Nakadungog Ko sa mga Bata
Joy Cromar, California, USA
Ang clinical depression mao ang usa ka butang nga dili na nako gustong masinati pag-usab. Apan human nga wala nako makasinati niini sulod sa 12 ka tuig, kini mibalik.
Nahadlok ug nabalaka ko pag-ayo. Nakapangutana ko sa Langitnong Amahan ug nag-ampo og kalig-on aron makasugakod sa akong pagsulay. Mihangyo usab ko Kaniya nga ang akong depresyon dili molungtad og lima ka tuig, sama sa nahitabo sa una.
Ang akong bana ug ako adunay tulo ka anak, duha ka lalaki ug usa ka babaye, kinsa mipanalangin namo og 13 ka apo. Nasayud sa kasubo nga akong giatubang, ang akong anak nga babaye mi-organisar sa pamilya og usa ka adlaw sa pagpuasa ug pag-ampo. Ang tanang mga apo, nag-edad og 1 hangtud 10, ganahan nga mag-ampo alang ni Lola, ug ang tulo kinsa nabunyagan na ganahan nga magpuasa. Makahupay nga masayud nga ang akong bana, mga anak, ug mga apo magpuasa ug mag-ampo alang kanako.
Pagkasunod adlaw sa akong pagmata gikan sa mubong pagkatulog, ang pagbati sa depresyon ingon og wala mograbe. Pagkasunod adlaw mas miarang-arang kini. Sa ikalima nga adlaw ang akong depresyon hingpit nga nawala. Nianang gabhiona, samtang naghunahuna ko kon sa unsang paagi kini nga milagro nahitabo, usa ka tingog mitandog sa akong kalag ug miingon kanako, “Nakadungog ko sa mga bata.” Ang Langitnong Amahan nakadungog kanila diha sa ilang kainosente ug mitubag sa ilang mga pag-ampo sa pagkamapainubsanon, hugot nga pagtuo, ug gugma.
Ang Manluluwas mitudlo:
“Gawas kon mangausab kamo, ug mangahimong sama sa mga gagmayng bata, dili gyud kamo makasulod sa gingharian sa langit.
“Busa bisan kinsa nga magpakaubos sa iyang kaugalingon sama niining gamayng bata, siya mao ang labing dako sa gingharian sa langit” (Mateo 18:3–4).
Akong nakaistorya akong mga apo ug nagpasalamat nila para sa pagpuasa ug pag-ampo alang kanako. Giingnan nako sila sa kadako sa akong gugma para nila. Giingnan nako sila nga ang Langitnong Amahan nakadungog nila ug mitubag sa ilang mga pag-ampo.
Samtang ang akong mga apo nagtubo sa ebanghelyo, naglaum ko nga sila mohinumdom sa panahon nga ang Langitnong Amahan miingon ngadto sa ilang lola, “Nakadungog ko sa mga bata.” Ug ako nanghinaut nga kining kasinatian makapalig-on sa ilang pagpamatuod ug makatabang nila nga magpabiling lig-on sa ebanghelyo.
Ang tanang mga apo, nag-edad og 1 hangtud 10, ganahan nga mag-ampo alang ni Lola, ug ang tulo kinsa nabunyagan na ganahan nga magpuasa.