Toktok bilong Nambawan Presidensi, Oktoba 2015
Tos bilong Yu imas lait yet taim Yu Pinisim Ron bilong Yu
Ikam long Presiden Dieter F. Uchtdorf
Nambawan Kaunsela insait long Nambawan Presidensi
Long taim bipo long Greece, ol man isave resis long wanpela resis ol i kolim lampadedromia1 Long dispela resis, ol man isave holim wanpela tos long han bilong ol na ron igo na givim igo long narapela man gen inap laspela man long tim bilong ol ibai pinisim resis.
Ol i no save givim prais bilong resis long tim we i ron fast moa yet — tasol ol i save givim long dispela tim we ol i pinis resis na tos bilong ol i lait istap yet.
Igat wanpela strongpela skul long hia, we ol propet long taim bipo na tu ol propet bilong nau isave tisim dispela lesen: emi impoten long statim resis, tasol emi impoten moa olsem tos bilong yu imas lait yet taim yu pinisim resis.
Solomon ibin Strong Taim emi Stat
Bikpela man King Solomon em wanpela eksampol long wanpela husat ibin statim resis bilong em olsem wanpela strongpela man.Taim em ibin yangpela man, em ibin “lavim tumas Lod, em ibin save wokabaut insait long ol lo bilong papa bilong em David” (1 Kings 3:3). God ibin hamamas long em na ibin tok, “Askim mi long wanem samting bai mi givim yu” (1 Kings 3:5).
Tasol em ino askim long planti samting long mekim em rits na em ino askim long longpela laip, Solomon i askim olsem “lewa bilong em ibai andastendim ol pipol taim em iwok long judgim ol, olsem bai em yet iken luk save long husat i gutpela man na husat i nogut man” (1 Kings 3:9).
Dispela emi mekim Lod i hamamas tumas olsem na Em i blessim Solomon ino long wisdom tasol, tasol tu Em i blessim em wantaim planti samting tru na tu olsem bai em igat longpela laip.
Em tru olsem Solomon ibin wais tru na em ibin mekim kapam planti bikpela samting, tasol em ino bin pinisim laip bilong em olsem strongpela man. Sori tru long em, olsem bihain tru long laip bilong em, “Solomon wokim samting nogut insait long ai bilong Lod, na em ino bin bihanim pasin bilong Lod” (1 Kings 11:6).
Pinisim Resis Bilong Yumi Yet
Hamaspela taim yumi tu i statim samting na ino pinisim? Pasin bilong kaikai gut? Ol eksesais progrem? Comitmen long ridim ol skripsa olgeta dei? Wokim disisen olsem bai yumi kamap olsem ol gutpela disapol bilong Jisas Kraist?
Hamaspela taim yumi tokim yumi yet olsem long mun Januari bai mi mekim ol dispela samting na yumi statim wantaim olgeta bel bilong yumi long sampela dei, wik na tu sampela mun tasol taim olsem mun Oktoba ikam, dispela strongpela comitmen i kamap olsem si bilong paia idai pinis?
Wanpela dei mi bin lukim wanpela pani piksa long wanpela dog we i silip klostu long wanpela hap pepa we em ibin brukim igo long ol liklik hap. Dispela hap pepa em ibin tok olsem, “Setifiket bilong Treining bilong Dog long Harim Tok.”
Yumi olgeta olsem tu sampela taim.
Yumi save igat gutpela tingting olsem; yumi save stat strong; yumi laik kamap olsem ol gutpela lain stret. Tasol long pinis bilong em yumi save lusim gen ol dispela samting i bruk bruk, yumi save troim ol dispela samting igo, na yumi save lus tingting olgeta long ol.
