2014
Misin Sarawi en Sises Krais: Soun Epwel
June 2014

Iren Mahsen en Padahk en Pas, Suhn 2014

Misin Sarawi en Sises Krais: Soun Epwel

Onopiki audepen padahk wet ni kapakap oh rapahki en ese dah me komwi en ehukihong mehteikan. Ia duwen wehwehki mour oh misin en Sounkomouro eh pahn kalaudehla omw pwoson Ih oh kapaiada irail akan me komw kin tetehk sang padahk en pas? Pwehn alehdi iren kapehse kapatapat, tehk reliefsociety.lds.org.

Pwoson, Peneinei, Sawas

Ni atail kin apwalih mehteikan, kitail wiahla soun idawehn Sises Krais mehlel kei, pwe ih me kihda karasaras ong kitail. President Thomas S. Monson mahsanih: “Mie diren aramas karanih kitail me ahniki anahn. … Kitail me wia limen Kauno pohn sampah, oh ahniki pwukoa en papah oh pwokada Sapwellime serihkan.”1

Linda K. Burton, president lap en Pwihn en Sawas en Lih, padahk: “Sang ni atail kin wie mwekmwekid, emenemen kitail kak duwehla Sounkomouro ni atail kin papah sapwellimen Koht serihkan. Pwehn sewese kitail en kamwahula [apwalih] emenemen, I men kihda mahsen pahieu en tamataman: ‘Keieu kilang mahs, mwuri papah.’ … Ni atail wia mwo, kitail kin kolokol inou sarawi kan, oh atail papah, duwehte ahn President Monson, pahn wia lipwen atail mour en tohnpadahk.”2

Kitail kak kapakap ehuehu nimenseng pwe kitail en kak kilelehdi ansou mwahu kan en papah mehteikan. “Sahm Nanleng pahn kaweiduhk, oh tohnleng kan pahn seweseiuk,” mahsanih David L. Beck, president lap en Pwihn en Mwahnakapw Akan. “Ke pahn alehdi manaman en kapaiada mour kan oh doarehla palingehn en aramas kan.”3

Sang Pwuhk Sarawi Kan

Madiu 20:25–28; 1 Nephi 11:27–28; 3 Nephi 28:18

Sang Atail Poadoapoad

Ni tiepene lap en Oaktohpe 1856, President Brigham Young (1801–77) pakairki me paionihr kan me kin doadoahngki riahka alialute nan sahpwtehno oh me aramas koaros en sawas kapokonepene dipwisoun sawas ong irail ansouohte. Lucy Meserve Smith ntingihdi me lih akan “kihsang pein arail urohs en loale, sidakin kan, oh dipwisou koaros me re sohte udahn anahne, wasao nan Tabernacle, oh kihda nan kuruma kan.”

Ni ansou me paionihr kan me epwellahr tepda peidi nan Salt Lake City, Lucy ntingihdi, “I sohte perenkihda ehu doadoahk nan ahi mour laudsang ansouo, pwehki minimin en pepehm me wiawi ansouo. Ihte me I anahne wia en pidelong nan sidohwa oh kasalehda ahi anahn; ma iei lepin likou, re sohngada oh tipwada oh kihongie ni sohte pweipwei.”4

President George Albert Smith (1870–1951) mahsanih duwen apwalih mehteikan: “Atail popohl soutuk pahn pahrekong uwen atail poaden sewese mehteikan.”5

Medewe Met

  1. Ia mwomwen kapakap kak kahrehiong kitail en wia mehn doadoahk nin limen Kauno?

  2. Ia mwomwen apwalih mehteikan kak sewese kitail en kapwaiada atail inou sarawi kan?

© 2014 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/14. Kamanaman ong kawehwe: 6/14. Kawehwehpen Visiting Teaching Message, June 2014. Pohnpeian. 10866 885

Iren sawas akan

  1. Thomas S. Monson, “What Have I Done for Someone Today?” Liahona, Nohpempe 2009, 86.

  2. Linda K. Burton, “First Observe, Then Serve,” Liahona, Nohpempe 2012, 78, 80.

  3. David L. Beck, “Your Sacred Duty to Minister,” Liahona, Mei 2013, 56.

  4. Lucy Meserve Smith, nan Daughters in My Kingdom: The History and Work of Relief Society (2011), 36–37.

  5. George Albert Smith, nan Daughters in My Kingdom, 77.