Tusi Ia Sa’o
Na iloa e Kara le upumoni.Ae pe na te maua le lototele e tusi e uiga i ai?
“Ou te le ma i le talalelei ia Keriso” (Roma 1:16).
Na tuu i lalo e Kara lana penitala ma sioa atu i le fasipepa o loo i luga o lana kesi. Sa leai se mea na tusia ai vagana ai lona igoa ma se faailoga o le mea na tape.” O le a se mea e tatau ona ou tusia?” na ia mafaufau ai.
I le isi itu o le ala savali, sa i ai lana uo o Lili na pisi e tusitusi. Sa punou ifo le ulu o Kara ma faalagolago i luga o lona ogalima.
Na matuai fiafia lava Kara i lana a’oga fou. Sa fai i se fale o se isi lotu, ma o lana vasega fou sa fetaui lelei le toatele na mafai lava e lona faiaoga, o Mrs. Schmidt, ona maua se taimi e fesoasoani ia te ia i le matematika. O aso uma lava pe a maea le matematika, sa aoaoina ai e Mrs. Schmidt se lesona mai le Tusi Paia. E masani lava o lesona o le Tusi Paia sa tele lava ina pei o mea ia sa aoaoina e Kara i le fale ma le Peraimeri.
Ae o ni nai vaiaso talu ai, i le taimi o se lesona e uiga i le papatisoga, na ta’u atu ai e Mrs. Schmidt i le vasega o pepe o e ua feoti ae lei papatisoina e le mafai ona o i le lagi. Ona ia fai mai lea sa oti se tasi o lana fanau ina ua fanau mai.Ina ua ia fai mai lena mea, na pei a melo tagi ia Mrs. Schmidt.
“A o pepe e feoti e o i le lagi,” o le fia fai atu lea a Kara. Maimau e pe ana iloa e Mrs. Schmidt lena mea, atonu o le a le toe faanoanoa tele o ia. Ae na lagona e Kara le matamuli tele e fai atu ai se tala.
Ina ua tuua le aoga, na tau atu e Kara ia Tina le tala a Mrs. Schmidt. “O le iloaina o pepe e o i le lagi o se tasi na o faamanuiaga ua tatou maua ona o le Tusi a Mamona,” o le tala lea a Tina. Sa faamoemoe Kara o le a faitauina e Mrs Schmidt le Tusi a Mamona i se aso. Sa moomoo o ia maimau pe ana ia maua le lototele e ta’u atu ia lena mea.
O le lesona la o le aso lenei, na tau atu ai e Mrs. Schmidt i le vasega, o le Atua, Iesu, ma le Agaga Paia o le tagata e toatasi. Na mafaufau Kara e uiga i le ala na faaali mai ai le Tama Faalelagi ma Iesu Keriso ia Iosefa Samita i le Vao Paia. Sa ia iloaina o i Laua o ni tagata mavaevae e toalua ma ua tofu ma le tino. Sa fiafia o ia ona sa ia mautinoaina lena mea, ae e lei talanoa atu ia Tina po o Tama e uiga i ai.
Ona fai mai lea o Mrs. Schmidt, “Tamaiti, faamolemole aumai i fafo se fasipepa ma tusi ai e uiga i le mea na tatou talanoa i ai.”
O le taimi lena na maua ai e Kara se lagona popole i lona manava.Sa manao o ia e fai le meaaoga i le auala lea e manao lona faiaoga na te faia ai. Mata e lava lona lototele e tusi ai le mea na te iloaina e moni?
Ma lona ulu i luga o lana kesi, na amata ai ona fai e Kara se tatalo le leoa. “Faamolemole, le Tama Faalelagi pele, o le a se mea e tatau ona ou faia?”
Toetoe lava o le taimi lava lena, na amata ai e Kara ona lagona le toafimalie ma le toafilemu i totonu.Sa musumusu mai le Agaga Paia afai na te tusia mea sa i ai i lona loto, o le a lelei lava mea uma.
Na tuu i luga e Kara lona ulu, piki i luga lana penitala, ma amata loa ona tusi.
O le Tama Faalelagi ma Iesu o ni tagata mavaevae se toalua. Ua ia i Laua ni tino o aano ma ivi e pei o i tatou. O le Agaga Paia o se Agaga e mafai ona talanoa mai ia i tatou i o tatou loto.
Ina ua uma ona tusia o ni nai fuaiupu, na tuu i lalo e Kara lana penitala. Na te lei iloa po o le a se manatu o Mrs. Schmidt i le mea na ia tusia, ae sa ia lagonaina le fiafia ona ua ia mafai ona ta’u atu i lona faiaoga se mea taua ma le faamaoni.
Ata na saunia e Bjorn Thorkelson