Em pasin bilong yumi ol man long pundaun, ino kam gut, na sampela taim yumi save laik long kamaut long dispela resis long laif. Tasol olsem ol disaipol bilong Jisas Kraist, yumi komitim yumi yet, ino long statim resis tasol, tasol tu long pinisim dispela resis — na tu long pinisim wantaim tos bilong yumi i lait moa yet. Sevia is promisim ol disaipol bilong Em olsem, “Husat i strong igo inap long pinis bilong resis bilong em, dispela man em bai mi seivim em” (Matthew 24:13).
Nau mi tanim toktok liklik na putim gen igo long yupela dispela promis bilong Sevia long dispela taim bilong yumi: Sapos yumi i holim pas ol comanmen bilong Em na pinisim dispela resis wantaim tos bilong yumi i lait yet, yumi bai igat laif oltaim oltaim, we dispela em bikpela samting moa long olgeta samting God ilaik givim yumi (lukim D&C 14:7; lukim tu 2 Nephi 31:20).
Lait We Ino Save Dai
Sampela taim bihain long yumi pundaum, na bihain long yumi ino kam gut o taim yumi ilaik givap, yumi save pilim hoples na yumi save bilip olsem lait bilong yumi em idai pinis na yumi lus pinis long resis bilong yumi. Tasol mi testifai olsem Lait bilong Kraist em ino inap long pinis. Em i save shain long nait we emi tudak olgeta na ibai laitim gen lewa bilong yumi sapos yumi yet tanim lewa bilong yumi igo long Em (lukim 1 Kings 8:58).
Taim yumi pundaum klostu klostu o taim yumi pundaun igo daun long we tru, Lait bilong Kraist iwok long lait yet istap. Na tu long nait we i tudak tru, sapos yumi wokabaut igo long Em, light bilong Em ibai daunim tudak na givim lait gen long sol bilong yumi.
Dispela resis bilong ol disaipol bilong em ino wanpela sotpela resis ol i save kolim sprint; em wanpela resis bilong longpela rot ol i kolim maraton. Olsem na igat sampela we long hao bai yumi ron. Em i tru olsem, igat wanpela wei tasol long yumi lus long dispela resis, em sapos yumi givap olgeta.
Taim tasol we yumi wok yet long kirap na igo long Sevia bilong yumi, bai yumi iken winim dispela resis wantaim tos bilong yumi is lait moa yet.
Bikos dispela tos ino bilong soim aut yumi o bilong soim aut wanem samting yumi iken wokim.
Em bilong soim aut Sevia bilong dispela graun.
Na dispela Lait nogat man inap long tanim igo daun. Em Lait we ibai daunim tudak, em bai mekim olrait ol sik bilong yumi, na bai lait moa yet insait tu long namel long bikpela sori na bikpela tudak.
Dispela Lait em ibai abrusim olgeta save na hat long yumi long andastendim.
Gutpela long yumi wanwan long pinisim gut rot yumi ibin statim. Na wantaim halivim bilong Sevia na Ridima, Jisas Kraist, yumi bai pinisim wantaim hamamas na ol tos bilong yumi bai lait istap.
© 2015 by Intellectual Reserve, Inc. All rights reserved. Printim long USA. Tok orait long Inglis: 6/15. Tok orait long tanim tokples: 6/15. Tainim tok First Presidency Message, October 2015. Tok Pisin. 12586 878
Tising ikam long Dispela Toktok
Tingim long enkarigim ol lain we yu wok long tisim ol long lukluk bek long we ol istap nau long ‘resis’ long laif bilong ol wanwan. Ol tos bilong ol i lait moa yet o nogat? Yu iken ridim dispela hap toktok we itok olsem Lait bilong Kraist emi “Lait bilong daunim tudak, em bai mekim olrait ol sik bilong yumi, na bai lait moa yet insait tu long namel long bikpela sori na bikpela tudak.” Na tingim long diskasim wantaim ol lain we yu wok long tisim olsem hao Lait bilong Kraist ibin wok pinis insait long laif bilong ol long bipo na hao em ibai wok gen insait long laif bilong ol.