Bisopi W. Christopher Waddell

Karua ni Daunivakasala ena Matabisopi Vakatulewa

Me vaka ni dauqito e koronivuili, a taura o Christopher Waddell e dua na sikolasivi ena San Diego State Univesiti e California, Amerika. Ia a vulica me vakavinavinaka vei bisopi ka a tarogi koya baleta na veika tale eso ena nona mai vakacagicagi tiko e vale.

“A sega ni kaya, ‘Sa vakacava tiko na veitavi, (volibo_lo)?’ ia ‘Sa vakacava tiko o iko? O sa dau masu tiko beka, yaloqaqa tiko, ka tudei tiko ena Lotu?’ Au taleitaka sara ga na taro o ya [baleta]… na veika e rui bibi,” e nanuma lesu o Bisopi Waddell.

Na nona raica matua tiko na veika e bibi a vukei Bisopi Waddell me bula voli ena rua na ibole ni matavuvale, “Lesu mai ena vakarokoroko” kei na “Nuitaka ga na Turaga.” Na vakanuinui o ya a rawa kina vua me biuta tu mada vakawawa na volibol ka me laki kaulotu. Ni sa lesu mai na kaulotu, a rawa sara vua me veitau voli vakabalavu kei na dua na goneyalewa ena dua tale na univesiti. E muri, ni rau sa qai vakamau, kei na nodrau nuitaka tikoga na Turaga a rawa kina me rau vakarorogo vua na Yalotabu baleta nodrau vakatulewa ni itosotoso.

“Mo cakava na ka ena sala ni Turaga,” a kaya, “ka na vinaka na ka kecega.”

Nona nuitaka tiko na Turaga a vakalougatataki kina o Bisopi Waddell, ka veiqaravi mai vaka-Vakaitutu Raraba ena Vitusagavulu mai na Epereli 2011, ka sa yaco oqo me iKarua ni Daunivakasala ena Matabisopi Vakatulewa.

A sucu o Wayne Christopher Waddell e Los Angeles, e California, ena 1959. A vakamau kei Carol Stansel ena Julai ni 1984 ena Valetabu e Los Angeles California. Erau nodratou itubutubu e va na gone ka tolu na makubudrau. A daunivakasala tu ena Mataveiliutaki ni iWasewase na South America Northwest ka na tiko mada vakalailai e Peru.

A ciqoma o Bisopi Waddell na nona diqiri ena 1984 mai na San Diego State Univesiti. A cakava talega na nona cakacaka ni qeretueti taumada ena parokaramu ni Veiliutaki ena MBA e BYU. Vakatekivu ena 1984 a cakacaka vata kei Merrill Lynch, ka kena isevu ni peresitedi ivukevuke ni kabani.

A veiqaravi tu mai o Bisopi Waddell vaka-Vitusagavulu ni iWasewase, peresitedi ni Tabana ni Kaulotu e Spain Barcelona (na vanua a kaulotu tu kina e liu), peresitedi ni iteki, daunivakasala ena mataveiliutaki ni kaulotu, bisopi, ka daunivakasala ena matabisopi.