2014
Ti Nadiosan a Mision ni Jesucristo: Agserserbi
Hunio 2014

Mensahe iti Visiting Teaching, Hunio 2014

Ti Nadiosan a Mision ni Jesucristo: Agserserbi

Nainkararagan nga adalenyo daytoy a material ket kalikagumanyo nga ammuen no ania ti ibinglayyo. Kasano a ti pannakaawat iti biag ken mision ti Mangisalakan ket mangpapigsa iti pammatiyo Kenkuana ken mangbendision kadagiti ay-aywananyo babaen ti visiting teaching? Para iti ad-adu pay nga impormasion, mapan iti reliefsociety.lds.org.

Pammati • Pamilia • Tulong

Bayat ti panagserbitayo kadagiti dadduma, agbalintayo a pudno a pasurot ni Jesucristo, a nangipakita iti pagwadan para kadatayo. Ni Presidente Thomas S. Monson kinunana: “Napalawlawantayo kadagiti agkasapulan. … Datayo dagiti ima ti Apo ditoy daga, nga addaan iti bilin nga agserbi ken mangitag-ay kadagiti annakna.”1

Ni Linda K. Burton, Relief Society general president, insurona: “Babaen iti panangaramid, agbalin ti tunggal maysa kadatayo nga ad-adda pay a kas iti Mangisalakan no pagserbiantayo dagiti annak ti Dios. Tapno makatulong a nasaysayaat kadatayo nga [agserbi iti] tunggal maysa, kayatko nga isingasing ti uppat a balikas a laglagipen: ‘Umuna agpaliiw, kalpasanna agserbi.’ … No aramidentayo, agtungtungpaltayo kadagiti katulagan, ket ti panagserbitayo kas iti panagserbi ni Presidente Monson, ket pakakitaanto ti kinadisipulotayo.”2

Makapagkararagtayo iti tunggal agsapa tapno mailasintayo dagiti gundaway a pakapagserbiantayo kadagiti dadduma pay. “Tarabayennakanto ti Nailangitan nga Ama, ket tulongannakanto dagiti anghel,” kinuna ni David L. Beck, Young Men general president. “Maikkankanto iti bileg a mangbendision iti biag ken mangisalakan kadagiti kararua.”3

Manipud kadagiti Nasantuan a Kasuratan

Mateo 20:25–28; 1 Nephi 11:27–28; 3 Nephi 28:18

Manipud iti Pakasaritaantayo

Iti sapasap a komperensia idi Oktubre 1856, inwaragawag ni President Brigham Young (1801–77) nga agdaldaliasat pay laeng idi dagidi nagkauna a kameng nga agguyguyod iti karison iti Estados Unidos nga agturong iti Utah, ket nasken a tumulong ti amin iti panangummong a dagus kadagiti abasto para kadakuada. Insurat ni Lucy Meserve Smith a dagiti babbai “inikkatda dagiti petticoatda [dakkel nga akin-uneg iti palda], medias, ken tunggal banag a maispalda, idiay mismo a lugar iti Tabernakulo, ket pinagtutuonda [dagitoy] kadagiti bagon.”

Bayat ti panagrugi nga isasangpet dagiti naispal a nangkauna a kameng ti Simbaan iti Salt Lake City, insurat ni Lucy, “Diak kaano man naaddaan iti nalalaus pay a … ragsak iti ania man nga aramid a trinabahok iti biagko, gapu ta adda kasta a rikna ti panagkaykaysa kadagiti tao. Nasken laeng a mapanak iti maysa a pagtagilakuan tapno ipakaammok dagiti kayatko; no kawes daytoy a kasapulak, marukod, magetteng, ken maited kaniak nga awan bayadna.”4

Ni Presidente George Albert Smith (1870–1951) kinunana maipapan ti panagserbi kadagiti dadduma: “Ti agnanayon a ragsaktayo ket kapasetto ti wagas a panangidatontayo iti bagbagitayo iti panangtulong kadagiti dadduma.”5

Ibilang Daytoy

  1. Kasano a mangidalan ti kararag kadatayo tapno agbalintayo a ramit kadagiti ima ti Apo?

  2. Kasano a makatulong kadatayo ti panagserbitayo kadagiti dadduma nga agtungpal kadagiti katulagantayo?

© 2014 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/14. Pannakaanamongna a maipatarus: 6:14. Pannaakaipatarus ti Visiting Teaching Message, June 2014. Ilokano. 10866 864

Dagiti Nagadawan

  1. Thomas S. Monson, “Ania ti Naaramidko para iti Maysa a Tao Ita?” Liahona, Nob. 2009, 86.

  2. Linda K. Burton, “First Observe, Then Serve,” Liahona, Nob. 2012, 78, 80.

  3. David L. Beck, “Your Sacred Duty to Minister,” Liahona, Mayo 2013, 56.

  4. Joseph Fielding Smith, iti Daughters in My Kingdom: The History and Work of Relief Society (2011), 36–37.

  5. George Albert Smith, iti Daughters in My Kingdom, 77.