Rongorongon Reirei ni Kakawari, Beberuare 2015
Anuan Iesu Kristo N Akea ana Bure
Tataromwaaka ni kamatebwaia te bwai n reirei aei ao n ukoukoria n ataia bwa tera ae ko na tibwauaia. E kanga am atatai ni maiun ao ana mwakuri te Tia Kamaiu ni karikirakea am onimaki Irouna ao ni kakabwaiaia naake ko tararuaia rinanon te reirei ni kakawari? Ibukin rongorongona riki tabeua, nakon reliefsociety.lds.org.
Onimaki, Utu, Buoka
Ara Tia Kamaiu, Iesu Kristo, bon tii ngaia te aomata are e kona ni karaoa te mwakuri ni kamaiu ibukiia aomata nako. Iesu Kristo, te tibu te teei ae akea ana bure, e anga ngaia iaon te bao ni karea ao e kabooi ara bure ni kabane,” e taku Beretitenti Dieter F. Uchtdorf, Kauoman ni Kauntira n te Moan Beretitentii.1 N ota raoi bwa Iesu Kristo bon akea ana bure e kona ni buokiira ni karikirakea ara onimaki irouna ao ni kataia ni kawakin Ana tua nako, n rairi nanora, ao ni kaitiakaki.
“Iesu … te aomata ae iai rabwatana ao tamneina, ma Ena aki bwaka n te kaririaki (taraa Motiaea 15:5),” e taku Unimwane D. Todd Christofferson man te Kooram n Abotoro ake Tengaun ma Uoman. “Ti kona n rairaki nakoina … ibukina bwa E ota. E ota n te kaangaanga, ao E ata naba bwa ti na kanga n tokanikai iaon te kaangangaa. …
“… Mwaakan Ana Mwakuri ni Kamaiu e kona ni kamaiunai rootakira n ara bure. Ngkana ti rairannano. Ana nanoanga ni motikitaeka e na kaitiakiira (taraa 3 Nibwaai 27:16–20). Kanga ai aron are ti tuai riinga te bure, kanga ai aron are ti tuai kaririaki.
“Ngkai ti beku mwaaka ni katoabong ao ni katoa wiiki n irira kawain Kristo, tamneira e rimoa ni kaota kakannatona, te itabarara inanora e na keerikaki, ao te kaririaki e na toki” 2
Rakan riki Booki aika Tabu
Man Koroboki aika Tabu
E kabooi mwiin ara bure te Tia Kamaiu rinanon Tibwangana n Riki bwa te Nati, maiuna n akea ana bure, Korakaina ao wawanakon Raraana n te Onaroka are i Ketetemwane, Matena iaon te kaibangaki ao manga Utina man te ruanimate. Rinanon Ana Mwakuri ni Kamaiu Iesu Kristo, ti kona ni bane ni manga kaitiakaki ngkai ti rairi nanora man ara bure.
Te Uea Beniamina e reireiniia ana botanaomata taekan ana Mwakuri ni Kamaiu Iesu Kristo ao imwiina e titirakiniia ngkana a kakoaua ana taeka. “A takarua n te bwana ae ti teuana ni kangai: … Tamnein te Uea … e a tia ni karika te bitaki ae moan te korakora iroura, ke inanora n te aro are akea te nano ni kan karaoa ae buakaka, ma n teimatoa ni karaoa ae raoiroi. …
“Ao ti a tauraoi ni karaoa te berita ae tabu ma Atuara bwa ti na karaoa nanona, ao ti na ongeaba nakon ana tua ni kabane ni bwaai ni kabane ake e na anga ana tua iai nakoira” (Motiaea 5:1–2, 5).
Ti kona naba ngaira ni karekea “te bitaki ae korakora” n ai aroia ana aomata te Uea ae Beniamina, are “akea te nano ni kan karaoa ae buakaka, ma n teimatoa ni karaoa ae raoiroi” (Motiaea 5:2).
© 2013 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki n te Ingiriti: 6/14. Kariaiakaki rairana: 6/14. Rairan te Visiting Teaching Message, February 2015. Kiribati. 12582 859
Iangoa Aio
E kanga te itiaki ni kaokoro ma te kororaoi?