Di Magatadan a Tawid ti Namnama
No pilienyo nga aramiden wenno tungpalen ti katulagan iti Dios, pilienyo a mangibatikayonto iti maysa a tawid ti namnama kadagiti mabalin a mangsurot iti pagwadanyo.
Patpatgek a kakabsatko, sumagmamano kadakayo ti inawis iti daytoy a miting dagiti misionario ti Ti Simbaan ni Jesucristo dagiti Santo iti Ud-udina nga Aldaw. Mabalin nga inawisnakayon dagita a misionario nga agaramid iti pili a pannakitulag iti Dios babaen ti panagpabuniag.
Dadduma kadakayo ti dumdumngeg gapu ta inawatyo ti awis ti maysa a nagannak, ti maysa nga asawa, wenno nalabit ti maysa nga ubing, naited kadakayo iti namnama a pilienyonto nga aramiden a sentro ti biagyo dagiti katulagan nga inaramidyon iti Dios. Sumagmamano kadakayo a dumdumngeg ti nakaaramiden iti pili nga agsubli a mangsurot iti Mangisalakan ken makarikna ita iti rag-o ti panangawatna.
Asinokayo man ken sadino man ti mabalin a yanyo, iggemyo ti ragsak ti ad-adu pay a tattao ngem iti mapanunotmo. Inaldaw ken inoras a makapagpilika nga agaramid wenno agtungpal iti katulagan iti Dios.
Sadino man ti yanyo iti dana a mangtawid iti sagut ti agnanayon a biag, addaanka iti gundaway a mangipakita iti adu a tattao ti dana nga agturong iti dakdakkek a ragsak. No pilienyo nga aramiden wenno tungpalen ti katulagan iti Dios, pilienyo a mangibatikayonto iti maysa a tawid ti namnama kadagiti mabalin a mangsurot iti pagwadanyo.
Naparaburankayo ken naparaburannak iti kari ti kasta a tawid. Utangko a naimbag a nakem ti ragsakko iti biag iti maysa a lalaki a diak kaano man naam-ammo iti daytoy a biag. Maysa isuna nga ulila a nagbalin a maysa kadagiti lelongko iti tumeng. Imbatiannak iti maysa a di magatadan a tawid ti namnama. Isaritak kadakayo ti sumagmamano iti paset nga inakemna iti panangtawid iti dayta a tawid para kaniak.
Heinrich Eyring ti naganna. Nayanak isuna a nakabakbaknang. Addaan ti amana ni Edward, iti dakkel a a daga iti Coburg, a Germany itan. Viscountess Charlotte Von Blomberg ti nanangna. Ti amana ti agay-aywan kadagiti daga ti ari ti Prussia.
Ni Heinrich ti umuna a lalaki nga anak da Charlotte ken Edward. Natay ni Charlotte idi agtawen iti 31, kalpasan ti ipapasngay ti maikatlo nga anakna. Natay ni Edward nabiit kalpasanna, napukawna ti amin a sanikua ken kinabaknangna iti napaay a puonan. Agtawen isuna iti 40. Pinanawanna ti tallo a naulila nga ubbing.
Ni Heinrich, ti lelongko iti tumeng, napukawna dagiti nagannak kenkuana ken ti dakkel a nailubongan a tawidna. Awan ti kuartana. Insuratna iti pakasaritaanna a nariknana ti kadakkelan a namnamana ket ti ipapanna iti America. Nupay awan ti pamilia wenno gagayyemna idiay, nakarikna iti namnama maipapan iti ipapanna iti America. Immuna a napan isuna iti Siudad ti New York. Idi agangay immakar isuna iti St. Louis, Missouri.
Iti St. Louis maysa kadagiti katrabahuanna ti maysa a Santo iti Ud-udina nga Aldaw. Manipud kenkuana nagun-odna ti kopia ti polieto nga insurat ni Elder Parley P. Pratt. Binasana daytoy ket kalpasanna inadalna ti tunggal balikas a magun-odna maipapan kadagiti Santo iti Ud-udina nga aldaw. Inkararaganna a maammuan no adda a talaga dagiti anghel a nagpakita kadagiti tao, no adda sibibiag a propeta, ken no nasarakannan ti pudno ken naipalgak a relihion.
Kalpasan ti dua a bulan a naannad a panagadal ken panagkararag, nagtagtagainep ni Heinrich a nakaibagaan kenkuana nga agpabuniag. Maysa a lalaki a ti nagan ken priesthood ket sagrado iti pananglagipko, ni Elder William Brown, ti nasken a mangannong iti ordinansa. Nabuniagan ni Heinrich iti maysa a tanke ti danum ti tudo idi Marso 11, 1855, iti 7:30 iti bigat.
