Unsa Kini nga Simbahan?
Angela Fallentine, New Zealand
Pipila ka tuig ang milabay kinahanglang ipatan-aw ang akong sakyanan para sa sumbanan sa safety ug emission. Miabut ko sa garahian nga may walo o siyam pa ka sakyanan naglinya para ma-inspeksyon.
Nindot to nga adlaw sa tingpamulak, busa giablihan nako ang mga bintana, gipalong ang makina, ug gikuha ang kopya sa “Ang Pamilya: Usa ka Pamahayag ngadto sa Kalibutan,” nga akong gibutang sa sakyan apil ang ubang materyal sa Simbahan. Ang akong presidente sa stake bag-ohayng mitambag sa mga miyembro sa pagmemorya sa pamahayag. Kining libre nga oras maoy maayong oportunidad sa pagbuhat ini. Sa katapusan, turno na nako nga inspeksyunon akong sakyanan.
Usa sa mga lalaki nga miinspeksyon mipasabut nga iyang drayban akong sakyanan ngadto sa garahian. Dayon iyang kong gihangyo sa pagpaabut sa pikas kwarto hangtud mahuman ang inspeksyon. Taud-taud na nga nagtan-aw nako sa ubang kostumer nga sulod ug gawas. Naghunahuna ko nga may dakong problema ang akong sakyanan.
Sa katapusan miabut ang mekaniko ug miingon nga ang akong sakyanan nakapasar sa inspeksyon. Nahupay ko! Mibayad ko ug miadto sa akong sakyanan ug nakitang nagpaabut nako ang mekaniko.
“Miss,” miingon siya, gitan-aw gyud mitutok nako, “mahimo ba kong makig istorya nimog kadiyot?”
“Siyempre,” mitubag ko niya.
“Pasayloa kong nalangay imong sakyanan sa inspeksyon. Samtang nagdrayb ko sa imong sakyanan sa garahian, nakabantay ko og papel sa lingkuranan nga naghisgot kabahin sa pamilya. Imbis nga ibalik dayon imong sakyanan, milingkod ko sa garahian ug gibalik-balik og basa ang papel.
Siya mipadayon, “Unsa kini nga simbahan? Unsa ning dokumento kabahin sa pamilya? Makapangayo ba ko og kopya ini? Mabasa dinhi nga sinulat ni sa mga Apostoles. Imo bang gipasabut nga may mga Apostoles sa kalibutan karon sama sa panahon ni Jesus? Palihug, kinahanglan kong masayud.”
Hapit dili ko ka tingog apan naghunahuna ko og itubag. Giingnan ko siya nga aduna gyuy mga apostoles ug propeta sa kalibutan, sama sa panahon ni Jesukristo. Giingnan ko siya kabahin ni Propeta Joseph Smith ug ang Pagpahiuli sa ebanghelyo. Ako dayong gihatag ang tanan nakong materyal sa Simbahan ngadto kaniya. Iyang gihatag ang iyang ngalan ug numero sa telepono aron makontak siya sa mga misyonaryo. Ang among panag-istoryahanay natapos uban sa iyang tinuorayng pagpasalamat.
Samtang nagdrayb ko, nakahilak ko. Mapasalamaton kong nagbilin ko og kopya sa “Ang Pamilya: Usa ka Pamahayag ngadto sa Kalibutan” sa lingkuranan sa sakyanan.
Dili gyud nako makalimtan ang kahinam sa mga mata adtong tawhana. Kini nga kasinatian usa ka dili malimtang leksyon sa gahum sa pamahayag sa pamilya, sa reyalidad sa pagpadayag karon, ug sa kaimportante sa pagpakigbahin sa ebanghelyo kada adlaw—ug usahay sa wala damhang—sitwasyon.