Ang Tukmang Panahon sa Pagminyo
Si Ane ug Benjamin nasayud nga importante ang edukasyon, ug silang duha gustong moeskwela sa unibersidad. Sa unsang paagi man ang ilang kaminyoon mohaum niini nga plano?
Sa high school pa si Ane, naghandom siya sa adlaw nga makaeskwela og unibersidad. Adunay daghang mga subject nga iyang matun-an ug daghan kaayong mga kurso nga iyang kapilian! “Daghan kaayo kog mga tinguha ug makahimo og daghang lain-laing mga butang,” miingon siya.
Bisan og si Ane nagpuyo sa gamayng lungsod sa Norway, nag-eskwela siya sa nindot kaayo nga high school. Ang iyang eskwelahan nag-awhag sa mga estudyante niini sa pagpaningkamot og taas nga mga grado ug sa pag-eskwela sa unibersidad. Daghang mga estudyante sa eskwelahan ni Ane nagsugod dayon sa pag-eskwela sa unibersidad human makagradwar. Gikan pa sa pagkabata, si Ane nagplano sa pagbuhat sa ingon. Hinoon, ang pag-eskwela usa lang sa mga tumong nga gihimo ni Ane alang sa iyang kaugalingon.
“Natudloan ko og maayo pinaagi sa mga leksyon sa Young Women ug sa Personal nga Kauswagan,” miingon si Ane. “Ang akong tumong mao gayud ang pagminyo diha sa templo.”
Kanus-a ang “Tukmang Panahon”?
Usa ka gabii niana sa lokal nga institute, si Ane nakahimamat og bag-ong returned missionary nga si Benjamin. “Gikan sa unang higayon nga ako siyang nakita, nadani ako sa daghang kaayong mga paagi,” miingon si Ane. “Sayon ug nindot kaayo ang pagpakigsulti kaniya. Sayon ra kaming makahisgot sa ebanghelyo.”
Mihangyo si Benjamin kaninya nga makig-date, ug maayo ang resulta niini. Paglabay sa daghang mga bulan, si Benjamin ug Ane nagsige na og date. Nagdula sila og soccer ug volleyball, nag-hiking, ug nanan-aw og sine. Sa hinay-hinay mas nailhan nila ang usag usa, ug ang ilang panaghigalaay nahimong pagminahalay.
Samtang nagpadayon ang ilang panaghigugmaay, ang ilang mga hunahuna ug mga plano misangpot sa kaminyoon. Nalipay si Ane ug si Benjamin nga nakaplagan nila ang tawo nga gusto nilang ikauban sa kahangturan. Hinoon, kini nga relasyon dali nga nagkaseryoso kay sa ilang gilauman. Unsay mahitabo sa tanang mga plano nga ilang gihimo sa bata pa sila? Makaeskwela pa ba kaha sila? Ang desisyon nila nga magminyo nagpasabut ba nga ilang mga tumong ilangan?
Pipila sa ilang mga higala ug pamilya nagtuo nga mao kini ang mahitabo.
“Daghang mga tawo palibut nako—sa balay, sa eskwelahan, ug sa trabahoan—nabalaka kaayo nga kini nga relasyon makaapekto sa akong edukasyon,” miingon si Ane. “Gani mangutana sila kon nakahibalo ba ako nga molungtad ba kini nga relasyon.
“Ang akong kaedad nga mga higala nagtuo nga ang pagminyo makapugong nako sa pag-eskwela sa unibersidad,” miingon siya. “Alang nila, ingon og akong giusikan ang akong mga talento ug mga oportunidad.”
Ang ubang mga kaila ni Benjamin mao usab ang gibati. “Ang mga tawo gustong motuo ko nga bata pa kaayo mi, nga ang akong umaabut nga asawa kinahanglan mokompleto una sa edukasyon, ug kon maminyo mi, nagpasabut kini nga kami manganak, nga mga bata pa kami alang niini,” miingon siya.
