Mga Propesyonal sa Media Gikinahanglan aron Motrabaho sa mga Proyekto sa Simbahan
Sa paningkamot nga maayo ang paghulagway sa kasaysayan sa Simbahan sa tibuok kalibutan, ang Publishing Services Department naghimo og Media Professional Database (mediapro.lds.org), direktory alang sa mga propesyonal sa media kinsa interesado nga mohimo ug sine, video, broadcast, live nga mga panghitabo, ug digital nga media alang sa Simbahan.
Ang unang tumong sa database mao ang pag-ila sa may talento nga mga propesyonal sa medya sa tibuok kalibutan, ug ang simbahan gusto nga mopaapil sa daghang mga “hanas”—o aprobado—nga mga propesyonal, mga indibidwal, ug mga kompaniya kutob sa mahimo. Si Scott Olson, project manager sa database, miingon, “Ang Simbahan nangita og hanas na nga mga propesyonal nga adunay pila na ka tuig nga kasinatian. Dili kini database sa mga hobbyists.”
Kaniadto kon dunay proyekto sa medya nga kinahanglang buhaton, ang mga lokal nga kontraktor sa Utah maoy bayaran ug pabiyahion sa lugar diin himoon ang shooting o humanon ang proyekto ug dayon pabalikon aron humanon ang proyekto didto sa headquarter sa Simbahan. Ang Simbahan adunay mga propesyonal sa audiovisual nga motrabaho sa mga proyekto, apan daghan kaayo ang mga proyektong buhatonon nga dili mahimo sa mga impleyado ang pagkompleto nianang tanan. Ang database sa mga may talento nga mga propesyonal sa tibuok kalibutan importante alang sa kaugmaon sa mga buluhaton sa Simbahan kalabut sa media.
Si Brother Oson miingon, “Aron ang mapuslan pag-ayo sa Simbahan ang MediaPro database, kinahanglang salmutan kini sa daghang mga propesyoanl sa tibuok kalibutan. Ang atong tumong niini nga site mao ang pagkuha og hanas na nga mga propesyonal kinsa anaa sa database sa Simbahan aron kon adunay proyekto nga moabut bisan asa sa kalibutan, ato kini silang maduol sa walay langan.”
Ang propesyonal sa media kinsa gustong ikonsiderar sa mga proyekto kinahanglang mopadala sa iyang pangalan, email address, ug mubo nga biography ngadto sa mediapro@ldschurch.org. Kabahin sa impormasyon nga isulat sa mga propesyonal sa media maglakip sa detalyado nga kasaysayan sa ilang trabaho, uban sa mga sampol sa ilang nangagi nga trabaho, kahanas, ug kon kanus-a sila libre. Si Brother Olson miingon, “Importante nga detalyado ang impormasyon bahin sa inyong kahanas kay ang ubang mga kahanas may pagkaparehas alang sa video, sine, ug web.”
Ang pagpalista lang sa MediaPro dili makagarantiya og kahigayunan nga makatrabaho sa Simbahan, apan kon ang mga propesyonal dili magpalista, basin wala gyud silay kahigayunan. Ang pagpalista sa ilang impormasyon ug kahanas makatabang sa Simbahan nga makaila kanila ug makakita unsay ilang mahimo.
Pinaagi sa Media Professionals Database, ang Simbahan mahimong makakuha og tabang sa internasyonal nga grupo sa mga propesyonal sa medya nga mas daling makahimo og video bisan asa sa kalibutan ug minus ang gasto.
Paghulagway sa litrato pinaagi ni Matthew Reier