Cov Mus Saib Xyuas tom Tsev tsab Xov, Cuaj Hli Ntuj 2015
Tej Cwj Pwm ntawm Yexus Khetos: Muaj Hwj Chim thiab Muaj Yeeb Koob
Ua tib zoo thov Vajtswv kawm tej yam no thiab nug seb koj yuav tsum qhia dab tsi. Qhov uas koj to taub tus Cawm Seej tej cwj pwm yuav ua rau koj txoj kev ntseeg Nws loj tuaj thiab foom koob hmoov li cas rau cov uas koj mus saib xyuas tom tsev? Kom tau ntaub ntawv xov xwm ntxiv, cia li txuas rau reliefsociety.lds.org.
Kev Ntseeg, Tsev Neeg, Kev Pab
Cov vaj lug kub qhia peb tias Yexus Khetos tau txais hwj chim tag nrho, nyob saum ntuj thiab hauv ntiaj teb tib si, thiab Leej Txiv lub yeeb koob nyob nrog nws (saib Q&K 93:17). Txwj Laug M. Russell Ballard ntawm Pawg Kaum Ob tug Thwj Tim hais tias los ntawm lub hwj chim no peb tus Cawm Seej tau tsim lub ntuj thiab lub ntiaj teb, tau ua tej txuj ci tseem ceeb, thiab tiv tau txoj kev mob nyob hauv Khexemanes thiab Khavalis.1 Thaum peb to taub qhov no, peb txoj kev ntseeg Khetos yuav loj zuj zus tuaj, thiab peb haj yam yuav muaj zog.
Thaum peb ua thiab ua raws li kev khi lus hauv lub tuam tsev, tus Tswv foom koob hmoov muab Nws lub hwj chim rau peb. Linda K. Burton, Koom Haum Niam Tsev tus tuam thawj tswj hwm, hais tias: “Kev ua raws li peb tej kev khi lus yuav pab kom peb muaj zog, muaj hwj chim thiab kev pov hwm. …Tsis ntev tas los kuv ntsib ib tug phooj ywg tshiab. Nws ua tim khawv hais tias tom qab nws tau txais nws lub vaj txiaj ntsim hauv lub tuam tsev, nws muaj zog vim nws muaj hwj chim tiv tau tej kev ntxias.”2
Nifais ua tim khawv txog lub hwj chim ntawm kev khi lus: “Kuv, Nifais, tau pom Vajtswv tus Me Nyuam Yaj lub hwj chim, nws tau nqis los rau saum …tus Tswv cov neeg uas tau khi lus tseg, … thiab lawv tau muab txoj kev ncaj ncees los ua ntaj riam thaiv lawv thiab nrog rau Vajtswv lub hwj chim uas muaj yeeb koob heev” (1 Nifais 14:14).
Vaj Lug Kub Ntxiv
Los ntawm cov Vaj Lug Kub
Vim Yexus Khetos hlub Mathas thiab Maivliag, Yexus Khetos tsa nkawd tus nus Laxalus sawv hauv qhov tuag rov qab los los ntawm Vajtswv lub hwj chim uas Nws muaj.
Yexus tuaj txog Mathas thiab Maivliag lub tsev tom qab Laxalus nyob hauv lub ntxa tau plaub hnub lawm. Lawv mus rau Laxalus lub qhov ntxa, thiab Yexus txib kom lawv muab daim txiag zeb tshem tawm ntawm lub qhov ntxa. Yexus hais rau Mathas hais tias, “Kuv puas tau hais rau koj tias yog koj ntseeg koj yeej yuav pom Vajtswv lub hwj chim xwb no?” Ces nws thov Vajtswv Leej Txiv thiab “hu nrov nrov hais tias, Laxalus, koj cia li tawm los.
“Laxalus txawm tawm los, tej ntaub tseem qhwv nws tes taw thiab muaj ib daim ntaub npog nws lub ntsej muag.” (Saib Yauhas 11:1–45.) Tus Cawm Seej siv Nws lub hwj chim kom txhiv peb dim thiab muab hwj chim rau peb. Peb txoj kev ntseeg Nws yuav loj tuaj thaum peb nco ntsoov tias Nws muaj hwj chim thiab muaj yeeb koob.
(c) 2015 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub txhais ua lus Akiv : 6/15. Pub txhais ua lus Hmoob: 6/15. Translation of Visiting Teaching Message, September 2015. Hmong. 12589 295
Xav Txog Qhov No
Vajtswv lub hwj chim muab hwj chim thiab yeeb koob rau peb li cas?