Mamatiak nga ammo ni Heinrich Eyring idin a pudno ti isursurok ita. Ammona a ti ragsak ti agnanayon a biag ket sumangbay babaen kadagiti panaglalalangen ti pamilia nga agtultuloy iti agnanayon. Nupay itay kallabes laeng a nasarakanna ti plano ti Apo iti ragsak, ammona idin a ti namnamana para iti agnanayon a rag-o ket agpannuray kadagiti nawaya a pili dagiti dadduma a sumurot iti pagwadanna. Agpannuray ti namnamana iti agnanayon a ragsak kadagiti tao a saan pay a nayanak.
Kas paset ti tawid ti namnanama iti pamiliami, imbatina ti maysa a pakasaritaan kadagiti an-annabona.
Iti dayta a pakasaritaan mariknak ti ayatna para kadatayo a mangsurot kenkuana. Kadagiti balikasna mariknak ti namnamana a dagiti an-annabona ket mabalinda a pilien ti sumurot kenkuana iti dana nga agsubli iti nailangitan a pagtaengan. Ammona a daytoy ket saan a resulta ti maymaysa a panagpili no di adu a babassit a pili. Adawek manipud iti pakasaritaanna:
“Manipud iti kanito a damo a nangngegak a nagsarita ni Elder Andrus … kanayon a dinar-ayak ti miting dagiti Santo iti Ud-udina nga Aldaw ken manmano a talaga a diak makadar-ay iti miting, gapu ta pagrebbengak ti dumar-ay iti daytoy.
“Isuratko daytoy iti pakasaritaak tapno matulad dagiti annakko ti pagwadak ken saandanto pulos maliwayan daytoy … napateg a pagrebbengan [a makitipon] kadagiti Santo.”1
Ammo ni Heinrich a kadagiti miting ti sakramento mapabarotayo ti karitayo a kanayon a manglaglagip iti Mangisalakan ken maaddaan iti Espirituna kadatayo.
Daytoy ti Espiritu a nangtulong kenkuana iti mision a nakaawaganna sumagmamano a bulan kalpasan ti panangawatna iti katulagan ti panagbunaig. Imbatina kas tawidna ti pagwadanna iti panagtalinaed a napudno iti misionna iti uneg ti innem a tawen iti naawagan idi a dagiti Teritorio ti India. Tapno ma-release manipud iti misionna, nagna manipud iti Oklahoma agingga iti Siudad ti Salt Lake, maysa a distansia ti mapattapatta a 1,100 a milia (1,770 km).
Nabiit kalpasan dayta inawagan isuna ti propeta ti Dios nga umakar iti akin-abagatan a Utah. Manipud ditoy sinungbatanna ti sabali pay nga awag nga agserbi ii mision iti nakayanakanna a Germany. Inawatna kalpasanna ti awis ti maysa nga Apostol ni Apo Jesucristo tapno tumulong a mangbangon kadagiti kolonia dagiti Santo iti Ud-udina nga Aldaw iti akin-amianan a Mexico. Manipud idiay naawagan manen isuna iti Siudad ti Mexico kas full-time a misionario. Impatungpalna dagita nga awag. Naitanem isuna iti bassit a sementerio iti Colonia Juárez, Chihuahua, Mexico.
Diak estoriaen dagitoy a pasamak tapno ipadamag nga isu ket naindaklan wenno ti inaramidna wenno naisangsangayan dagiti an-annabona. Estoriaek dagita a pasamak tapno dayawek ti pagwadanna iti pammati ken namnama nga adda iti pusona.
Inawatna dagita nga awag gapu iti pammatina a ti nagungar a Cristo ken ti Nailagitan nga Amatayo ket nagpakita ken ni Joseph Smith iti kakaywan iti estado ti New York. Inawatna dagitoy gapu ta addaan isuna iti pammati a naisublin dagiti tulbek ti priesthood iti Simbaan ti Apo nga addaan iti bileg a mangilantip kadagiti pamilia iti agnanayon, no laeng naaddaanda iti umdas a pammati nga agtungpalda kadagiti katulaganda.
