E Tatau Ona Faaaogaina ma le Agavaa le Perisitua

Ua tuuina mai e le Tama faalelagi se vaega o Lona mana ma le pule i alii agavaa o le Ekalesia. O lenei pule faamatuu ua ta’ua o le perisitua. Ua faatagaina i latou o e umia le perisitua e galulue i le suafa o le Alii i le taitaia o Lana Ekalesia, aoaoina atu o le talalelei, faamanuiaina o e mamai, ma le faataunuuina o sauniga paia e tatau ai mo le faaolataga.

O le perisitua e tatau ona faaaogaina ma le agavaa aua, e pei ona faaali atu e le Alii ia Iosefa Samita, “o aia o le perisitua ua fesootai e le mavavaeeseina ma mana o le lagi, ma o mana o le lagi e le mafai ona pulea pe faaaogaina tau lava i mataupu autu o le amiotonu” (MF&F 121:36). O lea la, o loo i ai se eseesega i le va o le pule ma le mana o le perisitua. “O le pule o le perisitua, o le pule lea e galue ai i le suafa o le Atua, … e tuuina atu e ala i le faaee atu o lima. O le mana o le perisitua e na o le pau le taimi e oo mai ai pe a faatinoina e i latou e agavaa ma galulue e tusa ma le finagalo o le Atua.”¹

Talu ai o le perisitua o le mana o le Atua, o lea ua Ia faatuina ai tulaga faatonuina o le agavaa mo lona faaaogaina ma ua faaalia mai na tulaga faatonuina i Ana perofeta ma aposetolo. E agavaa e umia le perisitua pe a salamo i a latou agasala ma ola e tusa ma le talalelei atoa ai ma poloaiga a Iesu Keriso. E mafai ona fesoasoani le mafutaga a le Agaga Paia i o latou olaga ia latou iloa ai lo latou agavaa.

E maua e i latou e umia le perisitua le mana o le perisitua e ala i le faatuatua ma le usiusitai:

Taulima ma le agalelei lau avā, fanau, ma isi tagata.
Taumafa ma le tatau i le faamanatuga.
Tapuai i le malumalu.
Auauna atu ma le faamaoni i lou valaauga.
Faaaoga le perisitua pe a valaauina oe.

Malupuipuia ma Ola Agavaa mo le Perisitua

Ata

Peresitene Gordon B. Hinckley

“O a tatou amioga i nofoaga faitele e le tatau ona faitioina. O a tatou amioga i nofoaga le faalauaiteleina e sili atu ona taua. E tatau ona manino i tulaga faatonuina ua faatulagaina e le Alii. E le mafai ona tatou faalolololo i le agasala, pe taumafai foi e ufiufi a tatou agasala. E le mafai ona tatou faamalieina lo tatou faamaualuga. E le mafai ona tatou faaaogaina le fialauiloa le aoga ma le amioletonu. E le mafai ona faaaoga le pule, po o puleaga, po o le faamalosi i luga o o tatou avā po o fanau, po o soo se isi i soo se tikeri o le amioletonu.

“Afai tatou te faia soo se mea o nei mea, o le a aveesea mana o le lagi. E faanoanoa le Agaga o le Alii. E aveesea le mama o lo tatou perisitua. E leiloa lana pule. …

“… E avea [le perisitua] o se taiala e ola ai o tatou olaga. I lona atoaga, o lona pule e oo i talaatu o le veli o le oti ma oo atu ai i le faavavau o i le lumanai.

“E leai se isi mea e faatusatusa i ai i lenei lalolagi atoa. Ia malupuipuia, ia faapelepele i ai, alofa i ai, ia ola agavaa i ai.”

Peresitene Gordon B. Hinckley (1910–2008), “O Le Agavaa Patino e Faaaoga ai le Perisitua,” Liahona, Iulai 2002, 58, 61.