Ol Tijing blong Taem blong Yumi

Melkesedek Prishud mo Rilif Sosaeti lesen blong nambafo Sandei bae i blong “Tijing blong Taem blong Yumi.” Wanwan lesen, oli save rere long hem aot long wan o tu toktok we oli tekem long las konfrens nomo (luk tebol andanit). Ol stek mo distrik presiden oli save jusum ol toktok we oli mas yusum, o, oli save givim wok ia long ol bisop mo branj presiden. Ol lida oli soem olsem wanem i impoten blong ol brata blong Melkesedek Prishud mo ol sista blong Rilif Sosaeti oli stadi long ol sem toktok long sem Sandei.

Olgeta we oli atendem nambafo Sandei lesen, oli leftemap tingting blong olgeta blong stadi mo karem i kam long klas namba blong magasin blong jeneral konfrens we i jes pas nomo, o konfrens ripot.

Sam Tingting blong Rere long Wan Lesen Aot long Ol Toktok

Prea se Tabu Spirit bae i stap wetem yu taem yu stadi mo tijim ol toktok. Ating i temtem yu blong yusum ol nara tul blong rere long lesen, be ol toktok blong konfrens oli kurikulum ia nao we oli apruvum. Wok blong yu i blong helpem ol narawan blong lanem mo laef folem gospel olsem we oli tijim long jeneral konfrens blong Jos we i jes pas.

Luklukbak long ol toktok, lukaotem ol prinsipol mo doktrin we i save ansarem ol nid blong ol memba blong klas. Mo tu, lukaotem ol stori, ol skripja refrens, mo ol stetmen long ol toktok we bae i helpem yu blong tijim ol trutok ia.

Mekem wan plan long olsem wanem blong tijim ol prinsipol mo doktrin. Tingting tu blong putum ol kwestin we i helpem ol memba blong klas:

Lukaotem ol prinsipol mo doktrin long ol toktok ia.
Tingbaot mining blong olgeta.
Serem wanem yufala i andastanem, ol tingting, ol eksperiens, mo ol testemoni.
Yusum ol prinsipol mo doktrin ia long laef blong yufala.

Ol Manis we Oli Tijim Ol Lesen	Ol Tul blong Lesen blong Nambafo Sandei
Oktoba 2013–Epril 2014	Ol toktok we oli kamaot long Oktoba 2013 jeneral konfrens*
Epril 2013– Oktoba 2013	Ol toktok we oli kamaot long Epril 2013 jeneral konfrens *