Bisan si Ane ug Benjamin mituo sa gipasabut sa ebanghelyo bahin sa pamilya ug kaminyoon, ang uban nga dili miyembro sa ilang tinuohan wala makahibalo niini nga prayoridad— nga dili alang sa mga young adult. “Ang mga tawo sa akong lungsod nag-focus gyud pag-ayo sa edukasyon ug trabaho,” mipasabut si Ane. “Maayo kini, apan wala nay panahon alang sa pamilya—o relihiyon.”
Miingon si Benjamin, “Nagtuo gyud ko nga ang eksaktong butang nga buhaton mao ang paghuman sa akong misyon ug mangita og tawo nga akong ganahan, dayon mahalon, ug dayon, human makahimo og desisyon sa pagminyo ug nakadawat og saksi gikan sa Espiritu Santo, magminyo. Ingon og sayon ra kaayo kanako, apan sa kalit ang tanan nahimong makalibog, mangitngit, ug malisud.”
Unsay Gisulti sa Ginoo?
Nabalaka si Benjamin ug si Ane sa gitambag ug mga opinyon sa ilang mga higala. Sulod sa tibuok tuig nanglimbasug sila sa paghukom sa eksaktong panahon sa pagminyo. Nasayud sila nga sa katapusan ang pinakaimportante nga giya magagikan sa Ginoo, maong migahin sila og daghang panahon sa pagsiksik sa mga kasulatan ug sa mga pulong sa mga propeta sa mga pakigpulong mahitungod sa pamilya, kaminyoon, ug edukasyon.
“Kining tanang mga tinubdan naghisgot kon unsa ka importante ang kaminyoon ug edukasyon,” miingon si Ane. Samtang nagpadayon siya sa pagpangita og direksyon, sa katapusan naklaro na diha sa panag-istoryahanay uban sa usa ka lider sa institute. “Miingon siya nako, ‘Kon naa na kay tukma nga tawo ug tukma nga dapit (ang templo), mao kana ang tukmang panahon!’” Si Ane nakahinumdom. “Nakapagaan gyud kini sa akong hunahuna. Nakadawat ako og daghang mga pag-aghat gikan sa Espiritu nagmatuod nga kini ang dalan nga akong subayon. Nasayran nako nga si Benjamin ug ako magminyo ug kana ang eksakto nga butang nga akong buhaton niining higayona.”
Nasayud si Ane nga kinahanglan gihapon siyang maningkamot nga makaeskwela, tungod kay mao usab kana ang giawhag sa mga propeta sa Ginoo. Apan alang karon nasayud siya nga ang kaminyoon mao ang iyang unang prayoridad.
Mibati si Ane og kasubo tungod kay nasayud siya nga pipila lamang ka mga tawo moisip sa iyang kaminyoon niana nga pangidaron nga angayng ikalipay. Apan mipili siya nga mo-focus sa pagkat-on sa pag-ila sa mga aghat sa Espiritu ug unsa ang hunahuna sa Ginoo imbis unsay hunahuna sa iyang mga kaedad. “Mao kini ang kinahanglan nakong barugan nga lig-on ug matarung uban sa pagpili nga akong gihimo,” miingon siya.
Si Benjamin wala makasinati sukad og ingon niini diin siya nakaamgo nga ang kaminyoon mao ang eksakto nga desisyon nianang higayon alang kaniya. Hinoon, siya miingon, “Ako nakaamgo nga ako kinahanglang mobalik ngadto sa mga sukaranan. Nganong ania ako dinhi? Unsa ang akong katuyoan dinhi sa kalibutan?”
