iVaqa ni Veisiko, Julai 2015

Na iVakarau Vakalou i Jisu Karisito: Veivosoti kei na Yalololoma

Vulica ena masumasu na itukutuku oqo ka vakasaqara mo kila na ka mo wasea. Ena vakalevutaka vakacava na nomu vakabauti Koya na kilai vakamatata ni bula kei na ilesilesi ni iVakabula ka vakalougatataki ira o vakaraica voli ena veisiko? Me ikuri ni itukutuku, lako ki na reliefsociety.lds.org.

Vakabauta, Matavuvale, Veivukei

Na kilai vakamatata ni sa dau veivosoti ka yalololoma o Jisu Karisito kivei keda sa rawa ni vukei keda meda veivosoti ka dulaka yani na yalololoma kivei ira na tani. “E sa noda Daunivakaraitaki o Jisu Karisito,” e tukuna o Peresitedi Thomas S. Monson. “Na Nona bula a vakasinaiti tu ena loloma. Na tauvimate e vakabula o Koya; na lolovira e laveta cake o Koya; na ivalavala ca e vakabula o Koya. O ira na dauvakacaca cudrucudru era vakamatei Koya. Ia e se voqa tikoga mai Kolikoca na veimala ni vosa: ‘I Tamaqu, kakua ni cudruvi ira; ni ra sa sega ni kila na ka era sa kitaka’—na ivakaraitaki cecere duadua ena bula oqo ni yalokauwai kei na loloma.”¹

Kevaka eda vosoti ira tale eso ena nodra cakacala, ena vosoti keda talega na Tamada Vakalomalagi. E kerei keda o Jisu “o koya mo dou qai yalololoma, me vaka sa yalololoma na Tamamudou” (Luke 6:36). “Na vosoti ni noda ivalavala ca e tiko na kena ivakarau,” e kaya o Peresited Dieter F. Uchtdorf, iKarua ni Daunivakasala ena Mataveiliutaki Taumada. “Sa dodonu meda veivutuni. … E sega beka ni o keda kece, ena dua na gauna, eda a tacake kina ki na idabedabe ni loloma veivueti ka kerea na loloma soli wale? Eda a sega ni diva ena noda igu taucoko mai loma na loloma veivueti—me da vosoti ena caka cala kei na ivalavala ca eda sa cakava? … Vakatara me veisautaka ka vakabula na yalomu na Veisorovaki nei Karisito. Dau veilomani. Dau veivosoti.”²

iKuri ni iVolanikalou

Maciu 6:14–15; Luke 6:36–37; Alama 34:14–16

Mai na iVolanikalou

“Me da dau veivosoti me vaka eda sa vosoti,” a tukuna o Elder Jeffery R. Holland ena Kuoramu ni iApositolo Le Tinikarua.³ Na italanoa ni gone cidroi e vakaraitaka vei keda na veivosoti ena rua na yasana: e dua na luvena tagane e sa vosoti ka sasaga dredre na kena ikarua me vosota.

Na luvena tagane gone e kauta kece na nona iyau, vakayagataka vakatotolo sara, ena gauna e sa tubu mai kina na lauqa, e sa nona cakacaka na vakana vuaka. E tukuna na ivolanikalou “ia ni sa kila yalona tale,” sa lesu tale ki vale ka kaya vei tamana e sa sega ni yaga me vakatokai me luvena. Ia sa vosoti koya o Tamana ka vakamatea na bulumakau uro ka ra sa kanavata. Na luvena tagane ka qase e lesu mai na cakacaka ena were ka sa cudru sara. A vakananumi tamana ni a qaravi koya voli ena vuqa na yabaki, ka sega ni talaidredre ki na nomu vosa, “ia ko sa sega sara ni solia vei au e dua na luve ni me, me keitou marau.” Ka kaya vua ko Tamana, “Na luvequ, edaru sa tiko vata vakadua, ia na ka kecega sa tu vei au sa nomu. Ia sa dodonu ga me da reki, ka marau: ni sa mate na tacimu oqo, ka sa qai bula tale; sa yali, ka sa qai kune tale” (raica na Luke 15:11–32).

© 2015 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/15. Vakadonui me vakadewa: 6/15. Vakadewa ni Visiting Teaching Message, July 2015. Fijian. 1287 858

Vakasamataka Oqo

Ena rawa vakacava ni yaga na veivosoti vei koya e veivosoti tiko?