Wik blong Ista
Sevya blong yumi Jisas Kraes i bin mekem Atonmen i hapen—we insaed i gat safaring blong Hem long Getsemane, Taem oli Hangem Hem long Kros long Golgota, mo Laef Bakegen long Ded aot long tumb—long las wik blong laef blong Hem.
Long Kaonsel long Heven bifo oli bin krietem wol, Papa long Heven i bin presentem plan we Hem i gat abaot yumi, ol pikinini blong Hem. Yumi bin singaot wetem glad taem Papa long Heven i bin jusum Kraes blong karemaot plan blong fasin blong sevem man (luk long Job 38:7 mo Abraham 3:27). Meri i bonem Hem long Betlehem, Jisas i bin laef long wan laef we i no gat sin. From Atonmen blong Hem, yumi save gobak blong stap wetem Papa blong yumi long Heven mo kasem laef we i no save finis. Jisas Kraes bae i kambak bakegen wetem paoa mo glori blong stap long wol long taem blong Milenium, mo bae Hem i stanap olsem Jaj blong evri pipol long las dei.
Hemia ol pikja we oli stap long Baebol vidio we i soem las wik blong laef blong Sevya. Gat tingting ia blong ridim ol ves blong skripja we oli listim long wanwan pikja. Blong wan ful lis we i stap long oda blong ol spesel taem ia, lukluk long jat we i soem wea ol skripja i kam long hem long ol fofala Gospel insaed Bible Dictionary o Guide to the Scriptures. Ol baebol vidio, oli stap long biblevideos.lds.org.
Long nambafaef dei, bifo Pasova, Jisas i klaem long wan dongki blong go long Jerusalem olsem we oli bin profesae. Ol pipol i bin luksave Hem olsem King blong olgeta, mo oli singaot “Hosana,” mo putum kot blong olgeta mo lif blong tri long rod long fored blong dongki. (Luk long Matiu 21:1–11 Mak 11:1–11 Sekaraea 9:9.)
Ol pikja © IRI
Blong nambatu taem long taem blong seves blong Hem long wol, Jisas i bin klinim eria blong tempol. “Haos blong mi, bambae ol man oli putum nem blong hem se Haos blong Prea. Be yufala, yufala i stap mekem i kam ples blong haed blong ol man blong stil.” Hem i talem long olgeta we oli stap jenisim mane (Matiu 21:13). Afta plante long ol blaenman mo ol man we leg blong olgeta i no gud oli kam long Hem long tempol, mo Hem i bin hilim olgeta. Be taem ol jif pris mo ol tija blong loa i bin luk merikel blong Hem, oli bin kros mo lukaot wan wei blong spolem Hem. (Luk long Matiu 21:12–17; Mak 11:15–19.)
Ol pikja © IRI
Jisas Kraes, Wan Pikinini Ia Nomo blong Papa, we i bin putum Hem daon blong kam long wol mo pemaot evri pipol from Foldaon blong Adam mo Iv. (Luk long 1 Nifae 11:16–22, 26–33; Alma 7:10–13.)
Ol pikja © IRI
Truaot long wik, Sevya i bin givimaot sam long ol gudfala toktok blong Hem we yumi no save fogetem, wetem ol tijing blong Hem abaot kleksen we wan wido i sakem. (Luk long Mak 12:41–44; Luk 21:1–4.)
Ol pikja © IRI
Long Garen blong Getsemane, Sevya i bin nildaon mo prea; harem nogud blong Hem from ol sin blong wol i mekem Hem blong i seksek from soa, blad we i kamaot long evri hol blong skin blong Hem, mo safa tugeta long bodi mo spirit (luk long D&C 19:18). I no longtaem Judas Eskariot mo plante ami oli bin arestem Jisas, mo evri disaepol i bin fogetem Lod mo oli ronwe. (Luk long Matiu 26:36–56; Mak 14:32–50; Luk 22:39–53.)
Ol pikja © IRI
Long taem blong las sapa, Jisas i bin promesem ol aposol blong Hem se bae oli kasem Spirit blong Givhan, o Tabu Spirit, taem bae Hem i go. Hem i bin tijim olgeta blong tingbaot Hem taem oli tekem sakramen. Long en blong naet, Jisas i bin mekem wan Prea long Bihaf blong Olgeta, we Hem i bin prea se ol disaepol oli save kam wan long yuniti. (Luk long Matiu 26:17–30; Mak 14:12–26; Luk 22:14–32; Jon 13–17.)
Ol pikja © IRI
Afta wan kot we i no folem loa i bin sidaon mo ol strong wip, Jisas Kraes i bin letem Hemwan blong oli hangem Hem long kros, blong komplitim “bigfala mo las sakrifaes” we i mekem fasin blong sevem man i save hapen blong evri pikinini blong God (luk long Alma 34:14–15). Bifo naet i kam, olgeta we oli stap folem Jisas oli bin karemaot bodi blong Hem long kros, oli kavremap long gudfala kaliko ya linen, we i niuwan, mo ol.i putum Hem long hol blong ston. (Luk long Matiu 27; Luk 23; Mak 15; Jon 19.)
Ol pikja © IRI
Long eli moning long Sandei, mo Meri Magdelen mo ol nara fetful woman oli bin kasem hol blong ston blong anoentem bodi blong Jisas. Oli bin faenem se ston we i blokem hol ia i bin rolaot mo tu enjel we i stap talem gud nius: “Be hem i no stap long ples ya. Hem i laef bakegen finis” (Matiu 28:6). Sevya we i laef bakegen long ded i bin winim ded long saed blong bodi mo mekem i isi blong wanwan long yumi blong save laef bakegen: “Olgeta man we oli joen long Adam oli save ded, mo long sem fasin, olgeta man we oli joen long Kraes oli save laef bakegen long ded” (Fas Korin 15:22). (Luk long Matiu 28; Mak 16; Luk 24; Jon 20).
Ol pikja © IRI