Kas ken ni Heinrich Eyring, ti kapuonak, mabalin a dakayo ti kaunaan iti pamiliayo a mangidaulo iti dalan nga agturong iti agnanayon a biag iti dana dagiti sagrado a katulagan a naaramid ken natungpal nga addaan iti kinapasnek ken pammati. Tunggal katulagan ket buyogan dagiti pagrebbengan ken kari. Para iti amin kadatayo, kas idi ken ni Heinrich, simple no dadduma dagita a pagrebbengan ngem masansan a narigat no dadduma. Ngem laglagipen, nasken nga agbalin a narigat no dadduma dagiti pagrebbengan gapu ta ti panggepda ket mangtignay kadatayo iti dana nga agbiag iti agnanayon kas pamilia a kadennatayo ti Nailangitan nga Ama ken ti Ay-ayatenna nga anak, ni Jesucristo.
Laglagipenyo dagiti balikas manipud iti libro ni Abraham:
“Ket nagtakder iti ummong ti maysa kadakuada a kasla Dios, ket kinunana kadagiti adda a kaduana: Bumabatayo, ta adda lugar sadiay, ket alaentayo dagitoy a kasapulan, ket mangaramidtayo iti daga a pagtaengan dagitoy;
“Subokentayo ida iti daytoy,” kinuna ti Apo, “ta kitaentayo no aramidenda amin a banag nga ibilin kadakuada ti Apo a Diosda.”
“Ket dagiti agtalinaed iti immuna a kasasaadda manayonandanto; ket dagiti saan nga agtalinaed iti immuna a kasasaadda awanto ti gloriada iti isu met la a pagarian dagiti agtalined iti immuna a kasasaadda; Ket dagiti agtalinaed iti maikadua a kasasaadda addanto gloria a mainayon iti uloda iti agnanayon nga awan inggana.”2
Agpannuray ti panagtalinedtayo iti maikadua a kasasaadtayo iti panagaramidtayo kadagiti katulagan iti Dios ken sipupudno a panangaramidtayo kadagiti pagrebbengan nga idawatda kadatayo. Masapul a mamatitayo ken ni Apo Jesucristo kas Mangisalakantayo tapno matungpal dagiti sagrado a katulagan iti tungpal biag.
Gapu ta natnag da Adan ken Eva, sulisog, pannubok, ket ipapatay ti tawidtayo amin. Nupay kasta, inikkannatayo ti Nailangitan nga Amatayo iti sagut ti Ay-ayatenna nga Anak, ni Jesucristo, kas Mangisalakantayo. Dayta naindaklan a sagut ken parabur ti Pannubbot ni Jesucristo ti mangisangbay iti tawid ti amin: ti kari ti Panagungar ken ti posibilidad ti agnanayon a biag iti amin a mayanak.
Ti kaindaklanan iti amin a parabur ti Dios, ti agnanayon a biag, ket sumangbayto laeng no agaramidtayo kadagiti katulagan iti pudno a Simbaan ni Jesucristo nga inted dagiti napusgan a katulonganna. Gapu iti Pannakatnag, kasapulantayo laeng dagiti pangpadalus nga epekto ti panagbuniag ken ti panagipatay kadagiti ima tapno umawat iti sagut ti Espiritu Santo. Dagitoy nga ordinansa ket nasken nga annongen dagiti addaan iti umno nga awtoridad ti priesthood. Kalpasanna, iti tulong ti silaw ni Cristo ken ti Espiritu Santo, matungpaltayo amin dagiti katulagan nga aramidentayo iti Dios, nangruna kadagiti maited kadagiti templo. Iti laeng dayta a wagas, ket iti dayta a tulong, mabalin a maala ti asino man ti maikari a tawidna kas anak ti Dios iti maysa a pamilia iti agnanayon.
Iti sumagmamano a dumdumngeg kaniak, kasla awan ti namnama dayta nga arapaap.
Nakitayon a nagladingit dagiti napudno a nagannak kadagiti annakda a nagsukir wenno nangpili a manglabsing kadagiti katulaganda iti Dios. Ngem mabalin a mapagtalna ti puso ken maaddaan iti namnama dagita a nagannak manipud kadagiti padpadas dagiti daddduma a nagannak.
Nagsubli ti anak a lalaki ni Alma ken dagiti annak a lallaki ni Ari Mosiah manipud iti naulpit a panagalsa a maibusor kadagiti katulagan ti Dios. Nakita ni Alma nga Ub-ubing ti managbasol nga anakna a ni Corianton a nagbalin a napudno ti panagserbina. Nakasurat iti Libro ni Mormon ti milagro dagiti Lamanite nga ipaknida dagiti tradision ti pananggura iti kinalinteg tapno makitulag a matay tapno mapagtalinaed ti talna.
