Parau poro‘i na te mau tuahine hahaere, Mati 2013
Faaitoitoraa
A tai‘o i teie haapiiraa na roto i te pure, e mai te mea e tano, a aparau i te reira i te mau tuahine o ta outou e hahaere ra. A faaohipa i te mau uiraa no te tauturu ia outou ia haapuai i te mau tuahine e ia faariro i te Sotaiete Tauturu ei tuhaa itoito no to outou iho oraraa. No te mau haamaramaramaraa hau atu, a haere i ni‘a i te reliefsociety.lds.org.
Ua faaitoito to tatou peropheta, te peresideni Thomas S. Monson ia tatou ia « haere e faaora i te feia o te hinaaro i ta tatou tauturu e ia faateitei ia ratou i te hoê e‘a teitei a‘e e te maitai … E ohipa teie na te Fatu, e ia rave ana‘e tatou i te ohipa a te Fatu… e ti‘a ïa ia tatou ia farii i te tautururaa a te Fatu ».1
A rave rahi matahiti i teie nei, ua hahaere LaVene Call e to’na hoa hahaere i te hoê tuahine aita e haere nei i te pureraa. Ua patoto raua i te opani e ua ite atu i te hoê metua vahine apî i roto i to’na ahu tauera. E huru ma‘ima‘i rii to’na, ua ite oioi râ raua e, o te ava to’na fifi. Ua parahi na tuahine hahaere e ua aparau e teie metua vahine apî i roto i te fifi.
I muri a‘e i to raua ho‘iraa, ua parau raua e, « E tamarii oia na te Atua. E hopoi‘a na taua ia tauturu ia’na ». No reira, ua pinepine raua i te hahaere atu. I te mau taime atoa, ua nehenehe roa ia raua ia ite e ia farii i te hoê tauiraa no te maitai. Ua ani raua i te tuahine ia haere mai i te Sotaiete Tauturu. Noa’tu â te tahi rii pato‘iraa no’na, i te pae hopea ua haere tamau mai oia. Na roto i te faaitoitoraa, ua haere mai oia, to’na hoa faaipoipo e ta’na tamahine i te pureraa. Ua putapu te hoa faaipoipo i te Varua Maitai. Ua parau oia, « e rave au i te mea ta te episekopo i parau mai ». I teie nei e mea itoito ratou i roto i te Ekalesia e ua taatihia i roto i te hiero.2
No roto mai i te mau papa‘iraa mo‘a
3 Nephi 18:32; Te Parau Haapiiraa e Te Mau Parau Fafau 84:106; 138:56
No roto mai i to tatou aamu
Ua riro te tautururaa i te feia o tei hahi ê ia ho‘i mai i te evanelia a Iesu Mesia, ei ohipa tamau no te riroraa ei feia mo‘a no te mau mahana hopea nei e ei melo no te Sotaiete Tauturu. Ua parau te peresideni Brigham Young (1801–77) e, « E aroha na tatou i te tahi e te tahi… e ia arata‘i te feia e nehenehe e ite i te matapo e tae noa’tu e nehenehe ia ratou ia ite i te e‘a no ratou iho ».3
Ua ite o Eliza R. Snow, te piti o te peresideni rahi o te Sotaiete Tauturu, ma te aau mauruuru i te mau tautooraa a te mau tuahine no Ogden, Utaha, i te mau Hau Amui no Marite, i te haapuairaa te tahi i te tahi. « Ua ite maitai au e e rave rahi te horo‘ahia [i roto i te ti‘araa no te taviniraa] o te ore roa e tapae [e papa‘ihia] i roto i te mau buka », ta’na ïa i parau. Ma te ite e ua tape‘ahia te hoê buka i te ao ra no te ohipa a te mau tuahine a tauturu ai ratou i te feia tei to‘eto‘e te aau, ua parau oia e : « Ua parau te peresideni Iosepha Semita e ua faanahohia teie sotaiete no te faaora i te mau varua … Ua papa‘ihia te tahi atu buka no to outou faaroo, to outou hamani maitai, ta outou mau ohipa e te parau maitai. … Aore roa e mea i mo‘ehia ».4
© 2013 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane : 6/12. Parau faati‘a no te iritiraa : 6/12. Iritiraa no Visiting Teaching Message, March 2013. Tahitian. 10663 895