Mga Higala sa tibuok Kalibutan
Ako si Arina gikan sa Russia
Privet, drooks!*
Gusto ba ninyong ipakigbahin ang inyong pagpamatuod ngadto sa uban? Tingali gipakigbahin ninyo kini sa simbahan. O tingali gipakigbahin ninyo kini sa inyong pamilya, mga higala ug mga magtutudlo pinaagi sa pagkamaayong ehemplo. Kini si Arina gikan sa Kazan, Russia, ug siyete anyos ang iyang panuigon. Gusto siya nga kamo masayud kabahin kaniya ug mahitungod sa daghang mga paagi nga siya nasayud nga ang Simbahan tinuod.
Sa dili pa ko matulog, mobasa ko sa akong mga kasulatan uban sa akong mama. Ang akong paborito nga istorya diha sa 1 Nephi sa dihang si Lehi mibiya sa Jerusalem uban sa iyang pamilya. Ang pagbasa sa mga kasulatan, pag-ampo, ug paghatag sa akong pagpamatuod makatabang nako nga maandam nga magpabunyag.
Ganahan ko nga magdrama sa entablado. Nakuha tingali ni nako gikan ni mama, tungod kay siya usa ka propesyonal nga opera singer. Ganahan ko nga mokanta ug mopatukar og violin.
Duna koy daghang mga kahigayunan sa paghisgut sa ebanghelyo ngadto sa uban. Akong giimbitar ang akong mga higala sa pagtambong sa Primary uban nako. Dili pa lang dugay, gitudloan nako ang akong apohang babaye sa tuhod unsaon sa pagpanalangin sa pagkaon. Karon, dungan mi nga mag-ampo inigpangaon.
Nindot ang akong kinabuhi sa Russia. Kon init sa gawas, ang akong mama ug ako molangoy sa Suba sa Volga ug maglakaw-lakaw sa parke duol sa among balay. Kon bugnaw panahon sa winter, kami ganahan nga mag-ice skate. Ganahan usab kami nga motan-aw sa mga hayop nga mopasundayag sa circus ug motan-aw sa pasundayag sa puppet diha sa doll theater.