Naibaon ti maysa nga anghel ken ni ubing nga Alma ken kadagiti annak ni Mosiah. Immay ti anghel gapu iti pammati ken karkararag dagiti ammada ken dagiti annak ti Dios. Manipud kadagita a pagwadan ti bileg ti Pannubbot a mangbalbaliw iti puspuso dagiti tao, makaawatkayo iti tured ken liwliwa.
Inikkannatayo amin ti Apo iti pagtaudan ti namnama no ikarigatantayo ti tumulong kadagitay ay-ayatentayo nga umawat iti agnanayon a tawidda. Nagaramid isuna kadagiti kari kadatayo iti agtultuloy a panangikarigatantayo a mangummong kadagiti tao Kenkuana, uray no pagkedkedanda ti awisna a mangaramid iti kasta. Ti panagkedkedda ti mangpaladingit Kenkuana, ngem saan Isuna a sumuko, wenno nasken a ditayo sumuko. Ipakitana ti naan-anay a pagwadan para kadatayo iti daytoy a naregget nga ayatna: “Ket manen, no namin-ano a daras ti panangummongko kadakayo a kasla iti panangummong ti pamusian kadagiti piekna iti sirok dagiti payakna, wen, O dakayo a tao iti balay ti Israel, a narba; wen O dakayo a tao ti balay ti Israel, dakayo a nagnaed iti Jerusalem, a kas kadakayo a natnag; wen, no namin-ano a ti panangummongko kadakayo a kasla iti panangummong ti pamusian kadagiti piekna, ket diyo ammo.”3
Manamnamatayo ti awan pagkamtudanna a tarigagay ti Mangisalakan a mangyeg iti amin nga espiritu nga annak ti Nailangitan nga Ama nga agsubli iti pagtaenganda a kadenna Isuna. Kasta met ti tarigagay ti tunggal napudno a naganak, lelong ken lelang, ken lelong ken lelang iti tumeng. Ti Nailangitan ngaAma ken ti Mangisalakan ti naan-anay a pagwadantayo iti no ania ti kabaelan ken nasken nga aramidentayo. Dida kaano man ipapilit ti kinalinteg gapu ta nasken a mapili ti kinalinteg. Ipariknada ti kinalinteg kadatayo, ken ipalubosda a makitatayo a naimas dagiti bungana.
Tunggal tao a mayanak iti lubong ket umawat iti Silaw ni Cristo, a makatulong kadatayo a mangkita ken mangrikna no ania ti umno ken no ania ti biddut. Nangibaon ti Dios kadagiti mortal a katulonganna a, babaen ti Espiritu Santo, makatulongda kadatayo a mangilasin no ania koma ti ipaaramidna kadatayo ken no ania ti iparitna. Inaramid a makaay-ayo ti Dios a pilientayo iti umno babaen ti panangipariknana kadatayo dagiti epekto dagiti pilitayo. No pilientayo ti umno, masarakantayto ti ragsak—no dumteng ti panawen. No pilientayo ti dakes, dumteng ti panagladingit ken panagbabawi—no dumteng ti panawen. Awan duadua a mariknatayo dagita nga epekto. Nupay kasta masansan a maitantan dagitoy gapu iti maysa a panggep. No dumteng a dagus dagiti parabur, saan a mangpapigsa iti pammati ti panagpili iti umno. Ken gapu ta maitantan unay no dadduma ti panagladingit, kasapulan ti pammati tapno marikna a kasapulan ti dumawat iti pammakawan iti basol a nasapsapa imbes a kalpasan a mariknatayo ti ladingit ken sakit nga epekto daytoy.
Nagladingit ni Ama Lehi kadagiti pili nga inaramid ti sumagmamano kadagiti annakna a lallaki ken dagiti pamiliada. Isu ket naindaklan ken nasayaat a tao—maysa a propeta ti Dios. Masansan a nagpaneknek kadakuada maipapan iti Mangisalakantayo, ni Jesucristo. Isu ti pagwadan ti panagtungpal ken serbisio idi inawagan ti Apo isuna a mangpanaw iti amin a nailubongan a sanikuana tapno maispal ti pamiliana manipud iti pannakadadael. Iti mismo a gibus ti biagna, agpampaneknek pay laeng kadagiti annakna. Kas iti Mangisalakan—ken iti baet ti bilegna a mangrikna iti puspusoda ken kumita iti masakbayan agpadada a naliday ken nakaskasdaaw—nagtalinaed a nakaunnat dagiti takiagna a mangaw-awis iti pamiliana nga agturong iti pannakaisalakan.
Ita minilmilion kadagiti an-annabo ni Ama Lehi ti mangipakpakita a husto ti namnamada kadakuada.