Samtang nagsiksik siya sa mga kasulatan ug sa mga pulong sa mga propeta ug mga apostoles, si Benjamin nag-ampo sa Langitnong Amahan. Nakadawat usab siya og mga panalangin sa priesthood. “Naklaro nako nga ako gipadala dinhi sa kalibutan aron mobalik ngadto sa Dios uban sa akong pamilya,” miingon siya. “Walay laing mas dako nga trabaho o laing buluhaton ang makapuli niana. Anaa kini sa ‘Ang Pamilya: Usa ka Pamahayag ngadto sa Kalibutan.’ Kon tuyoon nako ang pagbaliwala niini ug mohimo og laing butang, nagsupak ako sa mga sugo sa Dios.
“Sa dihang gipadayag na kanako nga unsay gitudlo kanako sa akong tibuok kinabuhi tinuod gayud nga kini maoy prayoridad kay sa mga opinyon sa uban, gibati nako nga nalamdagan. Nakahukom ako nga mosunod unsay gitudlo kanako.”
Si Ane ug Benjamin naminyo niadtong Hulyo 16, 2009, sa Templo sa Stockholm Sweden. “Sa dihang miabut ang adlaw sa among pagkabugkos diha sa templo, gibati nako ang kalinaw,” miingon si Ane. “Simple ra kaayo ang tanan. Maanindot. Walay kalibutanong mga dayan-dayan. Nindot kaayo ang pamati nga uban sa akong mga ginikanan ug mga igsoon diha sa templo—ug uban ni Benjamin. Panahon kadto nga napuno sa gugma.
Ang mga Panalangin Nga Misunod
Bisan tuod ang mga bulan paingon sa ilang kaminyoon malisud, mapasalamaton si Ane sa mga pagsulay nga iyang naagian. “Nakapugos kini nako nga barugan ang akong desisyon,” miingon siya. “Ang Dios mitabang ug milig-on nako pinaagi sa mga kasulatan, mga pag-ampo, ug mga panalangin sa priesthood. Daghan sa mga tawo nga negatibo kaniadto miila nga unsay akong gipili mao ang maayo ug eksakto. Nakita nila nga tinuod nakong nakit-an ang kalipay. Nagpasalamat sila nako sa pagsalig sa akong kaugalingon ug sa Ginoo.”
Human sa ilang kaminyoon, si Ane ug Benjamin mibalhin ngadto sa bag-ong lungsod diin silang duha nagsugod sa pag-eskwela sa unibersidad. Sa wala madugay miabut ang ilang anak nga babaye, si Olea, ug temporaryong miundang si Ane sa pag-eskwela. Mopadayon si Ane sa iyang pag-eskwela part-time ug sa online, nga magtugot niya sa pagkuha og edukasyon ug sa pagpuyo sa balay sa pag-amuma sa ilang anak. Bisan og nasayud siya nga ang sitwasyon malisud, makahimo gihapon si Ane sa pagkuha og edukasyon nga iyang gitinguha.
“Ang ubang mga tawo nagtuo nga kinahanglan akong mosakripisyo og daghang mga butang aron maminyo ug magsugod og pamilya,” miingon siya, “ug ingon niana ang nakita. Apan sa tinuod akong naangkon ang tanan. Nasayud ako nga kon ako mopili sa pag-una sa Ginoo, ang tanan ihatag kanako. Malaumon kaayo ako ug mapasalamaton nga makaangkon sa akong degree. Apan labaw sa tanan mapasalamaton ako nga kami adunay oportunidad nga mahimong mahangturong pamilya!
Miuyon si Benjamin. “Ang Dios migiya sa akong kinabuhi sa paagi nga gitudlo kanako sa pag-una Kaniya,” miingon siya. “Alang nako, dili kini pagpili sa pamilya o edukasyon; pamilya una ug edukasyon sa samang higayon. Sa ubang mga desisyon mao gihapon. Pagsunod sa Dios o dili Unahon gyud ang Dios, dayon mosunod ra ang tanan.”
Si Benjamin ug Ane uban sa ilang anak nga babaye, nga si Olea.
Gilitratohan ni Geir Weggersen
Paghulagway ni Edward McGowan