Ngaahi Makamaile ʻo e Efiafi Fakafāmili ʻi ʻApí
ʻOku fakamanatua ʻe he efiafi fakafāmili ʻi ʻapí ha ongo meʻa lalahi ne hoko ʻi hono hisitōliá ʻi he 2015.
ʻI he taʻu ʻe teau kuo hilí, naʻe tapou ai ʻa Palesiteni Siosefa F. Sāmita (1838–1918) mo hono ongo tokoní ki he kāingalotu ʻo e Siasí ke tuku mavahe ha efiafi ke nau tupulaki mo ako fakataha ai. Naʻa nau palōmesi ko kinautolu te nau fai iá, te nau fakamoʻoniʻi ha ʻofa ʻoku lahi angé ʻi ʻapi pea mo ha talangofua lahi ange ki he mātuʻá. Naʻe ʻikai fuʻu foʻou e foʻi fakakaukau ʻo e efiafi fakafāmili ʻi ʻapí, ka naʻe tokoni e fakalotolahi ko ʻeni mei he Kau Palesitenisī ʻUluakí ʻi he ʻaho 27 ʻo ʻEpeleli 1915, ke toe lahi ange ai hono fai ʻo e meʻá ni.
ʻI he taʻu ʻe nimangofulu kuo hilí, naʻe fakafoʻou ʻe Palesiteni Tēvita O. Makei (1873–1970) ʻa hono fakamamafaʻi ʻo e efiafi fakafāmili ʻi ʻapí. ʻI Sānuali 1965, naʻá ne fakamafaiʻi ai ʻa e fuofua tohi lēsoni efiafi fakafāmili ʻi ʻapí, mo ha ngaahi lēsoni ke akoʻi fakauike ʻi ʻapi. ʻI he 1970, naʻe hoko ʻa e pō Mōnité ko e pō ia ne fokotuʻu ke fai ai ʻa e efiafi fakafāmili ʻi ʻapí.
ʻI he ʻahó ni, hili ʻeni ha taʻu ʻe 100 mei hono kamataʻí, pea hili ha taʻu ʻe 50 mei hono toe fakamamafaʻi ʻo hono mahuʻingá, ʻoku kei hoko pē ʻa e efiafi fakafāmili ʻi ʻapí ʻi he moʻui ʻa e kāingalotu ʻo e Siasí.