Mwurin ah alialuseli oh wetwetseli nan ereihn awa ehu, e uhdi oh pwurehng kapakap. E ahneki pepehm ehu en keidla nan ehu ahl. Mwurin ansou kis e rongada ngilen koul peipeidohsang nan ehu ihmwko. E kilenglong nan wenihmwtoko oh kilangada aramas ekei mwomwohd karanih tehpel ehu me pwepweikihdi likou pwetepwet iangahki dahl en kamadipw sarawi kan.
Met, mwein kak wia mehkot tikitik ong kumwail, ahpw ong ih e wia mehkot kaselel ehu. E ese me inou en nan kapakap en kamadipw sarawio pweida: “Tamatamanki ih ansou koaros oh kapwaiada sapwellime kosonned akan me e ketkiong irailehr; pwe sapwellime Ngehn en ketiket rehrail ansou koaros.” (D&C 20:77)
E wia ehu karasaras en ansou ieu ansou me e kapakap oh kapwaiada dahme Ngehno padahkihong me Koht kupwuriki en wia. E kin peikiong nan pahr koaros, duwehte kumwail oh ngei atail pahn wia. E sohte kin kalap kosokosoia palingeni. E kin wiewiahte mehkot tikitik kei ong Kauno sang ni pepehm kan me e kin alehdi.
Ansou koaros me pwihn en Mwomwohdiso kin peki en padahkong irail, e kin wia. E sohte katapaniki aramas 10 de 50 de ia wen ah pwangada. E kin kadehdehki Sahmo, Sapwellimeo, Ngehn Sarawio, oh soukohp akan ansou koaros me Ngehno kin kaweidki en wia.
Ah pwukoah keieu laud me e alehdi nan Mwomwohdiso iei emen high council nan Boneville Stake, e kin mwatih nan mwetuel en stake, oh wia sounpadahk nan Sunday School class. Sounpar tohto, ansou kan me e kin anahne, Ngehn Sarawio kin mihmi reh.
I kesihnen limwahn ahi pahpa nan perehn imwenwini. Ahi nohno, me wia ah pwoud sounpar 41, wonohn pohn peht. Awah kei se kilekilangkier ai nohno. Se kilang pohn mese tepda sohla sansal weirek. Sendinpeh me e roakepene, saledeklahr. Pehkan kosonsondi mihmi ni pengpenge.
Weirek en soumwahu kanser me e ahnekier sounpar kei wie sosohla. I kilang pohn mese e ahniki popohl. E mwur esingeki ansou kei, mwuri apw uhdi, oh sohla mwekid. Se kesihnen wasau kilikilang ma e pahn pwurehng esingekda.
Mwuri, Pahpa ahpw nda ni ngihl tikitik, “Kisin serepein kis samwalahr ni imwehu.”
E sohte kakerehdi pilen mese. Met pwehki Ngehn Sarawi kasalehiongehr ih mwowe duwen ah pwoudo, iawasa e kohsang ie, dahme e wiahla, oh iawasa e kokohlahng ie. Ngehno kadehdehieng ih pak tohto duwen limpoak en Sahm Nanleng, oh Soundor o me powehdi mehla, oh mehlel katengetengpenehn nan tehnpas sarawi me e wiaiong ah pwoud oh ah peineinei.
Ngehno kiongehr koapwoaroapwoar me sang ni wiewia mwahu en ah pwoudo oh ah pwoson e pahn pwurala ah wasa nanleng wasa me e pahn tamanda me e wia seri en inou men oh irail pahn kasamwo ih ni wahu.
Ong ahi pahpa, ah koapwoaroapwoar udahn laud. Ngehn Sarawi kasalehiongehr ih me mehlelo.
Met ekei mwein pahn nda me ah lokaia kan oh madamadau en wasahn kouson nanleng wia ouraman kei, de madamadau en ohl men nan ansou me ah pwoud mehla. Ahpw e ese me padahk mehlel poatoapoat kan iei te ahl en kehn kak wehwekila.
E wia sohn roprop men me kin rapahki duwen mehlel ong dahme kitail kin kilang nan sampah nan ah momour en arams laud men. E doadoahngki dipsou en roprop ni keneinei pwe en ahniki wahu sang ienge kan nan sampah. Dahme e wiahda nan pelien kaskuhl kan kohsang ni ah kilang mwokmwokid en duwen nan pworen mas oh song en diarada mwomwen ah kin kak kilang wasa ni ah wia kesou nan wasahn kosou kan.
Ahpw e idawehn ehu ahl pwe en esehda duwen me mehlel me keieu kesempwalohng ih oh ong emen emen kitail. Ihte sang ni Ngehn Sarawi me kitail kak kilangki aramas oh soahng teikan me Koht kin ketin kilang.
