Mga Pasidungog gikan sa Funeral ni Elder Richard G. Scott
Septyembre 28, 2015, Salt Lake Tabernacle
Ibabaw: Sa pag-ila sa trabaho ni Elder Scott alang sa U.S. Navy, usa ka bandera sa America gihatag ngadto sa anak nga lalaki ni Elder Scott nga si Michael. Ang mga apong lalaki ni Elder Scott maoy nahimong mga pallbearer. Ang iyang kinamagulangan nga anak nga babaye, si Mary Lee, uban sa iyang bana, si Bruce, gigakos atol sa service diha sa lubnganan. Wala: Presidente Thomas S. Monson namulong mahitungod ni Elder Scott isip usa ka “pinangga nga higala ug kauban sa buhat sa Ginoo.” Atbang nga pahina: Ang Korum sa Napulog Duha ka mga Apostoles ug ang Kapangulohan sa Seventy naglinya sa entrada sa Tabernacle samtang ang lungon gipasulod.
Michael W. Scott, anak nga lalaki
“Si Papa natawo sa amahan nga dili miyembro sa Simbahan ug sa inahan nga, bisan og miyembro, apan dili aktibo sa daghang mga tuig. … Ang iyang pag-apil sa simbahan limitado kon dunay mangita niya ug modala niya. Nakasiguro ko nga kadtong mga lider walay ideya nga ang batan-ong lalaki nga ilang gitabangan mahimong usa ka importante nga lider sa Simbahan. Wala ko makaila niadtong mga tawhana, apan nagpasalamat ko nila. Tingali usa sa mga rason nga si Papa maayo kaayo nga motabang sa uban—sa dili kaayo aktibo, sa masulub-on, sa nawad-an og paglaum, sa sinalikway—tungod kay sa sayong bahin sa iyang kinabuhi, mao usab siya, siya ang gitabangan ug giluwas. …
“Si Papa nagpuyo og kinabuhi nga puno sa kalipay. Usa siya usa ka musician ug artist. … Ganahan siya nga mo-explore. Ang iyang ideya sa perpekto nga bakasyon mao ang pagpasakay sa tanang mga bata ug kahimanan ngadto sa Datsun station wagon ug mosuroy bisan asa sa nasud. …
“Si Papa usa ka talagsaong ehemplo kon unsaon sa pag-atubang ang kalisdanan. Usa ka ehemplo kon giunsa niya pag-atubang ang kamatayon sa duha sa iyang mga anak. Sa dihang si Mama ug Papa nawad-an og batang masuso sa pagkatawo niini ug dayon paglabay og duha ka bulan namatay ang gamay nga si Richard sa edad nga duha ka tuig tungod sa sakit sa kasingkasing, ang tubag ni Papa makapahinuklog. Nianang gabhiona iyang gigakos si Mama ug miingon kaniya, ‘Dili kita angay nga mabalaka, tungod kay natawo siya ubos sa pakigsaad. Kita dunay kasiguroan nga maangkon nato siya sa umaabut. Karon kita dunay rason nga magpuyo sa labing maayo. Kita dunay anak kinsa miadto na sa celestial nga gingharian tungod kay namatay siya sa wala pa sa edad sa pagkamaytulubagon.’ Imbis masuko, siya dunay paglaum; imbis mawad-an og paglaum, iyang gilig-on ang kauglingon; imbis magduhaduha, nagpakita siya og hugot nga pagtuo ni Kristo. …
“Iyang gipili sa paghimo sa mga butang nga maayo kaayo, ug kini nahimo. Ang iyang kaminyoon ngadto ni Mama tingali mao ang labing nindot sa tanan.”