Ania ti kabaelanyo ken kabaelak nga aramiden manipud iti pagwadan ni Lehi? Masursuruantayo manipud iti pagwadanna babaen ti nainkararagan a panagadal iti nasantuan a kasuratan ken panangpaliiw.
Isingasingko a kitaenyo ti agpada nga ababa ken nabayag nga epekto iti panangikarigatanyo a mangted iti tawid ti namnama iti pamiliayo. Iti saan a mabayag, addanto dagiti riribuk ket sulisogennatayo ni Satanas. Ken adda dagiti banag a siaanus nga ur-urayen, nga addaan iti pammati, nga ammotayo nga agtignay ti Apo iti bukodna a panawen ken iti bukodna a wagas.
Adda dagiti banag a maaramidyo a nasapsapa, no ubbing pay dagiti ipatpategyo. Laglagipen a ti inaldaw a panagkararag a sangapamiliaan, panagadal iti nasantuan a kasuratan a sangapamiliaan, ken panangiburay iti pammaneknektayo iti miting ti sakramento ket nalaklaka ken nasamsamay no ubbing pay dagiti annak. Masansan nga ad-adda a sensitibo iti Espiritu dagiti babassit nga ubbing ngem iti ammotayo.
No nataengandan, malagipdanto dagiti himno a kinantada a kaduadakayo. Ad-adda pay ngem iti pananglagipda iti musika, malagipdanto dagiti balikas ti nasantuan a kasuratan ken pammaneknek. Ipalagip Espiritu Santo ti amin a banag kadakuada, ngem napapautto nga amang dagiti balikas ti nasantuan a kasuratan ken himno. Dagita a lagip ti mangguyodto kadakuada no mayaw-awandanto iti dalan, mabalin nga iti adu a tawen, a mangisubli nga agawid nga agturong iti agnanayon a biag.
Kasapulantayonto ti napaut a pannirigan no marikna dagiti ipatpategtayo a kasla narimbawan ti guyod ti lubong ken ti ulep ti panagduadua ti pammatida. Addaantayo iti pammati, namnama, ken panangngaasi a mangtarabay kadatayo ken mangpapigsa kadatayo.
Nakitakon dayta kas maysa a mamagbaga iti dua a sibibiag a propeta ti Dios. Tattaoda nga addaan kadagiti naidumduma a kababalin. Ngem kasla agpadada a napintas iti pannirigan. No ipakaammo ti maysa a tao ti problemana maipapan iti Simbaan, ti gagangay unay a sungbatda ket “Agsayaatto ti amin.” Gagangay nga ad-adu ti ammoda maipapan iti problema ngem kadagiti tao nga agdandanag maipapan iti daytoy.
Ammoda pay ti wagas ti Apo, isu a kanayon a namnamaenda ti pagarianna. Ammoda nga Isu ti pangulona. Isu ti kabilgan iti amin ken manangisakit Isuna. No bay-anyo nga Isu ti dadaulo ti pamiliayo, agsayaatto ti amin.
Kasla nayaw-awan ti sumagmamano nga an-annabo ni Heinrich Eyring. Ngem adu kadagiti appokona iti tumeng ti mapan kadagiti templo ti Dios iti 6:00 iti bigat tapno agannongda kadagiti ordinansa para kadagiti kapuonanda a dida pay naam-ammo. Rummuarda gapu iti tawid ti namnama nga imbatina. Imbatina ti tawid nga al-alaenen dagiti adu nga an-annabona.
Kalpasan ti amin a naaramidtayo nga addaan iti pammati, ikkan kalinteganto ti Apo dagiti namnamatayo para kadagiti naindaklan a parabur para kadagiti pamiliatayo ngem iti kabaelantayo a panunoten. Tarigagayanna ti kasayaatan para kadakuada ken para kadatayo, kas annakna.
Annaknatayo amin ti sibibiag a Dios. Ni Jesus a Nazareno ti Ay-ayatenna nga Anak ken ti nagungar a Mangisalakan. Daytoy ti Simbaanna. Ditoy dagiti tulbek ti priesthood, ket iti kasta mabalin nga agnanayon dagiti pamilia. Daytoy ti di magatadan a tawid ti namnama. Paneknekak a pudno daytoy iti nagan ni Apo Jesucristo, amen.
© 2014 ti Intellectual Reserve, Inc. Nailatang amin a karbengan. Printed in USA. English approval: 6/13. Translation approval: 6/13. Pannakaipatarus ti Visiting Teaching Message, May 2014. Ilokano. 10865 864