“Fuʻu Faingofua ia, Kulenipā!”
Mei ha lea ʻi he konifelenisi lahi ʻo ʻEpeleli 2013.
“ʻOku mou kumi lahi ʻi he ngaahi Tohi tapú koeʻuhí ʻoku mou ʻamanaki ke maʻu ai ʻa e moʻui taʻengatá: pea ko ia ia ʻoku fakamoʻoni kiate aú” (Sione 5:39).
ʻOku ou ʻofa he Tohi ʻa Molomoná mo hoku Fakamoʻui ko Sīsu Kalaisí. ʻI ha ʻaho ʻe taha ne u kole ki hoku mokopuna fefine ko Lesielí pe ko e hā haʻane fakakaukau ʻo kau ki hano fokotuʻu ha taumuʻa ke ne lau ʻa e Tohi ʻa Molomoná. Naʻe toki potó ni pē ʻa Lesieli he laukongá.
Naʻá ne pehē mai, “ʻE Kulenipā, ʻoku fuʻu faingataʻa. Ko ha tohi lahi ia.”
Ne u kole ange ke ne lau mai ha peesi ʻe taha. Ne u toʻo hake ha uasi ke taimiʻi ʻene laú. Naʻe feʻunga pē mo e miniti ʻe tolu ʻene lau e pēsí.
ʻOku mau lau ʻa e Tohi ʻa Molomoná ʻi he lea faka-Sipeiní, pea ʻoku peesi ʻe 642 e Tohi ʻa Molomoná ʻi he lea faka-Sipeiní. Naʻá ku talaange ki ai te ne lava ʻo lau kotoa e tohí ʻi ha miniti pē ʻe 1,926.
Mahalo naʻe mei lahi ange ai ʻene manavaheé, ko ia ne u vahevahe e mataʻifika ko iá ʻaki e miniti ʻe 60. Ne u talaange ki ai te ne fie maʻu pē ʻa e houa ʻe 32 ke ne lau ai e tohí. ʻE siʻisiʻi ange ia he ʻaho ʻe taha mo e kongá!
Peá ne pehē mai kiate au, “Fuʻu faingofua ia, Kulenipā!”
Naʻe fakaʻaongaʻi ʻe Lesieli mo hono tuongaʻane ko ʻEsitepaní, mo homa makapuna kehé, ha taimi lahi ange ke nau lau ai e Tohi ʻa Molomoná. Ko hono ʻuhingá he ko e taimi ʻoku tau lau aí, ʻoku fie maʻu ke tau tuku ha taimi ke fai ai ha lotu mo fakakaukau ki he meʻa ne tau laú.
Te tau lava kotoa pē ke ako ke ʻofa he folofolá ʻo hangē pē ko Lesieli mo ʻEsitepaní. Pea te tau lava kotoa ʻo kalanga: “ʻOku huʻa melie lahi hoʻo ngaahi folofolá ki hoku [uʻá]! ʻio, ʻoku melie lahi ʻi he honí ki hoku ngutú!” (Saame 119:103).