2014
Jesus Christ No Dwuma a Ofi Sor: Oguanhwɛfo Pa
Kwakwar 2014

Visiting Teaching Amandzɛɛbɔ, Kwakwar 2014

Jesus Christ No Dwuma a Ofi Sor: Oguanhwɛfo Pa

Mpaabɔ mu ara sũa adzesũadze yi na hwehwɛ dɛ ibohu dza ibɛkyɛ. Eretse Agyenkwa N’abrabɔ na dwuma ase besi dɛn ato wo gyedzi mu wɔ No mu na oehyira hɔn a edua visiting teaching do ihwɛ hɔn do no? Ho nsɛm mbordo no, kɔ reliefsociety.lds.org

Jesus Christ, Oguanhwɛfo Pa no kyerɛkyerɛɛ dɛ:

“Hom mu nyimpa bɛn na sɛ ɔwɔ nguantsen ɔha, na hɔn mu kor kɛyew a, onnkegyaa eduokron akron no wɔ sar do, na ɔnnka dza ayew no do nnkodu dɛ obohu no? …

“Mese hom dɛ … dɛw bɛba ɔsor wɔ ɔdzebɔnyɛnyi baako a onu noho” (Luke 15:4, 7).

Sɛ yɛbɛtse ase dɛ Jesus Christ nye Oguanhwɛfo Pa no a, hɛn pɛ nyin dɛ yebedzi Ne fasusu do na yɛasom hɔn a wohia. Jesus see dɛ: “Emi nye oguanhwɛfo pa no: minyim medze, na medze nyim me. … Na medze mo nkwa moto hɔ ma nguan no” (John 10:14–15). Osian Christ No Werdambɔ no ntsi, hɛn mu biara nkɛyew ara ma, yennkotum ehu hɛn fie kwan (hwɛ Luke 15).

President Thomas S. Monson kãa dɛ, “Hɛn asodzii nye dɛ yɛbɔhwɛ nguankuw no. … Hom mma hɛn mu kor biara ntu anamɔn nsom.”1

Fi Kyerɛwsɛm no mu

Ndwom 23; Isaiah 40:11; Mosiah 26:21

Fi Hɛn Abakɔsɛm mu

Elizabeth Ann Whitney, a ɔkɔr Relief Society nhyiamu a odzi kan no, kãa ne nsakyeree ho asɛm wɔ afe 1830 mu dɛ: “Ntsɛmpa noara a metsee Asɛmpa no dɛ mbrɛ Elderfo no kãe no, nna muhun dɛ ɔyɛ Oguanhwɛfo Pa no Ne ndze.”2 Elizabeth dzii Oguanhwɛfo Pa no Ne ndze ekyir mna wonumaa no na wosii no pi.

Hɛn so yebotum atse Oguanhwɛfo Pa no Ne ndze na yɛnye binom akyɛ Ne nkyerɛkyerɛ no. President Monson see dɛ, “Yɛyɛ Ewuradze Ne nsa wɔ asaase do ha a, yɛwɔ asodzi dɛ yɛsom na yepegya Ne mba.”3

Tse dɛ oguanhwɛfo a ɔhwehwɛ oguan a ɔayew no, awofo botum ahwehwɛ abofra a ɔaman. President James E. Faust (1920–2007), Ɔpamfo a Otsĩa Ebien wɔ President a Odzi Kan na n’Apamfo mu no kãa dɛ, “Awofo a wɔayɛ tsenenee, woesi enyimpi, na mpaabɔ mu ara wɔatsetse hɔn mba asoɔdzenfo na awerɛhow ahyɛ hɔn akoma mã no, yɛkã kyerɛ hom dɛ, Oguanhwɛfo Pa no rohwɛ hom do. Nyame nyim hom awerɛhow no bun no na Ɔtse ase. Enyidado wɔ hɔ.”4

© 2014 Intellectual Reserve, Inc. Wɔakora do tumdzi nyina USA na wotsintsimii. English approval: 6/13. Translation approval: 6/13.Translation of Visiting Teaching Message, February 2014. Fante. 10862 502 ne nkyerɛasee

Nsɛnsin

  1. Thomas S. Monson, “Heavenly Homes, Forever Families,” Liahona, Obiradzi 2006, 70.

  2. Elizabeth Ann Whitney, wɔ Daughters in My Kingdom: The History and Work of Relief Society (2011), 128.

  3. Thomas S. Monson, “What Have I Done for Someone Today?” Liahona, Ɔberɛfɛw 2009, 86.

  4. James E. Faust, “Dear Are the Sheep That Have Wandered,” Liahona, Esusow Aketseaba 2003, 68.

Ebɛnadze na Mubotum Ayɛ?

  1. Yenyim dɛ Agyenkwa no nye Oguanhwɛfo Pa no besi dɛn botum dze asomdwee aba hɛn abrabɔ mu?

  2. Akwan horow mu bɛn na yebotum asom hɔn a “wɔayew” efi Asɔr dwumadzi mu anaa wɔnnkã hɛn asɔr no ho?

  3. Ebɛn mboa na mubotum dze ama awofo a hɔn mba robɔ bra a wɔaman efi asɛmpa no ho?