Iren Mahsen en Presidensi Keieu, Mahs 2014
Papah oh Mour Soutuk
Sounkomouro iei atail mehn kahlemeng en papah ni tohnmetei. Sapwellime mour unseko poadedi ong papah Sahm Nanleng oh koaros Sapwellimen Seme serihkan. Kahrepen minimin en Sahmo oh Naho iei en ketkihieng kitail koaros kisakis en mour poatoapoat oh kapai en mour soutik (tehk Moses 1:39).
Pwehn warohng mour soutuk, kitail anahne weliakapwala sang ni Tomw en Sises Krais—ipw sapahl oh mwakelekelda sang dihp. Kisin serihkan me mih pahnangin sounpar waluh, uhdahno, sohte dipan oh kin komourla pwehki Tomwo (tehk Mosiah 3:16, 21; Moroni 8:10–12).
Ong kitail koaros me kin lel sounpar en kepwukoahki atail pilipil kan, mie pilahn kaselel ehu me kin mweidehng kitail en kak kamwakelda sang dihp oh kaunop ong mour soutuk. Kaunop wet kin tepida ni pepdais sang manaman en priesthood oh alahldi en Ngehn Sarawio. Eri kitail anahne taman ansou koaros Sounkomouro oh kolokol kosonned akan me E ketkihieng kitail.
Nanmwarki Benjamin mahsanihieng sapwellime aramas akan nan Pwuken Mormon duwen peren me kin kohdo ni atail kin pehm mahk sang dihp pwehki Tomw en Sises Krais. Ih eri padahkihieng irail me en alehdi lapwepen diparail kan, irail anahne padahkihieng neirail serihkan duwen papah emenemen oh duwen arail anahne wia uwen arail kak en sapan pwehn apwaliala anahn en paliwar oh pali ngehn en aramas akan. (tehk Mosiah 4:11–16.)
E pil padahngki, “Oh kilang, I ndaiong kumwail pwe kumwail en kak marainkihla; pwe kumwail en kak esehla me ni ahnsou me kumwail kin mihla nan amwail papah kempoakpamwail akan, kumwail kin mihte nan amwail kin papah Koht” (Mosiah 2:17).
Sises pil ketseli padapadahngki Sapwellime rongamwahuo oh wiewiahda me mwahu (tehk Wiewia Kan 10:38). E ketin kakehlahda me soumwahu. E ketin kaiasada me melahr akan. Sang ni Sapwellime manaman E ketin katungoale kid kan ansou me irail men mwenge oh sohte kanarail mwenge (tehk Madiu 14:14–21; Sohn 6:2–13). Mwurin Sapwellime Kaiasadao E katungoale ekei Sapwellime Wahnpoaron oko ni arail peidi pohn oaroahr en Lehn Kalili (tehk Sohn 21:12–13). Nan sapwen America kan, E ketin kakehlahda me soumwahu oh kapaiada emenemen serihkan (tehk 3 Nephi 17:7–9, 21).
Seims Wahnpoarono padahkihieng kitail duwen ngoang en papah mehteikan eh kin uhsang atail kapingki me Kauno ketin wiahiongkitailehr:
“A me kin tehk mwahu kosonned unseko me kin kasaledekala aramas, me iei rongamwahu en Krais, oh kin dadaurete, sohte kin rongete oh manokehla, ahpw kapwaiada -iei aramas menet me Koht pahn ketin kapaiada ni mehkoaros me e pahn kin wia. …
“Eri, iet duwen poadidi ong papah Koht me uhdahn pwung oh unsek mehlelen me Samatail Koht kin ketin kupwurki: apwalih me sepwoupwou kan oh liohdi kan nan ar apwal akan, oh dehr saminkihla tiahk suwed kan en sampah wet” (Seims 1:25, 27).
Ehu kamehlel me komw wie mwakmwakelekeldahr iei lalaudlahn ngoang en papah mehteikan pwehki Sounkomouro. Padahk en ihmw oh padahk en pas kin wiahla mehkot kaperen oh solahr wia mehkot me toutou. Komw kin diarada me omw sawas wie lalaudla ong mehteikan nan wasahn sukuhl de ni sewese me semwehmwe nan amwail wasahn kousoan. Mendahte eh tikitik uwen mwohni me komw naineki pwehn kihieng irail me ahniki tikitiksang komwi, komw inangih en naineki laud pwe komw en kak kihda laudla (tehk Mosiah 4:24). Komw kin diarada me komw ngoangki papah noumw serihkan on kasalehieng irail duwen papah mehteikan.
Ni mwohmwomw kan ahr pahn wekila, komw pahn pehm ngoang en kihda laudlahn papah ni omw sohte pahn rapahki aramas en pohnese. I ese tohnpadahk en Sounkomouro me kin kihda kisakis lap en mwohni oh papah ni loaloapwoat me sohte me ese likin Koht oh neirail serihkan. Koht ketin kasawiadahr arail doadoahk sang ni kapaiada irail nan mour wet, oh E pahn ketin kapaiada irail nan mour soutik me kohkohdo (tehk Madiu 6:1–4; 3 Nephi 13:1–4).
Ni omw kin kapwaiada kosonned en papah mehn mpomw kan, (tehk Madiu 22:39), komw pahn pehm wekidekla en omw pepehm kan en pohnmwahso. Sounkomouro kapwungala Sapwellime Wahnpoaron akan ni arail akupwungki ihs me pahn keieu lapalap rehrail. E mahsanih:
“Kumwail dehr pil ngoangki aramas akan en wiahkin kumwail arail ‘Kaun,’ pwe amwail kaun metehmen, iei Mesaia.
“Eri me keieu lapalap rehmwail, ih me pahn wia amwail sounpapah” (Madiu 23:10–11).
Sounkomouro padahngki duwen atail kak esehla papah mehteikan. E ketin papah ni unsek, oh kitail anahne esehla papah duwen me E ketin esehla—lain pohn lain (tehk D&C 93:12–13). Sang papah me kitail kin kihda, kitail kak duwehla Ih. Kitail pahn kapakapki kehl en mohngiongitail kan en poakohng atail imwintihti kan duwen me E ketin poakohng irail (tehk Madiu 5:43–44; Moroni 7:48). Eri kitail en kak ni imwilao kaunop ong mour soutuk Reh oh rehn Samatail Nanleng.
I inouki me kitail kak tepida oh kedkedeo papah ni unsek ni atail pahn idawehn padahk oh karasaras en Sounkomouro.
© 2014 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/13. Kamanaman ong kawehwe: 6/13. Kawehwehpen First Presidency Message, March 2014. Pohnpeian. 10863 885
Padapadahk sang Iren Mahsen Wet
Elder M. Russell Ballard en Pwihn en Wahnpoaron Ehk-riemeno kangoangeikitail en kapakapki ansou mwahu kan en papah: “Nan amwail kapakap en nimenseng en ehuehu rahn, peki Sahm Nanleng en kaweid kumwail en kasawihada ansou mwahu en papah emen Sapwellime seri keneinei kan. Eri kohwei nan rahno … raparapahki emen en sewese” (“Be Anxiously Engaged,” Ensign de Liahona, Nohpempe 2012, 31). Medewe en luke irail akan me komw kin padahkih en koasoanehdi en kapakapki nimenseng koaros ansou mwahu kan en papah oh eri rapahki erein rahno pwon.