Parau poroʻi na te mau tuahine hahaere, Tenuare 2015
Te huru o Iesu Mesia : E Tamaiti haapaʻo
A tuatapapa na roto i te pure i teie materia ma te imi ia ite e aha te faaite atu. Nahea te maramaramaraa i te oraraa e te ohipa a te Faaora e faarahi ai i to outou faaroo Ia’na e e haamaitai ai i te feia ta outou e haapa‘o nei na roto i te tere hahaereraa ? No te mau haamaramaramaraa hau atu, a haere i ni‘a i te reliefsociety.lds.org.
Te Faaroo, Te Utuafare, Te Totauturu
Na te peeraa i te hi‘oraa haapa‘o o Iesu Mesia e faarahi i to tatou faaroo i roto Ia’na. Ua parau Elder Jeffrey R. Holland no te Pŭpŭ no te Tino Ahuru Ma Piti Aposetolo, « E ohipa maere anei ua maʻiti te Mesia na mua roa ino i te faaite ia’na ia au i to’na auraa e to’na metua—o ta’na i here e o ta’na i haapaʻo i te parau e o ta’na i auraro mai te tamaiti faatura o ta’na i riro noa na ? … Ua riro te haapaʻo ei ture matamua o te raʻi ».1
Te haapii nei te mau papaʻiraa moʻa e, « ia noaa mai ia tatou te hoê haamaitairaa no ô mai na i te Atua ra, ua na roto ïa i te haapaʻoraa i taua ture i faatumuhiaʻi no te reira » (PH&PF 130:21). E haamata to tatou tupuraa pae varua ia haafatata’tu tatou i te Atua na roto i te haapaʻo e ia titau manihini tatou i te Taraehara o te Faaora i roto i to tatou oraraa.
Ua parau Elder D. Todd Christofferson no te Pŭpŭ no te Tino Ahuru Ma Piti Aposetolo e, « Ia ora ana‘e tatou na roto i te haapa‘oraa i te mau ture e te mau faaueraa a te evanelia a Iesu Mesia, e oaoa tamau noa ïa tatou i te mau haamaitairaa tei fafauhia e te Atua i roto i Ta’na fafauraa ia tatou. Na taua mau haamaitairaa ra e horo‘a mai i te mau rave‘a hinaarohia e tatou no te ohipa, eiaha noa râ ia ohipahia a ora noa’i tatou… E horo‘a rahi mai te haapa‘oraa ia tatou i te haavîraa rahi a‘e i to tatou iho mau oraraa, i te aravihi i te haere mai e i te haere atu, i te rave i te ohipa e i te hamani ».2
Te tahi atu mau irava papa‘iraa mo‘a
Luka 22:41–46; Te Parau Haapiiraa e te Mau Parau Fafau 82:10; 93:28
No roto mai i te mau papaʻiraa moʻa
« E ti‘a anei i te puai varua i te hotu na roto i te haapa‘o-tamau-raa i te mau faaueraa ia horo‘ahia i te tahi taata ê atu ? » ua ani Elder David A. Bednar no te Pŭpŭ no te Tino Ahuru Ma Piti Aposetolo. « Te pahonoraa papû… aita ».3
E hiʻoraa te parabole no na paratenia hoê ahuru no teie parau tumu. Ua rave na paratenia hoê ahuru i ta ratou lamepa « e haere atura e farerei i te tane faaipoipo apî ra », e pae anaʻe e mea paari e ua tuu ratou i te mori i roto i ta ratou lamepa. E pae e mea maamaa no te mea « aita… i hopoi atoa i te mori ».
Ua tae maira te parau tuô i te tuiraa pô : « Inaha, te haere mai nei te tane faaipoipo apî nei, e haere outou e farerei atu ia’na ». Ua faaineine aʻera pauroa na paratenia i ta ratou lamepa, areʻa aita faahou e mori a na paratenia maamaa ra. Ua parau aʻera i na paratenia paari e, « Ho mai i te tahi vahi i ta outou mori na ; te pohe nei hoʻi ta matou mau lamepa ».
Ua pahono atura na paratenia paari e, « Eiaha, o te ore hoʻi o te navaʻi ia opere na tatou atoa : e haere râ outou… e hoo atu ai i ta outou iho ». E a haere ai na paratenia maamaa, ua tae maira te tane faaipoipo apî e ua haere atura na paratenia paari na muri ia’na e « opanihia ihora te uputa »
© 2015 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane : 6/14. Parau faati‘a no te iritiraa : 6/14. Iritiraa no Visiting Teaching Message, January 2015. Tahitian. 12581 895
A feruri i teie
E aha te tahi mau hi‘oraa feia haapaʻo i roto i te mau papaʻiraa moʻa ?