Unsa ang punto sa mga klase ug kapangulohan sa korum alang sa kabatan-onan?
Ang mga kapangulohan sa klase sa Young Women ug ang mga kapangulohan sa korum sa Aaronic Priesthood makabenepisyo niadtong naghupot og mga katungdanan ug niadtong ilang giserbisyohan.
Ang mga sakop sa kapangulohan dunay katungod sa inspirasyon mahitungod sa klase o korum, nga makatabang nila unsaon sa pag-ampo ug pagpakigdait sa mga sakop sa ilang klase o korum, ilabi na niadtong bag-o o dili kaayo aktibo. Ang pagka anaa sa kapangulohan makatabang sa kabatan-onan nga makat-on sa mga kahanas sa pagpangulo sama sa pagdelegar, pagserbisyo, sa komunikasyon, ug pag-apil diha sa mga konseho. Ang pagkat-on sa pag-organisar ug pagdumala og mga miting ug mga kalihokan makatabang sa lider sa kabatan-onan pag-andam alang sa misyon o sa umaabut nga mga calling samtang sila magkat-on sa kaimportante sa pagbuhat sa ilang katungdanan ug unsaon sa paghimo og plano ug pagbuhat niini.
Ang mga sakop sa klase o korum makaangkon usab og mga panalangin pinaagi niini nga mga lider. Duna silay kaedad nga maistorya kinsa makatabang ug makaawhag nila sa pagsunod sa ebanghelyo ug paghimo og daghang mga butang, ilabi na sa ilang pagkompleto sa ilang Personal nga Kauswagan o Katungdanan ngadto sa Dios. Tungod kay ang mga presidente sa mga klase o mga korum apil sa bishopric youth committee, ilang mapahibalo ang bishop sa mga problema, mga kabalaka, o maayong mga binuhatan sa ilang mga klase o mga korum.
Ang pagkatawag diha sa kapangulohan sa usa ka klase o korum usa ka dakong responsibilidad nga makatabang sa kabatan-onan nga makaangkon og mas dakong pagsalig, makat-on nga mahimong usa ka lider ug ehemplo, ug makapalambo sa gugma ug panaghiusa sa klase o korum.