Elder D. Todd Christofferson sa Korum sa Napulog Duha ka mga Apostoles
“Si [Elder Scott] mibati nga ang iyang buluhaton gikan sa Ginoo mao ang pagbutang sa makaayo nga tambal sa grasya ni Kristo ngadto niadtong nahulog taliwala sa mga kawatan—sa samaran, sa nag-antus, sa nabug-atan, sa walay paglaum, niadtong nakasala, ug kadtong gibuhatan og sala. Uban sa dili komon nga pagkamatinuoron, iyang gidapit ang tanan sa pagtinguha sa Ginoo pinaagi sa pagsunod sa mga baruganan sa ebanghelyo ug diha makakita og kalinaw, ug kalipay. …
“Si Elder Scott maayo kaayo kon magtudlo ug magpamatuod sa walay katapusang tabang sa Pag-ula ni Kristo ug sa kalipay nga makita kon mopaduol ngadto sa Dios. …
“Siya ug ang iyang mahal nga si Jeanene mitudlo namo kanunay og sermon pinaagi sa ilang ehemplo kon unsay ipasabut sa gugma ug pagmahal sa kauban sa kaminyoon ug sa paghalad sa iyang labing maayong paningkamot ngadto sa mga anak niini. Kanang ehemplo sa gugma ug pagkamaunungon nakapadasig sa liboan, kon dili minilyon, sa miaging mga katuigan. …
“Si Elder Scott kanunay maawhagon, daling makapadayag og pagsalig, ganahan nga modayeg ug mopadayag sa iyang gugma. Ug kana mao ang iyang paagi ngadto sa mga lalaki ug mga babaye bisan asa, bisan sa mga bata. Ang iyang instruksyon taas apan praktikal, ug kini makanunayon. Ingon og si Elder Scott dili gayud kapuyon sa pagtambag, pagtudlo, ug pag-awhag, sa tinagsa-tagsa o sa mga grupo. Dili ko makasulti kon makapila ka higayon ug sa pila ka mga dapit nga ang mga tawo mikomentaryo nako mahitungod sa butang nga ilang nakat-unan gikan ni Elder Scott—usahay sa ilang pagkatin-edyer—nga nakaimpluwesnya sa ilang kinabuhi ug pagserbisyo sukad.”
Ibabaw: Sa pag-ila sa trabaho ni Elder Scott alang sa U.S. Navy, usa ka bandera sa America gihatag ngadto sa anak nga lalaki ni Elder Scott nga si Michael. Ang mga apong lalaki ni Elder Scott maoy nahimong mga pallbearer. Ang iyang kinamagulangan nga anak nga babaye, si Mary Lee, uban sa iyang bana, si Bruce, gigakos atol sa service diha sa lubnganan. Wala: Presidente Thomas S. Monson namulong mahitungod ni Elder Scott isip usa ka “pinangga nga higala ug kauban sa buhat sa Ginoo.” Atbang nga pahina: Ang Korum sa Napulog Duha ka mga Apostoles ug ang Kapangulohan sa Seventy naglinya sa entrada sa Tabernacle samtang ang lungon gipasulod.
Presidente Russell M. Nelson, Presidente sa Korum sa Napulog Duha ka mga Apostoles
“Nahinumdom kaayo ko sa dihang miadto mi sa Central America niadtong Abril 1990. Nahimuot kaayo ko nga nagtan-aw ni Elder Scott nga nagtudlo sa mga misyonaryo ug mga miyembro sa pinulongan nga Kinatsila. Dili lang siya maayo kaayo; siya hanas kaayo—napuno sa kalagsik ug kadasig samtang nagtudlo siya pinaagi sa Espiritu. …
“Si Elder Scott dili kapuyon ug pakighimamat sa mga tawo bisan asa siya moadto. Iyang gipahinungod ang iyang kinabuhi sa pagserbisyo sa tanang mga tawo, bisan pa sa ilang nasyonalidad, kaliwat, o pinulongan. Nakasabut siya sa kabililhon sa matag tawo nga iyang mahimamat.
“Ang iyang kapuangod talagsaon. Nakita nako siya nga mitudlo. Nakita nako siya nga mibayaw. Nakita nako siya nahigugma sa tanang katawhan sa tibuok kalibutan.”
Presidente Thomas S. Monson
“Si [Elder Scott] makahimo pag-ayo sa bisan unsang buluhaton nga moabut kaniya, ug iyang buhaton sa hilabihan ka ganid ug tumang kahanas. …
“Diha sa among taliwala niining mga katuigan si Richard G. Scott, usa ka madungganon nga tawo, bisan usa ka tawo sa Dios. Si Richard gipanalanginan og malantip nga hunahuna, mahait nga salabutan, ug maloloy-ong espiritu. …
“Gihiguma niya ang mga tawo. Gihigugma niya ang iyang pamilya. Gihiguam niya ang iyang pamilya. …
“Ang nindot nga pahiyom ni Richard makaabli sa mga kasingkasing sa uban. Pareha ang iyang pagtagad sa kabus ug ubos og kahimtang ingon man sa adunahan ug inila. …
“Malumo nga tawo si Richard. Mahigugmaong siyang mitudlo namo sa … mga leksyon sa kaisug, mga leksyon sa pailub, mga leksyon sa sa hugot nga pagtuo, ug mga leksyon sa debosyon. Kining tanan gitudlo ni Richard G. Scott namo sa pulong ug sa buhat.”