Kisakis wet doadoahk nan imwen wini mwurin ah pwoud ah mehla. Se kihpene ahn nohno dipwsou koaros pwe sen wahla nimwat. Pahpa kin uhdi oh kalahngan ong nurse oh toahkte koaros me se tuhwong ni ah alialu kohieila ni sdohsa. I tamataman ni ahi kehn, ni ekis sonsued, me se anahne kelehpwla pwe sen ahniki ansou en pahtouki aht nohno.
I esehier met me e kilang mehkot me ihte Ngehn Sarawi kelehpw me kasalehieng. E kilang aramas ko ni arail wia tohnleng kei sang rehn Koht me kohdong apwalih ah pwoudo. Irail mwein medewe me irail tohn doadoahk en imwen winihte, ahpw Pahpa weliandi Soundoro kalahngan ong irail.
Pepehm en Ngehn Sarawio pil ieiang ih lau se lella imwen ahi nohno oh pahpa. Se kosoakosoiki wen minit kei nan pere laud en ihmwo. Pahpa eri pekihda me e pahn kohla nan ehu pere.
Mwurin minit kei, e pwurodo nan perehu. Pohn mese me pohkomwokomw. E aluhdo reht oh nda ni ngihl tikitik, “I ekis pwunodki ma Mildred pahn lella nan sahpw en Ngehn kelehpw. I wiahki me e pahn salongala nan pwungen pokono.”
Ih eri nda ni ah peren, “I apwtehn kapakap. I ese me soang koaros mwahu rehn Mildred. Ahi nohno mihmi mwo pwehn kasamwo ih.”
Ih tamataman ai sinsirei ansou me e kosoia mwo, pwe ih medewehla ai nohno kahlap, ah mwotomwot, pahn tangatang kohla nan pwungen aramas ko pwe en mih wasao oh kasamwo nah serepein me pwoudiki nah pwutako ah pahn lella mwou.
Ehu kahrepen ahi pahpa ah kapakap oh alehdi popohlo pwehki e kin kalap kapakap ni pwoson sangete ni ah tikitik. E kin kalap alehdi pasapeng en popohl oh kaweid me kin kohdo nan ah mongiong. Pil kapatahiong e ese audepen pwuhk sarawi kan oh mahsan en soukohp ieias akan. Eri e kin kak rongada ngihl tikitik en Ngehno, me ke mwein pil iang kehn rahnwet.
Kapai en Ngehno ni a kin wia kempoakepah e kapai ehu me laudsang popohl oh kaweid me koieng ih. Met me iei me wekidala ih sang ni Tomw en Sises Krais. Ni ansou me kitail alehda kisakis en Ngehno en ieiang kitail ansou koaros, Soundoro kak ketkiheng kitail mwakelekel me kitail anahne ong mour soutuk, me wia kisakis keieu ile nan kisakis koaros sang Koht (kilang D&C 14:7).
Ke tamataman sapwelimen Soundor o maseno: “Met iei kosonnedo: Koluhla, kumwail koaros me mihmi nan sampah pwon, oh kodohng ie, oh kohdo rehi oh pepdaisla ni edei, pwe kumwail en kak mwakelekelda ong ni amwail pahn alehda Ngehn Sarawi, pwe kumwail en mwakelekel nin amwail en kesihnen mwohi ni imwin rahno”(3 Nephi 27:20).
Kosonned akan me sansal iangedo inou wet me sang rehn Kauno:
Kauno mahsanih kitail en koapwoaroapwoarki Ngehno me kin kahlua kitail lahng en wia me mwahu—, ehi en wia me pwung, akitikitik, tenekih ni pwungih; oh met iei Ngehno.
Ih ahpw pahn ketkihdo Sapwellime Ngehno, me pahn kamarainih atail madamadau oh audehkin kitail peren (D&C 11:12–13).
I kadehdeh ong kumwail me Koht Sahm Ieias, me Sises Krais me iasadahu me kaukauweid Sapwellime Mwomwohdiso, Thomas S. Monson kolokol kih en priesthood koaros, oh e ahneki kaudiahl sang Ngehn Sarawi me kin kahlua oh utungada Mwomwohdiso en Sises Krais en Souleng en Imwin rahn akan oh towe impahi kan.
I pil kadehde ieng kumwail me ohl kesemwpwal pwukat me pil iang kaweid kitail rahnet wia sapwelimen Kauno Sises Krais soun kadehde kei, me pil wia tohn pwihn en Wahnpoaron Ehk Riemeno, iei irail pilpidahsang Koht. I ese me Ngehno me kaweid Presiden Monson en kieng irail pwukoah pwukat. Oh ni amwail rongorong irail oh arail kadehde kan, Ngehn Sarawio kamehlelehng kumwailehr dahme ih kaweid kieng kumwail met. Irail malipilipdahsang rehn Koht. I utung irail oh poakpoakei irail oh I ese me Kauno poakoahng irail oh pahn utung irail nan arail pwukoah. Oh I inda met ni mwaren Kaun Sises Krais, amen.
© 2015 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/15. Kamanaman ong kawehwe: 6/15. Kawehwehpen Visiting Teaching Message, November 2015. Pohnpeian. 12591 885