Mensahe ti Umuna a Panguluen, Enero 2014
Ti Kasayaatan a Panawen a Panagmula iti Kayo
Iti nagkauna a Roma, ni Janus ti dios dagiti pangrugian. Masansan a mailadawan isuna iti dua a rupa—maysa a kumitkita iti napalabas, ken maysa a kumitkita iti masakbayan. Sumagmamano a lengguahe ti nangnagan iti bulan ti Enero a maisurot kenkuana gapu ta ti pangrugian ti tawen ket panawen para iti panagutob kasta met iti panagplano.
Rinbribu a tawen kalpasanna, adu a kultura iti intero a lubong ti mangipatpatungpal iti maysa a tradision nga agaramid kadagiti resolusion para iti baro a tawen. Kinaagpaysona, nalaka ti agaramid kadagiti resolusion—ti panangtungpal kadagitoy ket sabali a banag.
Maysa a lalaki a nagaramid iti atiddog a listaan dagiti resolusion ti Baro a Tawen ket nakarikna iti nasayaat maipapan iti panagprogresona. Napanunotna iti bagina, “No kaskasano, natungpalko ti panagkumitko a bassit ti kanek, diak nagpungtot, sinurotko ti badyetko, ken uray naminsan diak nagreklamo maipanggep iti aso ti kaarruba. Ngem ita nga aldaw ket Enero 2 ket nagunin ti alarma ket orasen tapno bumangonak iti iddak. Itultuloyko ti mangtun-oy iti amin a panggepko a tun-oyen.”
Panangirugi
Adda maysa a banag a di nakappapati a makatulong maipapan iti damo a panangirugi. Panagkunak iti maysa a panawen wenno sabali pay kayattayo amin ti mangrugi manen nga awanan iti biddut.
Paggugustok ti gumatang iti baro a computer nga addaan iti nadalus a hard drive. Iti maysa a panawen nakamaymayat ti panagtrabahona. Ngem iti panaglabas dagiti aldaw ken lawas immadu nga immadu dagiti program a na-install (adda dagiti naigagara, adda met dagiti saan a naigagara), iti kamaudiananna mangrugi nga agpataypatay ti computer, dagiti banag a sigud nga ar-ramidenna iti napardas ken nasamay ket agbalindan a nabuntog. No dadduma saanen a mausar daytoy. Uray ti panangpa-start iti daytoy ket agbalinen a parikut ta maseksekan ti hard drive kadagiti di kasapulan a data ken electronic debris. Adda dagiti gundaway a ti laeng kakaisuna a pamuspusan ket ireformat ti computer tapno mai-start daytoy.
Maipada met kadagiti tao a madagensenan kadagiti buteng, duadua, ken pakadagsenan a basol. Dagiti biddut nga inaramidtayon (agpada a naigagara ken saan a naigagara) ket mangpadagsen kadatayo agingga a kasla narigaten nga aramidentayo ti ammotayo a nasken koma nga aramidentayo.
Iti kaso ti basol, adda napintas a wagas ti panangreporma [reformat] a maawagan iti panagbabawi a mangpalugod kadatayo a mangikkat kadagiti hard drive ti dagensen iti kaunggantayo a mangpadagsen kadagiti puspusotayo. Ti ebanghelio, babaen ti namilagruan ken manangngaasi a Pannubbot ni Jesucristo, ket mangipakita kadatayo iti wagas a pakadalusan dagiti kararuatayo iti mulit ti basol ket agbalintayo manen a baro, natarnaw, ken kas iti maysa nga ubing nga inosente wenno awan basolna.
Ngem no dadduma pabuntogennatayo dagiti dadduma pay a banag ket pasardengendatayo, a mangigapu kadagiti saan a produktibo a panagpanunot ken panaggunay tapno mangaramid a narigat para kadatayo ti mangirugi.
Panangpaltuad iti Kasayaatan Kadatayo
Ti panangituding kadagiti panggep a tun-oyen ket napateg nga aramiden. Ammotayo nga addaan ti Nailangitan nga Amatayo kadagiti panggep a tun-oyen gapu ta imbaganan kadatayo a ti aramid ken gloriana ket “mangipatungpal iti saan nga ipapatay ken agnanayon a biag ti tao” (Moises 1:39).
Dagiti bukodtayo a panggep a tun-oyen ket mangpaltuad iti kasayaatan kadatayo. Nupay kasta, maysa kadagiti banag a mangsinga kadagiti panagkagumaantayo iti panagaramid ken panagtungpal kadagiti resolusion ket ti panangitantan. No dadduma itantantayo ti mangrugi, nga ur-urayentayo ti umno a kanito a panangrugi—ti umuna nga aldaw ti baro a tawen, ti rugi ti kalgaw, no maawagantayo a kas bishop wenno presidente ti Relief Society, kalpasan a mangrugi nga ageskuela dagiti annaktayo, kalpasan ti panagretirotayo.
Saanyo a kasapulan ti maysa nga awis sakbay nga irugiyo ti pananggunayyo a mangaramid kadagiti nalinteg a panggepyo a tun-oyen. Saan a masapul nga urayenyo ti pammalubos tapno agbalinkayo a maysa a tao a nakaisangratanyo. Saan a masapul nga urayenyo a maawiskayo nga agserbi iti Simbaan.
No dadduma masayangtayo dagiti tawen ti panagbiagtayo iti panagur-uray a mapilitayo (kitaen iti DkK 121:34–36). Ngem palso dayta a panangipagarup. Napilikayon!
No dadduma iti biagko nabuboskon dagiti rabii nga awan turogko a maburburiboran maipanggep kadagiti isyu, pakarikutan, wenno bukod a pagladingitan. Ngem kasano man ti kinasipnget ti rabii, kanayon a maparegtanak daytoy a kapanunotan: iti bigat agsingisingto ti init.
Iti tunggal baro nga aldaw, umay ti baro a parbangon—saan laeng a para iti lubong no di ketdi para kadatayo amin. Ken iti maysa a baro nga aldaw umay ti baro a pangrugian—maysa a gundaway a mangrugi manen.
Ngem Ania No Mapaaytayo?
No dadduma ti banag a manglapped kadatayo ket buteng. Mabalin a mabutengtayo amangan no ditayto agballigi, amangan no agballigitayto, amangan no mapabainantayto, amangan no mapagbalbaliwnatayo ti balligi, wenno amangan no balbaliwan ti balligi dagiti tao nga ipatpategtayo.
Ket isu nga agur-uraytayo. Wenno sumukotayo.
Sabali pay a banag a masapul a laglagipentayo no maipanggep iti panangituding kadagiti panggep a tun-oyen ket daytoy: Dumani awan duadua a mapaaytayonto—uray no kaskasano iti ababa nga agpang wenno short term. Ngem imbes a mapukawantayo iti namnama, ad-adda a mapabilegtayo gapu ta ikkaten daytoy a pannakaawat ti presion wenno pressure ti panagbalin a perpekto ita nga oras. Daytoy ti mangbigbig manipud iti rugi nga iti maysa a panawen wenno sabali, mapaaytayo a mangaramid kadagiti banag a ninamnama wenno nakiddaw kadatayo. Ti panangammotayo iti daytoy manipud iti rugi ket mangikkat iti adu a pakasdaawan ken pakaawanan namnama ti pannakapaay.
No rugiantayo dagiti panggeptayo a tun-oyen iti kastoy a wagas, saan a nasken a bedngannatayo ti pannakapaay. Laglagipen, nga uray no mapaaytayo a mangragpat iti kangrunaan ken tinarigagayan a pagtungpalan ita nga oras, makaaramidtayto iti panagprogreso iti dalan a mangiturong kadatayo iti daytoy.
Ket napateg dayta—dakkel ti kaipapananna.
Nupay mapaaytayo a makadanon iti finish line, ti panangitultuloytayo laeng iti panagdaliasat ket mangaramid kadatayo a nain-indaklan ngem iti sigud.
Itan ti Kasayaatan nga Oras a Mangirugi
Kuna ti daan a pagsasao, “Ti kasayaatan nga oras a panagmula iti kayo ket 20 a tawen ti napalabasen. Ti maikadua a kasayaatan nga oras ket itan.”
Adda maysa a banag a nakaskasdaaw ken manamnama maipapan ti balikas nga itan. Adda maysa a banag a mangpabpabileg maipapan iti kinapudno a no pilientayo nga ikeddeng itan, mabalintayo ti agtignay nga agtultuloy iti daytoy mismo a kanito.
Itan ti kasayaatan nga oras a panangrugi iti panagbalintayo a tao a kayattayo a pagbalinan iti kamaudianan—saan laeng a kalpasan ti 20 a tawen no di ketdi pay para iti amin a kinaagnanayon.
© 2014 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/13. Pannakaanamongna a maipatarus: 6/13. Pannaakaipatarus ti First Presidency Message, January 2014. Ilokano. 10861 864
Panangisuro manipud iti Daytoy a Mensahe
Inlawlawag ni Presidente Uchtdorf a no mapaaytayo a mangragpat kadagiti panggeptayo a tun-oyen, “mapabilgantayo. … Nupay mapaaytayo a makadanon iti finish line, ti panangitultuloytayo laeng iti panagdaliasat ket mangaramid kadatayo a nain-indaklan ngem iti sigud.” Kiddawenyo kadagiti miembro ti pamilia a mangisalaysay kadagiti padas a nakasursuruanda iti ad-adu pay manipud iti proseso ngem iti nasursuroda manipud iti nagbanagan, kas koma iti panagturpos manipud iti pagadalan wenno panangawat iti maysa a gunggona.